Worship Me, I Can Make You Rich (Myanmar Translation) U+Z (Complete)

Chapter 65 - Extra 2 (U+Z)

-Unicode-

အခန်း ၆၅ - Extra 2: နတ်ဘုရားတို့အပြန်

ဝမ်ရှောင်းယွင်က သူ့ကို ခေါ်တဲ့အသုံးအနှုန်းကြောင့် တကယ်ကို တအား အံ့အားသင့်သွားတယ်။

အင်ပါယာမှာ တကယ်ဆို လူတွေက သူ့ကို နာမည်မျိုးစုံနဲ့ ခေါ်ကြတယ်။ ဒါပေမဲ့ ဘယ်သူကမှ သူ့ကို ကလေးလို့ မခေါ်ဖူးဘူး။

ဒါပေမဲ့ မကြာခင်မှာ ဝမ်ရှောင်းယွင်က အလွန်လျင်လျင်မြန်မြန် သဘောပေါက်သွားတယ်။

သူက ဒါကို အစကတည်းက စဉ်းစားနေပြီးသား။ ဒါက တပ်ရင်းလည်း မဟုတ်ဘူး။ သူ့ရဲ့ ကင်းလှည့်ရာနယ်ထဲမှာ။ ကမ္ဘာကလည်း လူတွေအခြေချနေထိုင်ဖို့ မဖွင့်ထားသေးဘူး။ ဒီနေရာက ပုံမှန်လူတွေနေဖို့ မဖြစ်နိုင်ဘူး။

အရေးအကြီးဆုံးအရာက ဒီကလေးနှစ်ယောက်ပြောတဲ့စကားက ကြယ်အစုအဝေးရဲ့ အများသုံးဘာသာစကားမဟုတ်ဘူး။ ဒါပေမဲ့ သူတို့စကားကို သူနားလည်နေသေးတယ်။

ဒီဘာသာစကားက ကျိုးကျိုးရဲ့ စိတ်စွမ်းအားကမ္ဘာထဲက ဘာသာစကားနဲ့ ဆင်တူတယ်။ အဲဒါက သူကျိုးကျိုးနဲ့ စိတ်ပိုင်းဆိုင်ရာစာချုပ်ချုပ်လိုက်တဲ့အခါမှ နားလည်နိုင်သွားတာ။

နောက်တစ်မျိုးပြောရရင် သူတို့တွေက....

ဝမ်ရှောင်းယွင်ရဲ့အမူအရာက မသိမသာ အေးခဲသွားတယ်။ အဲဒီနောက်မှာ ချက်ချင်းဆိုသလို လေးနက်တည်ငြိမ်သွားတယ်။

သူက မရင်းနှီးတဲ့ဘာသာစကားကို သတိကြီးကြီးသုံးလိုက်ပြီး ကိုးရိုးကားရားပြောလိုက်တယ်။ ".....မဟာနတ်မင်းကြီးလား"

ဒါက အကုန်လုံး ကျိုးကျိုးကျေးဇူးတွေပဲ။ သူတို့နှစ်ယောက် အချင်းချင်း ပူးကပ်ပြီးနေထိုင်လာကြတဲ့ နှစ်တွေတစ်လျှောက်လုံး ကျိုးကျိုးက သူ့ရဲ့အရင်က ကမ္ဘာမှာနေခဲ့တဲ့ မှတ်ဉာဏ်တွေထဲက တချို့ကို ဝမ်ရှောင်းယွင်ကို ပြောပြရတာ သဘောကျတယ်။ နတ်ဘုရားအမျိုးမျိုးနဲ့ပတ်သက်ပြီး စိတ်ဝင်စားစရာကောင်းတာ အစုံအလင် ပြောပြတယ်။ ဒါပေမဲ့ အဲဒီအကြောင်းပြောရတာ အတော်လေး အလုပ်ရှုပ်တယ်။ ဒါကြောင့် ကျိုးကျိုးက ဝမ်ရှောင်းယွင်ကို သူ့ရဲ့စိတ်စွမ်းအားကမ္ဘာထဲကို ဝင်ခွင့်ပေးပြီး သူ့မှတ်ဉာဏ်တွေကို ကြည့်ခွင့်ပေးလိုက်ရတယ်။