الغرام الفاسد
73
هزها بين يديه كي الريشة طالع بيها لبيتها كانت فعالم تاني ...كله محاسة بلي ضاير بيها ...
حطها فبلاصتها و بعد عليها كيتأملها كيف مغمضة عينيها و مخسرة وجهها باين بلي كتوجع
بقا مدة كيشوف فيها فحالا كيحفظ ملاميحها دقائق معدودة كان خارج من بيتها غادي لعند مو
وقف حدا باب بيتها و دق زوج مرات و بعد شوية و هيا طل عليه مو مخلوعة
الحاجة:ولدي ليك لاباس؟؟
حيدر :الواليدة سيري شوفي أميمة باين عليها مريضة
الحاجة تخلعات : ياك لاباس شن عندها؟؟
حيدر : الواليدة كون عرفت منجيش عندك
الحاحة :واخا أنا نمشي نشوفها
خلاتو و دخلات لبسات بينوارها و لوات شالها على راسها و خرجات
غاديا لعندها حتى وقفها بكلامو :الواليدة أنا كنتسنى إلى كانت شيحاجة نديوها للطبيب
الحاجة كتافات تحرك ليه راسها بواخا و دخلات لعندها دارت يديها فوق راسها كانت الحرارة طالعة شوية شافت فجيهت يديها لقاتها حاطاهوم على كرشها و جامعة رجليها لعندها
الحاجة غير من الشوفة عرفات بلي أميمة جاتها ليغيكل و هيا لي دارت ليها هاكا
خرجات غاديا للكوزينة حتى وقفها صوتو
حيدر : شنو عندها؟؟
الحاجة بابتسامة :والو اولدي غير داكشي ديال العيالات غير سير ترتاح (عرفات بلي بالو مشوش عليها و فرحات فخاطرها)
حيدر حمحم بصوتو : إذن تصبحي على خير
خلاها و مشا لبيتو ....خرج للبالكون و بالو معاها صورتها بقات قبلتو متوقعش تكون زوينة لهاذ الدرجة جمالها ملائكي و طفولي جلس على الكورسي و غمض عينيه بالو غير معاها معرفش علاش فاش شافها قلبو تحرك من بلاصتو و حس بيه كيضرب بالجهد ليل و افكار كنديه و أفكار كتجيبو حتى صبح الصباح ...
حلات عويناتها بالثقالة كتحس بداتها تقيلة عليها و راسها عاطيها الصداع بقات كتشوف فالسقف لثواني و هيا تفكر شنو وقع البارح ناضت مخلوعة كتشوف يمين و شمال صاف عرفها شكون هيا صاف اللخرة ديالها ليوم يجي عزيز من وراها
مزال وسط الصدمة ديالها سمعات الباب تحل ضارت بالزربة تشوف شكون
كتشوفها داخلة و فيديها صينية و ابتسامة على وجهها
الحاجة : صبح الخير أبنتي
أميمة و هيا مترددة : صباح الخير
الحاجة حطات الصينية فوق الكوافوزة و جلسات حدا أميمة شادة ليها فيديها : كيف بقيتي دابا شوية ؟؟مزال فيك الوجع؟؟
أميمة حنات راسها للأرض حشمانة و خيفانة فنفس الوقت :شوية الحمد الله
الحاجة بابتسامة :البارح حيدر تخلع عليك جا كيدق عليا فنصاصات الليل
أميمة شافت فالحاجة:واش نقوليك والو؟؟
الحاجة: قالي نجي نشوفك و إلى حتاجيناه يجي يديك للطبيب
أميمة حسات بارتياح عرفات بلي مغاديش يكون عقلها كون عرفها شكون كان يلوحها فالليل
أميمة :سمحيلي عذبتك معايا
الحاجة: نتي راه بنتي عذابك راحة (قربات ليها داك البلاطو) كولي باش تشربي دواك ........
أنت تقرأ
الغرام الفاسد🖤مكتملة🖤
Romance💎مكتملة💎 🖤🥂#الــــغــــــــرام_الـــفـــــــــاســـــد 🥂🖤 ✧ فـــكــرة و إشـــراف : نـــدى عـــلامــي ✧ بـــقــــلــــم : سكينــــة البــقالــي ____________ •̀ نعـتـها بما ليس فـيـها ، ف ردت عليه بابتسامة ماكرة قائلة : أنَا التِي هزّت كِ...
