الغرام الفاسد🖤مكتملة🖤

🖤الجزء 121🖤

الغرام الفاسد

121

دازت 10 أيام و هوما معا ناسيين العالم كانو طافيين تيليفوناتهوم شحال من حاجة أميمة مكنتش عارفاها على حيدر و عرفاتها عاود ليها على ماضيه و على الإنسانة لي كان كيبغيها عاود ليها كيف رباه باه و كيفاش كبر كيفاش كان هو لي متكفل بخوه و بلي هو سبابو حتى ولا هاكا مستهتر

و حتى من أميمة عاودات لحيدر على طفولتها و على ختها كيف دوزات الميتم مخبات عليه والو و بطبيعة الحال الليالي الإكتوائية مخطاوهومش
كانو واقفين تحت العمارة لي ساكنة فيها
حيدر : غادي نتوحشك
أميمة: حتى انا
حيدر : سيري معي حوايجك و قادي امورك من دابا 3 أيام نرجع من موراك باش ترجعي لدارك
أميمة تبسمات ليه قربات عندو و باستو بالزربة و نزلات: طريق السلامة
ودعاتو ودخلات حيدر بقا واقف مدة عاد شد الطريق

أميمة غير فتحات الباب و هيا تلقا البنات كيتسنتوها تلاحو عليها بالأسئلة فين كانت وشنو دارو موهيم كيسولو على كلشي
أميمة: بلاتي غير نجلس و تعاود ليكوم
ملاك واقفة بعيد : شوفو دار السر ديال العريسات لي طايح عليها يعطيكوم الخبار
صباح شافت فيها : أنا قلت ليك مبقيتيش كتحشمي و شيرات عليها بصندالة
أميمة:دابا واش نعاود ليكوم او لا؟؟
البنات :عاودي عاودي

داز الوقت كان جالس معا واليديه الحاحة باينة فرحانة : هذا أحسن خبار سمعتو اولدي اخيرا غادي نشوف ولادك و مستقر فحياتك خصوصا معا أميمة بنت لي الله يحجبها زوينة ماذبة و مخلقة
قاطعها عبد الله :الحاج سكتي(وشاف فحيدر ) إلى رجعتيها مانتا ولدي ما أنا باك
حيدر ناض هاذيك الساعة :الواليد أنا خديت قراري هاذي ٦ سنين وحتى شيحد مغادي يبدلو ليا أنا غادي نجيب مرتي تعيش معايا بغيتو أو كرهتو ولي بغاني انا و مرتي راكوم عارفين فين ساكن
رنا ليهوم هاذ زوج كلمات و تم خارج من نهار خرجات أميمة حتى حيدر مبقاش ساكن معاهوم خدا فيلة كطل على البحر و سكن فيها و فاش عرف الحقيقة ديالها بقا كيفرشها و كيقادها باش نهار لي يلقاها يجيبها ليها

كان خارج حتى وقفو صوتو
يوسف: خويا
حيدر وقف بلا مينطق معاه
يوسف تم غادي بالزربة لعندو و تقابل معاه : شحال غادي تبقى غضبان عليا ؟؟ خويا راه عييت أنا صلحت من راسي و تبدلت مبقيتش هذاك يوسف المستهتر لي كيدير غير المشاكيييل مبقيتش صابر على الخصام ديالك اخويا .... (سكت شوية و نطق )إلى كان موتي غادي يخليك تسامحني فكنتمنى الم وت ليوم قبل غذا
حيدر غير سمع خوه شنو قال ضارو قلبو عليه و حط يدو على كتافو و نطق : دير عقلك هاذشي لي بغيييت
يوسف تبسم عرفو سامحو واخا غير كلمة واحدة قالها ليه
يوسف :عمري مغادي نزل براسك معمري غادي نغلط
حيدر : سير دخل للدار البرد
تخطاه غادي خارج حتى وقفو تاني
يوسف : فاش غادي نسافر
حيدر ضار لعندو : فين ؟؟
يوسف : غادي نمشي نقابل الخدمة لي فالميريكان
حيدر بابتسامة :كون راجل
وكمل طريقو.....