جسور بليدة

البارت التاسع والثلاثون

جسور بليدة .. حمامة الجبوري
..البارت التاسع والثلاثون ..
..
أريـد احجي بجــرح تبجيله گل عـين
واريد اگتب قصيــده بريشه احزانـي
واريـد اخذ هــمومي لفوگ الغــيوم
اهـدها وهم ترد تـرجعلي من ثانــي
خـلص هذه العـــمر هـم ومـصاب وآه
اسد باب الحــزن وانسئ شكثر بيباني
مل مـني الــــصبر بـس اني مامليـت
اگــابر وابتسم لــوشفت صحــــبــاني
احبـس الدمــعه بقهـر وتفيض الجروح
واتـاني يمر فـــرح يطفيلي بــرگاني
..
ديمة .. تحجي وأني مصدومة ودموعي تنزل
ماگدرت أسيطر على نفسي لو أمنع نفسي من البچي شايفين
شگد صعبة من تعرف ماضيك ويطلع أتعس من الگذبة
الچنت عايش بيها سنين !!

أبجي وأحس بروحي چاي تنازع الموت ليش هيج
ياربي ليش يوم بعد يوم تخليني أنصدم بحقيقة وياريتها
تشفي جروحي لا بلعگس أتزيد أحزاني وترش الملح
على جروحي !!!

ياحسافة هذا عمري خلصت وچبته لوعات بلوعات
گلما اوگع وأنهض من جديد تجيني مطبات اصعب من القبلها
وگلما تجينه سنة مابيها شي تجي الجديده تضرب بينه من گل الجهات

يازمن يادنيا ياناس يا عالم !
شنو أللي بدرته وشنو اللي سئت بي حتى احصل
هيج عقاب والله العظيم تعبت وأحس طاقتي خلصت اني
هم بشر عندي أحساس وأمل مو حجر !
حتى الحجر لو عايش هاي حياتي چان مل وصرخ گافي .!!

من اني وصغيرة وجبت حياتي مهمومة ومظلومة
ولا أم تحن ولا خالة تسأل گبرت نفسي بنفسي
وحتى بوقت المواساة چنت اني اواسي نفسي چنت اصبر
نفسي واگول يلا تهون هاي شدة ويجي يوم وتنفك !
وياترى شوگت راح تنفك وهم راح يجي يوم ويمر على ابوابنه
الفرح؟؟؟ لو نضل مثل الغيم نبجي الدمع الاحمر.!

أريد أجاوبها لو أرد عليها بنص گلمة بس حسيت
نفسي عاجزة عن اي گلام ولحد هسة الصدمة متشبعة بية .!!
بحيث أصفن أصفن وارجع انهار وأبجي بصوت عالي ومسموع !!

لأول مرة أحس بنفسي مجرد جثة فقدت احساسي
وفقدت اخر ذرة بروحي اني اليوم خسرتها.!! اليوم انگسر
اخر جناح من قوتي ووگفتي على طولي .!! عافتني وراحت واني
بس ابجي اريد أسگت نفسي ماگو الشهگة تطلع مني بحرگة گلب ..

أنفتح باب الغرفة مارفعت راسي بس اسمع صوت بنية
تبجي وشهگاتها عالية وشوية ورفعت راسي وأشوف بنية
شابه وتمشي بوحدة تچي بعمرها

امسح بعيوني وأباوع عليها هاي اي هاي رحمة .!!
هاي رحمة الطفله الحلوة ام الضحگة البريئة هاي صديقة
عمري الچنة أنام وناگل سوية !!

لا يادنيا شلون هيج رجعتي بينه واليا محطة .!
شلون اتعاوفنه بهذا البيت وهسة التقينة ومن جديد وبنفس المگان
ابجي بصوت عالي حتى ماگدر احجي ..!!

أحس الساني صار ثگيل احط ايدي على گاع وأستند
بي اريد اگوم ماگدر من الفرحة لو الصدمة لو حزني زاد
عن حده مادري .!!! بساعتها فقدت رگضت عليها واتلمس بيها وأحجي
بلگوة يطلع الحجي مني ..