قابل للتفاوض+زمهرير (دراما صعيدية مميزة)

الفصل الثامن عشر

الفصل الثامن عشر
زمهرير //إيمان سالم

الحب كاس مدقتهوش
جرعة حنان وطوق امن
يتلبس و متحسهوش
هفضل امني نفسي بيوم جميل
اصحى اللاقي اللي قلبي ميهمشوش
يصرخ يقول وسط البشر
اه ده الحبيب اللي في قلوبنا نحطه منضيعوش

معرفاش اجولك إيه سلوان اجول لك أنه ضربني وهاجرني وبيعاملني كاني مش موجودة اصلا
شهقت سلوان وهي تعتدل بغيظ متحدثه: ضربك ليه ايه اللي حصل عشان يعمل كده
بكت متحدثه: مهو لو اعرف السبب يمكن ارتاح او اجول معاه حج أنما هو بيزعل ويغضب ويفرح كل حاجة مع نفسه كني مش موجوده في حياته
-طب ليه مبتتكلميش معاه وتخليه يفضفض ويتكلم؟!
زهجت من الكلام وتعبت نفسي أحس إني ليا وچود في حياته يتكلم معاي زي كل راجل ومراته

شكله مبيحبكيش يا شجن لو بيحبك مش هيعمل كده!
الخيبة إني عارفه إنه بيحبني بس حب جاسي حب عامل زي الدبه اللي جتلت صاحبها، مش عارفة اكلمه واجوله اجلكم ولا عارفة اجي من غيره ولا عارفة اعمل ايه .. دليني يا مرت اخوي انتِ اكبر مني ومتعلمه

تشعر بالاسى حيالها لكن ما باليد حيله هتفت في قوة تحسها بكلماتها على التغير: يعني هو عامل فيها أبو الهول ماشي وانتِ طبعا مقضياها عيط وحزن صح
-هعمل ايه جلبي بيتجطع وبزعل على نفسى

وتزعلى على نفسك ليه احنا اللي هنخليه يزعل على نفسه ابن البومة ده
عيب يا سلوان دي بردك مرت عمي
يا اختي اسكتى ماهو مفيش حاجة جيباكي ورا غير طيبتك دي تلاقي الحرباية دي هي اللي مقوياه عليكِ بزمتك مبتعملش كده؟

صمتت شجن لا تعرف بما تجيبها
اكدت سلوان كلماتها متحدثه: اهه كلامي بحق
بس هي متعرفش حاچة المرة دي
بركة يا حبيبتي الا وكانت قامت بالواجب بطلي طيبة شوية الراجل لما بيلاقي الواحده ضعيفه قدامه يبعد عنها يومين يلاقيها مستنياه وقتل نفسها عياط وحزن ساعتها هيعمل اكتر من كده فكي وقومي اغسلي وشك والبسي هدوم حلوه نظفي شقتك وطبعا هو بينام في حته تانية اهو بقي الحته التانية دي اهم حته تتقلب في الشقة اقلقي راحته زى ماهو قالق راحتك
بس كِده هيفكر إنها حچة عشان اكلمه
"لاه اللي زي جوزك ده مبيفكرش اصلا" هتفت بها في نفسها ثم قالت لا متقلقيش انتِ بتنضفي هيتكلم اديله على دماغه بلاش الخيابة بتاعتك دي

انا مش عاوزه مشاكل أنا عاوز الدنيا تُبجي زينة واجي عندكم من غير مشاكل
-استفزيه هيجي لحد عندك يا بنتي هما الرجالة كده

خايفة يا سلوان اجي اكحلها اعميها
لا ان شاء الله هتبقي الدنيا زي الفل اجمدي انتِ بس كده وبلاش الخوف اللي من غير داعي ده
-حاضر هچمد وربنا يستر

------------------------------------------

تجلس في معمل التحاليل برجفه خفية
تمني نفسها أن يكون ظنها حقيقي
سحبت الفتاة عينة الدم وهي تبتسم لا تشعر بأى ألم مطلقا ..
انتهت وأول سؤال كان: هي النتيجة هتظهر إمتى؟