LOVE WITHOUT BOUNDARIES

CHAPTER 59

CHAPTER 59

HINDI PA rin ako makapaniwala na hinawakan at pinagpilian ni Maxrill Won ang undergarments nang parang wala lang. Samantalang sa bahay, tinatago namin ni Bree Anabelle lahat ng personal naming gamit na para lamang sa mga babae. Magkaiba rin ang sampayan ng mga damit namin nina nanay, at Bree, kina kuya at tatay.

Tiningnan ko lahat ng undies, 'yong light blue ang pinili ko, ang paborito kong kulay. Saka ko tiningnan ang white, cotton, oversized sleepshirt na binigay niya. Iyong letrang "D" na maliit at kulay blue sa dibdib niyon ang una kong napansin. May pointed collar pero walang butones at malalim ang pagkakabukas ng placket hanggang sa dibdib. Mahaba ang manggas pero hindi aabot sa tuhod ang haba. Napalunok ako sa nipis niyon pero dahil ramdam ko na ang lamig, sinimulan ko nang maligo.

Hindi mawala ang ngiti ko habang ginagala ang paningin sa buong banyo. Iisipin ko pa lang na doon kami titira ni Maxrill Won, parang mamumula ang buong katawan ko.

Naglalaro lang sa gold, gray at black ang kulay. May bathtub, shower room na may malapad na shower head, apat na sink at higit sa lahat, magandang view ng falls. Lalo pa akong napangiti dahil may mga gamit na pambabae at panlalaki. Para bang handang-handa na siyang tumira dito kasama ako, lahat ng kailangan ko ay narito na, kasama siya.

Panay pa rin ang ngiti ko nang matapos. Gusto kong amuyin nang amuyin ang balat ko matapos magpahid ng La Mer body cream. Gano'n na lang din ang lambot sa mukha ng La Prairie facial cream. Sobrang babango at ramdam kong nanunuot sa balat ko. Hindi ko kilala ang brands na 'yon pero sa unang gamit pa lang, nagustuhan ko agad.

Nang makalabas, naghanap ako ng hanger sa closet para sana sa towel ko. Pero natigilan ako nang makita ang kabuuan ng closet. Nakakalula! Napangiti ako nang makita ang mga istilo ng damit na sinusuot ko; 'yong may mahahabang manggas, saradong kwelyo at lampas tuhod na palda.

Halos lahat pa ay naglalaro sa iba't ibang klase ng kulay asul. Magkakasama lahat ng magkakakulay pero karamihan sa mga 'yon ay ang kulay ng asul na paborito at madalas na suot ko.

Natigilan ako nang makita ang hanger at napabuntong-hininga nang maging 'yon ay may brand na madalas kong makita sa mga gamit at suot ni Maxrill Won; LV.

Ang bango-bango... Nakangiti kong inamoy ang buhok ko, sobrang bango ng shampoo. Maging ang balat ko, hindi ko man idikit sa ilong ko ay sumasamyo.

Lumabas ako at inisa-isa ang bawat kwarto, hinahanap siya. "Maxrill Won?"

Sinasara ko agad ang pinto kapag nakapatay ang ilaw sa kwartong nabubuksan ko.

"Maxrill Won?" wala siya sa ikalawang guest room. "Maxrill Won?" Napangiti ako ang bukas ang ikaw. "Siguradong...nandito siya."

Nakangiti akong nagdere-deretso sa bathroom dahil siguradong naliligo siya.

Saka ko binuksan ang pinto niyon. "Tapos na 'ko."

Nagugulat niya akong nilingon. "Ya!"

"Hala!" Tuliro kong isinara ang pinto. "Sorry! H-Hindi ko alam na naliligo ka," napakatanga ng sagot ko.

Nakagat ko ang daliri at lumapit sa kama. Kabado kong nilingon ang pinto ng banyo nang mamatay ang shower. Napalunok ako nang matahimik sa loob. Tumalikod na ako nang bumukas ang pinto niyon. Naglakad ako palayo, plano nang lumabas, nang marinig ang papalapit na yabag ni Maxrill Won.

Nakita ko ang...buong likuran ni Maxrill Won. Napapikit ako sa kahihiyan, saka natakpan ang sariling mukha.

Malalalim at magkakasunod na buntong-hininga ni Maxrill Won ang narinig ko. Sinulyapan ko siya at natulala nang makitang bukod sa small towel na nakapatong sa kaniyang ulo, nakaitim siyang loose pants at bukod do'n, wala na. Tumambad sa 'kin ang maputing dibdib at kurbadong tiyan niya.