ذات عيون الريم🍷مكتملة🍷

🍷الجزء 12🍷

✨🍷الجزء 12🍷✨
❤🍷ذات_عيون_الريم🍷❤
Hermosa El & Nour Qamar
في بَحرِ عَينيكِ هامّت كُل أشوْاقي
يا رَبةَ الحُسنِ هل تنّويِنَ إغْرَاقي؟

ضورات راسها بصدمة بان ليها إسماعيل جالس ويديه كيترعدوا وباينة فيه فشلان ضورات عينيها للجهة الأخرى كتبان ليها مريم مغيبة وبنتها كتفيق فيها بخوف أما خلاص بنتهم الأخرى غتجهل عقلها غيخرج بالبكاء مسحات دموعها بالزربة وجرات للكوافوز هزات من فوقوا بارفان ديال مهى عطاتها لختها باش تشممها لمريم وهي شافت فلطيفة لي كتبكي ونطقات بالزربة
بلقيس:لطيفة جيبي كاس دالماء والسكر
(مشات طايرة تجيب ليها داكشي وهي ضارت كتشوف فيهم هي براسها خاص لي يواسيها ماشي ساهل تشوف منضر بهاد البشاعة خدات الكاس لي فيه الماء والسكر وعطاتوا لإسماعيل يشربوا وضارت كتشوف فمريم لي بدات كتحرك فرموشها باش تفيق وفلحظة تقلبات الدار سفاها على علاها بالبكاء والغوات وكأنها جنازة
خرج إسماعيل ركب فطنوبيلتوا وفجنبوا مريم غادين للكلينيك لي خدام فيه ولدهم حيتاش أكيد هداك لين غيديها وتبعاتهم بلقيس بطنوبيلتها مركبة معاها خواتات مهى الطريق كانت طويلة ماوصلوا غا بزز سولوا فالإستقبال تقال ليهم بيلا غدخل للعملية دابا طلعوا للطابق لي قالت ليهم وهو يبان ليهم عيسى خارج من المكتب ديالوا ماشي هو لي غيتكلف بعمليتها حتاش مغيركزش فيها
مريم(بلهفة):آش واقع ليها أولدي؟؟؟؟؟
عيسى(نزل راسوا ونطق بحزن وتنهيدة حارة صدرات منوا):حالة إغتصا.ب الوليدة الرحم تضرر ليها بزاف دخلات دابا الطبيبة تفحصها وقالت ليا يقدر يستأصلوه ليها شوية غدخل للعملية حتاش تهرس ليها النيف ولحمها كلوا معنف حالتها خطيرة خصوصا النزيف لي جاها وعندها شي جوج سنينات التحت تهرسوا هادوك لاولات بيخير دير ليهم الفيكس الأهم هو تولي بيخير
(الهضرة لي سمعوا كانت قاصحة بالنسبة ليهم بزاف كل واحد شد قنت شي كيبكي شي مصدوم غا شوية هادا كانوا بيخير فالبلاصة تقلب عندهم الجو وولاوا بحالا فكنازة
عيسى دخل لبيروه وخبط الباب جلس فبلاصتوا وهو يبدا كيمسح على شعروا وشرارات من الغضب فعيينيه حالف بحلوفوا يندم لي دارها وأكيد هذا لي دارها ميخفاش عليه

دخلوها لقاعة العمليات وتماك تزاد معاهم الزايد
بكاوا خافوا توتروا نهار كحل تسجل فحياتهم وعمرهم غينساوه كل تفصيل وقع فيه تسجل فداكرتهم ضربات
الربعة دالعشية عاد خرجات الطبيبة كانت كبيرة فالسن بدات كتزول فالكمامة وخرج الفريق الطبي وراها شافت فيهم وتبسمات كتحاول طمنهم بدات كتمسح جبينها من العرق وفالبلاصة بان ليها عيسى خارج ووجهوا كحل باينة فيه خايف تبسمات ليه وتكلمات بصوت شوية عالي باش يسمعها
الطبيبة: الحمد لله دازت سالمة وقفنا النزيف ودرنا ليها العملية
(يالاه بغات تسولها مريم وهي تفهمها من شوفاتها ونطقات)
الطبيبة:الحمد لله ماكاين لاش تخافوا كون تعطلتوا شوية كنا نستأصلوه ليها مي دازت الأمور سالمة
(تبسم ليها عيسى وشكرها وهو ينطق)
عيسى:دابا نخليوا البوليس يتكلفوا
الطبيبة:أكيد شكون هاد الكلب لي دار فيها ديك الحالة؟؟؟؟؟؟
عيسى:واحد الحمار (مسح على شعرها وكمل بغضب ):راجلها طلبات منوا الطلاق (وقبل يكمل قاطعاتوا بتفهم)
الطبيبة:اه فهمتك اي حاجة احتاجيتوها هانا هنايا دكتور عيسى لا حتاجيتوا شي حاجة مرحبا ومنساش ضروري تبعوا ليها مع طبيب نفسي هادي حالة إغتصاب و تعنيف أكيد غتأثر على حالتها بزاااف
عيسى:كوني هانية أدكتورة
شكرها ومشات فحالها عاد تنهدوا براحة جلس إسماعيل فوق الكرسي كيتنهد محسابلوش غيوقع هاكا كون من نهار مشا العساس على وديت مرتوا لي غتولد كان يجيب واحد آخر معروف على البلاصة فين كيسكنوا كالم ومكاينش لي يتمادا ويقرب ليك فيها كفاش إسماعيل قدسي يدخل كلب لداروا ويدير لبنتوا ديك الحالة عينوا كانوا حمرين بالأعصاب حالف يغرق ليه الشقف وماغايمشي حتا يديرها

دازت ليلتهم كحلة مها لي نعسات جنبها ماغمضات عينها ماشافت النعاس خايفة عليها
أما البقية رجعوا للفيلا معاهم من غير عيسى بقا فالمستشفى خايف على ختوا بلقيس ماخلاوهاش تمشي لدارهم فداك الليل وتاهي معانداتش حتاش مشا الحال والدنيا مضلامة تخاف يخرج ليها شي حد فداك الليل فطريقها

يوم الأحد مع 11
دالصباح وقف بطنوبيلتوا قدام فيلا الأحمدي نزل كيقاد فحالتوا جبينوا مكمش بالأعصاب وغير من الشوفة يبان ليك مزير ومعاجبوا حال هبط باه راجل كبير فالسن وتبعاتوا الوليدة ديالوا وعيشة لي من عائلة الزاوي وهي نفسها لي عيطت على فردوس وعلماتها بيلا غيجيوا شي ناس الله يعمر ليهم الدار يخطبوا فبنتها ومن نفس مستواهم ومع العلاقة لي كتجمع ما بين عائلة الأحمدي والزاوي ناقشات الموضوع مع راجلها والعائلة وقالوا ليها مرحبا
رحبوا بيهم أحسن ترحيب ودخلوهم للصالة النساء فوحدة والرجال فوحدة غا هوما الصالات مقابلين
بداوا كيهضروا بيناتهم وعز العرب عينوا على مو لي جالسة فالصالون وكتهضر مع العيالات وغير من الشوفة تعرفها مريضة عيق بزاااف خاصوا يتزوج ويجيب ولدوا حداه كان كيهضر بتقالة مرزن ومن الجلسة ديالوا وكلاموا كيبان فيه بعقلوا نيييييت
صونا تيليفونوا وهو يستأذن منهم ناض خرج من الصالون وهو يكمش حواجبوا ورجع لتخنزيرتوا كيقول بينوا وبين راسوا باينة هاد بلقيس كي غتكون غير من السمية ديالها جاه فبالوا غتكون شي وحدة كبيرة شوية فالسن وعروبية ومكتعرف لاتهضر لاتلبس غير من السمية ديالها حكم عليها تم نازل مع الدروج باغي يخرج من الدار باش يهضر على راحتوا فالمقابل ضربات بالفران قدام الدار ونزلات من طنوبيلتها مهدودة مازال لابسة نفس الجلاب شعرها جامعاه الفوق بمقبط والكصة نازلة على عويناتها بطريقة زوينة نيفها وحناكها مزنكين ورموشها فازكين وعويناتها كيبريوا بالدموع غير مازادت فتنة على فتنة تمشات قاصدة باب الدار حتا كتسمع مرأة عمها نطقات من البالكون بصوت عالي شوية باش تسمعها وهاد اللقب بالضبط وصل حتال ودنيه
:
عوينات الريم

(رفعات عينيها ليها تبسمات وشيرات ليها بيدياتها )
عاد شافت قدامها ضورات عينيها بانت ليها واحد الطونوبيل مهتماتش ليها قالت غيكون شي ضيف نزلات راسها ومع جات تلوح الخطوة الأولى حتا كتجي عينيها على شي واحد وقف قدامها كانت على شوية غتخرج فيه

كان كيهضر فالتيل ولاكن غير سمع داك اللقب
"عوينات الريم"
بقاوا عينيه معلقين على الباب بلاما يحس وأول مالاحت الخطوة الأولى بدا يطلع وينزل فيها بديك الجلاب جاتها واااعرة بزاااف شي حاجة دماااااا.اار🔥❤ واخا ماشي شي فورمة نيييت ولاكن سالات معاه ضور عينوا مع ملامحها بلاما يحس فمها نيفها حناكها شعرها ريحتها الخفيفة ...عنقها الطويل كولشي فيها كان فاتن للحد الأقصى بدا يبلع فريقوا حتا كتحرك تفاحة آدم فحلقوا عينوا تفيكساوا على جفونها كيتسناها تهز عينيها فيه بكل لهفة .....باغي يشوف عينيها ولاباس نسا طارق لي كيهضر معاه فالتيل و نسا راسوا حتا هو خصوصا من الشيئ لي سمع هي بغات دوز من حداه ولاكن حابس عليها الطريق بلعات ريقها بتوتر خصوصا مني وصلاتها ريحتوا تنهدات كتحاول تكبح توترها وأخيرا وبعد طول إنتظار منوا هزات عينيها فيه