ذات عيون الريم🍷مكتملة🍷

🍷الجزء 20🍷

✨🍷الجزء 20🍷✨
❤🍷ذات_عيون_الريم🍷❤
Hermosa El & Nour Qamar

في بَحرِ عَينيكِ هامّت كُل أشوْاقي
يا رَبةَ الحُسنِ هل تنّويِنَ إغْرَاقي؟

تبسمات ونزلات راسها حشمانة وحناكها مزنكين ويديها كتفركهم بقوة التوتر بلعات الريق لي وحل فحلقها وبدات تفكر كتقول عاد شوية هذا كنت نفكر فالزواج زعما هادي غير صدفة
واليديها كانوا متبعين ليها العين ومرة مرة يشوفوا فبعضياتهم حتا كتهز فيهم عينيها ونطقات بهدوء
بلقيس:شكون هذا؟؟؟؟؟

(فردوس بغات تبكي نطقات بصوت مغنج بالبكا)

فردوس:واحد السيد سميتوا عز العرب ياك أعزيز؟؟؟؟

(اللون مشا من وجها بحالا صرفقتيها هزات راسها بصدمة ونطقات)
بلقيس:كفاش عز العرب؟؟؟؟
عزيز(شاف فيها بإستغراب من ردة فعلها:أييه سميتوا عز العرب جا الصباح مع عائلتوا
(بلعات ريقها ممتيقاش بغات تندب حنوكها ووجها رجع حمر بدات تويل بينها وبين راسها وكتقول علاش كتزربي أبلقيس علاش؟؟؟
فردوس:السيدة لي سميتها رحمة هاديك هي الوليدة ديالوا شفتيها شحال درويشة متلقايش معاها مشكل
(حنات راسها كتفرك فصبعانها معرفات باش تجاوب من جهة عجبها فشخصيوا ومن ديما الشخص لي كتحلم بيه يكون راجلها بنفس الصفات لي فين زوين كبير فعقلوا حرش وشخصيتوا زوينة ولاكن الحاجة لي معجباتهاش هي الشدة لي دار ليها قبيلة زعما يكون زهواني وأبوا بنات عضات على شفايفها ونطقات )
بلقيس:خاصني نفكر
عزيز:خودي راحتك أبنتي ومهما كان جوابك حنا قابلين بيه
(يالاه غينوض حتا نطقات فردوس)
فردوس:أحم كاينة حاجة أخرى
(شافت فيها بلقيس وهزات حواجبها بتساؤل كتقول أشناهيا هاد الحاجة الأخرى تاني)
فردوس:السيد مطلق ووالد وليد مشلوش مازال ماكمل العام

(الخبر طاح عليها بحال الصاعقة متوقعاتوش يكون ديجا مزوج ووالد شافت فمها ونطقات بإنفعال شيئا ما)
بلقيس:ويلا كان أمي مزال كيبغي مرتوا الأولى ويلا بدات تجي تشوف ولدها فين غنوليوا ديك الساعات
(عبسات فيها فدروس ملامحها و نطقات بحزن )
فردوس: قالت ليا رحمة بيلا مرتوا الأولى فالولادة وقع شي مشكل ليها داكشي باش تزاد الوليد مشلول وهي فاش شافتوا هكاك حلفات لاقاستوا قالت ليهم أنا ميمكنش نولد ولد مشلول تا من حليبها مرضعاتوش منو ودابا كتقولي ليا ولدها هي النهار الأول قالت ليهم أنا مولدتش كون غير تزاد ميت ولا هاد الحالة وراها تزوجات
(تنهدات وكملات )
كاين لي بغا الولاد بالريق الناشف وملقاهم بنادم مكيحمدش الله ولاكن مزال تخلص
(نزلات راسها بحزن من طبيعتها حنينة بحال مها كتقول وليد صغير أشنوا دنبوا باش يعيش هاد الحالة نزلوا ليها الدموع بلاما تحس وهي تمسحهم بالزربة شافت فواليديها لي قبالتها ونطقات)

بلقيس:نفكر ونرد عليكم
(حط عليها عزيز يدوا ونطق )
عزيز:عارفك أبنتي حنينة ديري كيلا مقلناش ليك هاد الهضرة الأخرة شوفي نتي ولي يسلكك حركات ليه غا براسها وناضت جمعات الوقفة
(شافوا فيها بجوج وهي تنطق)
بلقيس:نزل نعس غدا إن شاء الله خاصني نمشي نشوف مهى مسكينة كي بقات عاد تابعاني الخدمة
(حركوا ليها غا براسهم وتبعوا ليها العين حتا نزلات مع الدروج واختفا أترها)
نزلات بالزربة كدردك وكل ماتفكرات الدري الصغير كينزلوا دموعها تفكرات لي وقع لمهى على وديت الولاد وتنهدات حطات يديها على البواني ديال الباب ودخلات لبيتها سدات عليها ومشات نيشان لسريرها حلات تيليفونها بالزربة معولة تحيد ليه البلوك حتا كتصدم مني لقاتوا مصيفط ليها من كونط آخر عضات على شفايفها وبلاما تحس تبسمات ونطقات
بلقيس:النوع لي
كيعجبني