ذات عيون الريم🍷مكتملة🍷

🍷الجزء 91🍷

الجزء 91👄❤✨🔥
فمكان اخر وبضبط عند رباب كانت لابسة قفطان ديال الجوهرة وكتقاد مع الخدامات..كلشي وجدوه على حقو وطريقو وباها جالس كيقراا الجورنال فالصالة بنما جاو.. ووسط انشغالهم باللمسات الاخيرة..سمعات الدقان فالباب دارت شافت كلشي فبلاصتو واشارت لخدامات يدخلو لكوزينة تا تطلبهم وحتى هوما مزادوش معاها فالكلام ونساحبو..اما هي بخفة توجهات للباب باش تستقبلهم وباها تابعها..كان انور ومو دخلو وجلسوا فصالة بعد ما ستقبلوهم مزيان.. مجمعين وكيضحكو شحال عاد حنحن انور تايشوف فمو وهي بدورها فهماتو ونطقات

: اوى اسي رشيد راك عارف المقصود من مجيتنا جينا طالبين فيد بنتك لالة رباب لا قبلتو علينا

رشيد حنحن وتقاد فالجلسة وشاف ديريكت فأنور لي حس بالستريس فهاد اللحضة خافو يرفض : اولد الناس كيف كتشوف بنت وحدة لي عندي ولي داز عليها ماشي ساهل راك عارف كلشي الى مكنتيش قادر تحافظ عليها بلااش من هاد زواج لا كانت اتعاود نفس التجربة

انور : لا لا اعمي حاشة رباب فعينيا جيت قاصد الباب ولي قصد الباب ما فنيتو الدغل حاشة

رشيد شاف فرباب لي بانت ليه باغا زواج حس بديك الهضرة لي قال ضغطات عليها كتر من أنور شاف تاعيا ونطق بإستسلاام : اوى مني الولد والبنت باغين بعضهم معندنا منزيدو الالة فاطمة

فاطمة تبسمات ونطقات : ايه السي رشيد اصلا غيردارو معانا الصواب دخلونا فالخطبة هههه
نطقو انور ورباب دقة وحدة : لااا حااشة ( وشافو فبعضهم وضحكو )

وهي تنطق فاطمة : يالله طلقونا ركبو الخواتم خلااص جانا جووع

ناضو كلهم وقفو ولالة فاطمة جبدات من صاكها بواطة فيها الخاتم وعطاتو لسي رشيد لي حلها وجبد خاتم ومدو لأنور لي بزربة شد يد رباب وركب ليها الخاتم وحتى رباب ركبات ليه الخاتم تحت ضحكات باها وام انور وأنور لي ميت بالفرحة..بعدها توجهو الطبلة لي كانت مجهزة على حقها وطريقها كلشي فبلاصتو ومتول وكلسو تاياكلو فجو مليء بالضحك والتقشااب دغيا ولفو بعضهم كأنهم عائلة من زماان ....
فمكان اخر وبضبط عند بلقيس كانت لابسة جلابة مخدومة بالراندة والعقيق وشعرها مبوكلياه جاها زوين وميكاب خفيف ومركزة على عيونها برزاتهم بشكل جداب جالسة فالصالون مع مها كيدويو على الناس لي غيجيو وباها باقي مجاش سمعوا الدقان ناضو يشوفو شكون كان عز العرب وعائلتو ستقبلوهم واخا العائلات مرتاحين مع بعضهم مي عز العرب كان كيتعرض لشحنات من الطرفين جلسو وهو بحالة جالس على الشوك تا جا عزيز لي زاد طين بلة جالس مخنزر حاااقد على الوضعية  بقاو شحال كيدويو ينسيو الجو المشحون لي ولا من طرفين  تا حنحن براهيم ونطق

: اوى انسابي راه معندي منقول راكم كلشي عارفينو هاد الولد راه غلط فبنتكم ودب بغا  يصلح غلطو وجا يعتاذر منها قدامكم ويعاود يطلبها منكم  ولي قلتوها راه حقكم  هاداك منلوموكمش
عزيز : البنت فاش عطيتها ليه فلول مقاليش غيردها كتبكي وهازة هم الدنيا وما فيها بنتي كانت عايشة فدار باها اميرة  وجا ولدكم ردها فواحد الحالة لي عمري تخايلت توصل ليها ابدا

نغزاتو فردوس باش تهدن الجو هي اكتر وحدة فاهمة الوضعية مزيااان وعارفة ماشي مصلحتهم هادشي لي كيدير عزيز دب ضحكات ونطقات محاولة تهدن الجو
: ناكلو بعدا وندويو اره الماكلة غير غتبرد

داكشي لي كان فوق كلامها متزادش الحرف كلشي ساكت وكيترقب اش غيخرجو من هاد المجية اما فردوس جرات راجلها يحط معاها زعما عزلاتو فواحد القنت  عاد نطقات
: برد السووق معاهم راه البنت خاصها ترجع لدارها

عزيز خنزر فيها : اش غنردو ليهم نسيتي الحالة لي جات فيها تاهي بانت ليا نساات دغيا باغا ترجع معااه

فردوس : راه البنت حاملة  شنو غنفرقوا الولد على بااه .. هي دب راه رصات معااه وشرطات عليه شحاال من شرط  الى مدارش بيهم ورجع لعوايدو راه ترجع

عزيز : لا حولة ولا قوة الا بالله الناس تترصي وتعرف معامن عاد تولد وبنتي انا (سكت لا يزبلها)

فردوس : مكتااب ربي هاداك اما  هي مكانت ناوية ليه كااع دب راه ماشي البنت لخاطرها اترجع على قبل لي فركشها نصبرو على الله يدير عقلو هاد المرة ,,, وعنداك تقوليهم راها حاملة تا تشوف واش يتقاد معاهاا

عزيز تنهد وحرك راسو بأه  ورجع دخل لصالة كاره الوضعية مي ما له من حيلة  حطو العشا وتعشاو فصمت تا كملو الماكلة وتجمعات الطبلة  وحنحن عزيز ونطق

:  هادي غلطة ومنبغيهاش تعاود غنديرو بوجد واليديك هاد المرة ونردوها ليك مي لا رجعنا لنفس المشاكيل راه كون على يقين عمرها تعاود ترجع ليك واخا تزدا السما مع الارض

عز العرب حس بديق من هاد الضغط فنما كيبغي يدوي كينغزو باه لا يزبلها ونطق : غلطة ومتعاودش راه دخلو بيناتنا وصافي....

&&&&&&&&&&&&&