_: الدُنيا تلاهِي، وأنَا اتلهِيت فِـ عيونَك ♡"
" كنت بسقي الورد بتاعي الجوري اكتر انواع الورد اللي بحبها لما سمعت الجمله دي بصيت علي الشخص اللي في البلكونه اللي جنبي وهو ماسك تلفونه وتقريبا بيكلم حبيبته ومديني ضهره"
_ ربنا يخليكوا لبعض باين عليك بتحبها اوي ..
" لفلي ونزل التلفون من علي ودنه وكانت أول مره اشوفه فيها كان شاب بغمازات باينه من غير ما حتي يضحك باينه وهو بيتكلم انا بقع في حب الغمازات اكتر ما بقع في حب الناس والله"
رد عليا وهو مبتسم _ ايوه بحبها اوي معرفهاش من مدة طويله بس وقعت في حبها ..♡
" كان بيقولها وعينه بتملع بنظرة حب حقيقه اتمني حد يحبني كدا "
رديت عليه وأنا برده مبتسمه _انا اول مرة اشوفك عموما انا اسمي ريم لو احتاجت اي مساعده..
بصلي بهدوء ورد _ وانا عمر اتشرفت بمعرفتك يا انسه ريم مش انسه برده ؟!
" انا مش متوعده اني اتكلم مع شباب أو حتي نص كلمه بخاف منهم بس عمر كان غريب كان شخص مريح نظرة عنيه مريحه وملامحه فيها حنية اللي هو عايزه تفضلي باصه عليه كنت منجذبة لملامحه""
رديت عليه وأنا بسيب المايه بتاعت الورد _طيب عن ازنك عشان ورايا شغل..
_انتي بتشتغلي ولا بتدرسي ؟!
_لا انا متخرجه وبشتغل هنا في شركه عقارات ..
"كنت بتكلم بتوتر وهو لاحظ دا "
رد عليا _ انا اسفه اسألتي كتير .. علي العموم انا هنا اهو لو احتجتي اي حاجه ..
" اخدت بالي وهو بيتكلم من مس*دس في جنبه اي دا ايعقل طلع قتال قتله عشان كدا بيسأل عني هيقتلني يماما"
سألته بسرعه_ اي المس*دس اللي في جنبك دا؟!
"لفلي بهدوء وكأنه اتفجأ من سؤالي ومن نبره صوتي اللي كان باين عليها الخوف وبص علي المس*دس لقاه"
رفع عينه ليا وقالي بهدوء_* متخافيش انا ظابط وطبيعي يكون معايا ولسه كنت جاي من شغلي عشان كدا..
" اي دا الله ظبوطه مش قتال قتله لا دا أنا أحبك بقااا. "
_ اه أنا اسفه بس اتخضيت لما شوفته...
ضحك وقالي_ اخدت بالي من غير ما تقولي ..
ضحكت بأحراج _ طيب عن ازنك يلا سلام ..
_ سلام..
*******
ثم تُدرك أن عظمة المحبةِ، أن تَجد
من يراعي مخاوفك؛ يحتويها مُتفهمًا، ولا يُضاعفها.-♡
" رجعت من الشغل كان الوقت اتأخر وكنت جعانه وسوق العبيد اللي انا بشتغل فيه مكنش لسه نزل المرتب منهم لله فضلت ادور في البيت علي اي حاجه أكلها وملقتش كنت عامله حسابي أن القبض هينزل انهارده واجيب طلباتي بس للاسف "
طلعت البلكونه وكنت بكلم وردتي_ انا جعانه ومش لاقيه اكل اعمل ايه دلوقت والمرتب منزلش ........ انتي مش بتردي عليا ليه؟!
_ هتفرحي لما ترد عليكي يعني...
" صرخت اول ما سمعت الصوت دا جنبي كان هو عمر اكيد مش الورده يعني "
رديت عليه برعب _ حرام عليك خضتني هو الواحد ميعرفش يتكلم مع وردته ...
رد عليا هو بيضحك _ طيب كنت عايزها ترد عليكي في ايه؟!
_ مش في حاجه عادي يعني..
" لا طبعا اكيد مش هقوله اني كنت بقولها اني جعانه وعايزه أكل"
بصلي بنص عين كدا وقالي_ متأكده؟!
_ اه ثم انت ازاي تقتحم خصوصياتي انا ووردتي مش يمكن بقولها سر...
" ضحك بصوت عالي ضحكته كانت حلوه اوي تخطف القلب كدا خطف بس اختكوا استرونج ميأثرش فيها الحاجات دي.....لا يجماعه انا كدابه انا وقعت في ضحكته والله خلاص"
بعدها سكت واتكلم وهو مبتسم_ اسف مش هقتحم خصوصياتك انتي ووردتك تاني...بقولك اي انا جعان بس مش عارف اكل ايه تفتكري أكل اي ؟!
" بصيتله ومردتش عليه عشان قفشته خلاص اللي مش محترم دا"
سألته ببرود _ انت سمعتي وانا بقولها اني جعانه صح؟!!
بصلي وحط أيده علي رقبته بأحراج_ بصراحه سمعتك بالصدفه بس فعلا انا جعان مش عارف أكل مع مين تأكلي معايا بالمره...
_ لا شكرا انا عايزه انام اصلا تصبح علي خير ...
" كنت لسه همشي لما ندالي "
_ ريم انا جعان وعايز حد يأكل معايا بطلي رخامه..
" كان بيبصلي بنظرة كأنه بيترجاني فيها اني اوافق وانا كمان كنت جعانه وبطني بدأت تعمل اصوات من كتر الجوع "
عملت نفسي بفكر ورديت عليه_ بس بشرط هدفعلك الحساب لما اقبض....
" رد عليا وهو قالب وشه"
_ ماشي ياستي موافق بس يلاااا...
_ طيب يلا اطلبلنا..
_ ثواني هو في الطريق اصلا..
"بصيتله باستغراب اللي هو اي دا كيف يعني "
رد عليا بهدوء_ ما هو بصراحه انا طلبت ومخدتش رايك وكنت هجبرك تأكلي بس قولت من باب الاحترام برده اديكي برستيجك..
_طب تصدق بقا اني مش واكله كل انت لوحدك ها ...
_ كنت قايمه لما هو قالي _ يابنتي انتي جعانه والشركه اللي منها لله منزلتش قبضك لما تقبضي اديني الفلوس وخلاص اقعدي واستهدي بالله ...
", الواد دا عنده قدرة في الإقناع رهيبه اقنعني بصراحه"
_ معلش سؤال هو انتي والدك ووالدتك فين؟!
_اقتحام خصوصيه كدا عيني عينك بس علي العموم انا مش من القاهره انا من محافظه تانيه بس جيت هنا عشان فرع الشركه اللي في محافظتي بتتجدد فبعوتنا هنا وانا جيت هرجع تاني لما التجديد يخلص واهلي موجودين ربنا يخليهوملي بس انا قررت ابقي استرونج اندبندد وومن هما عمرهم ما يقصروا معايا بس أنا اللي اخترت كدا بس الحمد الله طلعت كتكوت ضعيف وجعان وبس ياسيدي هي دي حكايتي ....
"انا من النوع اللي مش بياخد علي الناس بسرعه اصلا ودا واضح اصلا واضح ولا مش واضح ماما دايما تقولي متحكيش للناس كل حاجه بس اناا مش بيتبل في بوقي فوله انا بحب الناس وبحب اتكلم معاهم اي في أي"
اتكلم وهو مبتسم _ شئ جميل انك تعتمدي علي نفسك حبيت ثقتك في نفسك .♡
رديت عليه وأنا بضحك_ شكرا علي ثقتك الغاليه + انت بقا ايه حكايتك؟!
_انا ياستي من القاهره عادي جدا ووالدي ووالدتي عايشين بس انا اللي قررت انفصل عنهم واعيش في مكان لوحدي..
سألته باستغراب_ اي دا لي؟!
_ انا والدي كان ظابط برده وللاسف كان أب صعب شويه حاطط تعليمات في البيت لازم كلنا نمشي عليها ومينفعش دا ودا غلط ودا عيب مكنش مقدر ابدا أني شاب ومحتاج اعيش حياتي عادي حتي اني كان نفسي ادخل هندسه ورفض ولما انا رفضت ادخل شرطه سحب ملفي ومكنتش عارف اقدم لحد ما ناس كتير كلمتني اني اسمع كلامه وان الشرطه مستقبلها حلو ومش عارف ايه واستسلمت للأمر الواقع وقدمت شرطه بس قررت من ساعتها اني انفصل عن البيت بروح زيارات ليهم علطول بس الاكيد اني مش هقدر اعيش مع والدي في مكان واحد وبس ياستي هي دي حكايتي برده.....
_ طيب ولحد دلوقتي محبتش الشرطه برده!!
_ للاسف يريم اللي بيدخل حاجه بالإجبار عمره ما يحبها بس خلاص اتعودت عليها وبحاول احبها ..
" كان بيتكلم بحزن قطع قلبي اه والله "
_ اوحش حاجه فعلا في الدنيا أن والدك يقولك لازم تطلع كذا من صغرك حتي لو دا مش هدفك أو يفضلوا يزنوا عليك أنك لازم تبقي دكتور؛ مهندس ؛ ظابط اي حاجه من دول لمجرد أن مجتمعنا زرع فينا أن هي دي كليات القمه غير كدا يبقي انت فاشل وملكش لازمه مجتمع تفكيره عقيم للاسف ...
رد عليا وهو مبتسم _ اي دا بسم الله ارقيكي....
رديت عليه بضحك_ لا مفيش داعي هذا من فضل ربي ..
" ضحكنا احنا الاتنين لحد ما الباب بتاع شقته خبط قام يفتح ورجع بالاكل اول ما شميت ريحه الاكل كنت هنط في البلكونه بتاعته بس لازم اكون اعقل من كدا ميصحش طبعا"
_ اخيرا وصل ..
" قالها وهو بيمد أيده ليا بالاكل وبيبتسم"
رديت عليه وأنا بضحك_ المهم أنه وصل ..
" فتحنا الاكل وقعدنا نأكل ومحدش فينا بيتكلم انا بصراحه كنت جعانه اوي ومش بعرف اتكلم وأكل في نفس الوقت هي حاجه واحده اللي اعملها "
_ البيتزا عجبتك؟!
" سألني السؤال وانا الاكل في بوقي شاورلته يستني وارد عليه مش فاهمه ازاي حد يسأل حد وهو بيأكل مش أسلوب دا "
رديت عليه بأبتسامه_ اه جميل اوي شكرا..
بصلي وابتسم _ اهم حاجه أنه عجبك..
" كملنا أكلنا وخلصنا وكان يوم بالنسبالي خلص عشان كنت عايزه انام جدآ"
قولتها وانا بقوم من علي الكرسي _ طيب يا استاذ عمر استأذنك انا عشان عايزه انام تصبح علي خير..
_ وانتي من أهله يلا انا كمان هروح علي شغلي ...
بصيتله باستغراب _ اي دا دلوقت الساعه داخله علي 2
رد عليا وهو بيضحك_ ايه القسم بيقفل بدري ولا اي؟!
" بصيت شويه بفكر في كلامه هل القسم بيقفل فعلا اي ادا ايعقل!!"
رديت وانا بضحك _ طيب بالسلامه انت يافرج ياخويا .
_ ماشي سلام.
_ سلام
" كل واحد فينا قفل بلكونته هو نزل وانا دخلت نمت اول ما حطيت رأسي علي المخده جبت الصبح والمنبه رن جنبي "
قولت وانا بقوم من علي السرير _ اوحش حاجه بعد الصحيان بدري انك تصحي اصلا ...
" قومت اخدت دش وصليت وغيرت هدومي ودخلت لورودي حبايب مامي عشان اسقيهم قبل ما انزل شغلي "
_ صباح النور علي البنور يا احلي ورد ...
_ صباح النور..
" اتخضيت وبصيت جنبي لقيت عمر واقف وفي أيده كوبايه قهوة وباين عليه لسه جاي من الشغل بتاعه "
رديت عليه وأنا مخضوضه _ والله هتقطعلي الخلف في مره مش معقول ينجم كل خضه أعظم من اللي قبلها..
رد عليا وهو بيضحك _ اعتبري الورد هو اللي رد عليكي مش انا...
" ضحكت علي كلامه وسألته_ باين عليك لسه جاي من الشغل؟!
_ بصراحه لا مزوغ من الشغل الساعه دي...
رديت وانا بمثل الصدمه علي وشي _ معقول ظابط مزوغ لا مش مصدقه دا الوالد لو عرف هيحصله جلطه...
_ يابنتي مفيش غير الظباط اللي بيزوغوا اصلا ....الوالد نفسه كان بيزوغ جات علي قرمط الغلبان يعني....
" كان بيقول كدا وهو بيشوح بأيده علي اساس مش هامه يعني "
رديت عليه وأنا بضحك_ قد اي انتوا عيلة عظيمه ..
" ضحكنا احنا الاتنين وبدأت اسقي الزرع بتاعي لحد ما تلفوني رن بينبهني اني لازم اتحرك علي الشغل"
_ بقولك اي ياعم المزوغ انا ماشيه عشان ورايا شغل يلا ارجع شغلك انت كمان سلام..
رد وهو بيتاوب _ شغل اي بقا انا داخل انام...
_ الشرطه في خدمه الشعب فعلا انتوا مش بتكدبوا...
" نزلت ركبت اتوبيس الشعب هو احنا لينا غيره كان في بنت قاعده جنبي وتقريبا بتكلم حبيبها أو خطيبها انا مش فضوليه خالص علفكرا بس هي اللي صوتها كان عالي اسد وداني انا يعني "
_ يعني اي هتسبني عشان بنت لسه عارفها من شهر وانا وانت بقالنا سنتين وانا مستنياك وبقول ظروفه صعبة ومش هتعرف تيجي تتقدملي دي اخرتها؟!
" البنت كانت بتتكلم بعياط وقهرة كانت باينه في صوتها وجعتني ووجعت قلبي وللاسف الشاب قفل في وشها السكه من غير حتي ما يرد عليها "
قولتها وانا بطبطب علي رجليها _ صدقيني ميستهكليش اللي يبيعك مرة يبيعك الف مرة انتي ربنا نجدك من شخصية سامة زيه ...
" لقيت البنت اترمت في حضني وكأنها كانت مستنيه حد يطبطب عليها أخدتها في حضني وفضلت أهديها لحد ما وصلت لمكاني اللي لازم انزل عنده ..
قولتلها وانا بستعد عشان انزل _ صدقيني ربنا شايلك الخير مع شخص تاني احمدي ربنا ..♡
قالتلي وهي بتحاول تبتسم _ شكرا ..♡
" نزلت من الاتوبيس وانا في بالي انا كمان ممكن ابقي شخصيه سامه بين عمر وحبيبته اني اكلم عمر واقرب منه غلط هو بيحب عنده حبيبه في بينهم احلام بيبنوها مع بعض انا مش هقدر اهدمها ولا هقدر اكسر قلبها انا مش هقبل وبالذات أن بدأ يبقي في مشاعر انجذاب من ناحيتي ليه انا غلطت ولازم ابعد "
فضلت افكر طول ما انا في الشغل دخلت بيتي ولقيت نفسي في البلكونه علي اساس اني بشوف الورد بتاعي وزي ما توقعت لقيته في البلكونه بتاعته كان ماسك تلفونه"
_, اتفضل فلوسك...
اتخض وبصلي _ الناس بتقول مساء الخير مش اتفضل فلوسك ...
اتكلمت بحده_ انا قبضت ورجعتلك فلوسك ياريت تاخدها زي ما وعدتني انك تأخدهم...
بصلي باستغراب_ ريم انتي كويسه في حاجه مزعلاكي؟!
_لا انا كويسه الحمدلله اتفضل لو سمحت فلوسك ...
" كنت بتكلم وانا بحاول مبصلوش وهو كان مستغرب اسلوبي وحدتي اللي بتكلم بيها واخد الفلوس بهدوء "
" دخلت وفضلت قاعده مكنتش عارفه انام عقلك لما يتحكم فيك يحلف أنه مش هيحلك خلاص غير لما ينكد عليك "
*****
"تاني يوم الصبح بقفل باب شقتي ومردتش ادخل البلكونه عشان مشوفوش أو يواجهني تاني لقيته قدامي لابس لبس البيت باين عليه مرحش الشغل اصلا وساند علي الترابزين بتاع السلم لما شافني اتعدل"
سألني بهدوء _ متأخره عشر دقائق علي معادك ومسقتيش الورد بتاعك ممكن اعرف ليه ولا هو عشان لا ليه قريب ولا حبيب متسقيهوش ؟!!!
" بصيت عليه وكنت بحاول مضحكش وفعلا حاولت امشي و اتجاهله بس لقيته وقف قدامي"
وقالي بهدوء _ مالك هو أنا عملت حاجه ولا دي هرمونات وهتروح لحالها؟!!
رديت عليه ببرود_ لو سمحت سيبني انزل انا متأخرة..
كانت عينه باين عليها الغضب وقالي بصوت عالي_ والله ما انتي نازله من هنا غير ما تقوليلي مالك ومتغيره من ناحيتي لي؟!!
_بصيتله بهدوء_ بقولك ايه ما تروح تكلم حبيبتك ..
_ بصلي باستغراب وسألني بخبث _ هو دا اللي مغيرك؟!
_ رديت عليه بهدوء _ استاذ عمر انا وانت مينفعش نتكلم لازم نحترم حبيبتك وان ممكن يحصل مشكله بسببي وانا عمري ما هقبل اني اكون طرف في مشكله بينك وبينها وبعدين طلاما عايز حد تتكلم معاه اوي كدا روح اتكلم معاها ....
" فضل باصصلي كل دا وهو علي وشه ابتسامه مكنتش فهماها ونظرة حب خوفت منها "
رد عليا بهدوء وهو مبتسم _ هو أنا مقولتلكيش انا عمري ما كان عندي حبيبه اصلا ...
رديت عليه وأنا رافعه حواجبي _ ازاي يعني اومال اول مره شوفتك فيها وكنت بتغازل بنت كنت بتغازل مين سور البلكونه مثلا...
رد عليا وهو بيغمزلي_ لا كنت بغازلك انت يا جميل.♡
", فضلت مبلمه شويه ومش مستوعبه الكلمه اللي هو أنا بيتقالي الكلام دا ولا مين هو خير اي اللي بيحصل؟!"
كمل بهدوء ونظرة كانت مليانه حب _ انا عارف عنك كل حاجة معاد صحيانك ومعاد رجوعك من الشغل ومعاد سقيك للورد بتاعك وانك بتحبي اسم يونس اوي وكمان اكتر اكله بتحبيها .."
"رديت عليه وأنا مش عارفه اجمع كلامي_ انت ازاى عارف اني كل حاجه ازاي في يومين بس؟!!
رد عليا وهو بيضحك _ يومين؟! انا بقالي شهر مليش شغلانة غيرك من ساعت ما شوفتك بتتكلمي مع الورد بتاعك وبتشكيله من الحرباية اللي معاكي في الشغل وبراقبك من بعيد لبعيد لحد ما حفظت تفاصيل يومك كله ...
رديت عليه بصدمه _ عمر... انت ازاي؟!
رد عليا بهدوء وحب _ ريم واقعة في حب الورد وعمر واقع في حبها والله ..♡
"مكنتش عارفه اجمع كلامي الصدمه كانت كبيره عليا انا في حد حافظ كل تفاصيلي كدا زي ما طول عمري بحلم انا مش مصدقاااااااه..انا عايزه اعيط من الفرحه بيحبني انا بحلم ولا يكونش بحلم.."
مسك ايدي وبص في عيني وغمزلي في الاخر وقالي_'" ملقتش ونس للعُمر أحسن منك يا غزالتي ما تتجوزيني ونجيب الواد يونس" 🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🤎🌴 .
# ريم_خالد 🦌🤎
اللي يقرأ يعملي فولو متنسوش 🤗♥️♥️
