وحشتيني
كلمة حلوة في بداية اليوم كفيلة تحسسك بالسعادة و كمان لما تكون من حبيب بتبقى مسكرة كده و يا سلام بقى لما تكون من يونس
جوازي من يونس مكانش عن حب ممكن نقول صالونات في الأول كنت رافضة زي أي بنت نفسها شريك حياتها يبقى هو حبيبها تمسكه بيا كان سبب في إني أفكر في الموضوع بشكل مختلف مش كل حبيب يصلح زوج و مش كل زوج يصلح حبيب أفكاري كانت متناقضة صليت استخارة و كانت أول جملة اسمعها الحب هيجي بعد الجواز بالعشرة و المعاملة الحسِنة كانت من ماما قولت ليه لأ يمكن هو نصيبي
_قهوة؟
يونس بحب: طالما من الإيدين الحلوين دول ف ليه لأ
كنا قاعدين في البلكونة في جو جميل مع نسمات الهواء و الحب اللي بدأ ينمو جوايا ليه و مع أول رشفة
يونس : يااااه الإنسان حاسس إنه مش بيشرب قهوة في الشغل ما تحني علينا بالوصفة يا مزموزيل
ضحكت بكسوف دي مجرد قهوة لكن هو دايمًا شايف أصغر حاجة بعملها جميلة تقديره ليا بيحسسني بالفخر و إني عملت إنجاز
يونس بخوف : مالك يا يارا مالك يا حبيبتي بتعيطي ليه
هقوله إيه أنا دلوقتي أقوله إني حرقت الأكل و هو لسة مكلمني و قايلي إنه هيموت من الجوع و لا أقوله إني فشلت أكون ست بيت شاطرة و لا أقوله إني مقدرتش أنفذ أول طلب يطلبه من أول جوازنا
يونس بخوف: طيب حاسة بإيه ننزل المستشفي ط..طيب ردي طمنيني
قلقه و خوفه كان كفيل يزيد من عياطي بس كنت لازم أرد مينفعش أشوفه كده و أفضل ساكتة
_ أ..أنا فاشلة
يونس: ليه يا حبيبتي بتقولي كده ده أنتِ أجمل بنوتة في الدنيا
ببكاء_ يونس أنا حرقت الأكل و أنت جعان أنا فشلت ف إني أنفذ طلبك
يونس بتنهيدة طويلة: كده تقلقيني عليكِ أنا أصلًا كنت جاي أقولك نخرج نأكل برة إيه رأيك
_ يعني أنت مش زعلان
يونس: أنا أقدر أزعل منك يا جميل يا مسكر أنت
بكسوف_ يونس
يونس: عيونه واللّه
حِنين لأ هو فاق الحنان بمراحل
يونس: وردة ل أجمل وردة في حياتي
بفرحة: اللّه يا يونس دي ليا أنا
يونس: و أنا ليا مين غيرك يا وردتي
وردتي .لقب جميل يشبه جماله حبيته...أه حبيته بيعمل كل حاجة أي ست بتتمناها حنين لطيف و الأجمل من ده إنه مسكر كده
كنت قاعدة قدامه و سرحانة في ملامحه و تفاصيله اللي بتخطف قلبي قررت أصارحه ما هو مش معقول الإنسان هيفضل كاتم حبه ل قرة عينه كتير كده
_يونس
يونس بحب: نعم يا قلب يونس
_ أنا بحبك
يونس بفرحة: ياااه الإنسان ما صدق إن صبره جيه بفايدة اه واللّه
بضحك _ يا سلام و أنت بقى مش عاوز تقول حاجة كده و لا كده
يونس: عاوزاني أقول إيه
بغضب_يونس
يونس بضحك: نعم يا وردتي
_ هو الراجل كده مجرد ما الست تقول بحبك يتغير 180 درجة
يونس: حيلك حيلك ده الراجل اللي قدامك دايب فيكِ و أنتِ عارفة كده
_ أحب أسمعها
يونس: يونس بيحبك يا وردتي
وقتها ظهرت قدامي جملة ماما " الحب هيجي بعد الجواز بالعشرة و المعاملة الحسِنة "
#بسنت_قاسم
