_يعني إيه موافقة تبقي الزوجة التانية
أحيانًا..لا مش أحيانًا دا معظم الوقت الحياة بتحطنا في اختبارات يا تطلع منها ناجح يا راسب مفيش خيار تالت..كل اللي علينا إننا نتقبل ده علشان نعرف نتعايش مع الوضع بقبول.
_موافقة يعني قابلة إني أتزوج حمزة
مهمة صعبة جدًا إنك تحاول تقنع حد بحاجة أنت شايفها صح وهو معترض عليها بس في النهاية لا لليأس.
_أنتِ واعية لخطورة قرارك ده عارفه إيه هي عواقب أنك تبقي الزوجة التانية عارفه الموضوع ده هيأثر عليكِ بالسلب قد إيه!! عارفه ولا مش عااارفه
_بابا أنت عارف الظروف
_في داهية الظروف اللي تخليني أجوزك بالطريقة دي يابنتي دا عنده ولد متجوز وعنده ولد
اتنهدت بتعب تعب خد كل ذرة راحة ليا ومسكت ايده واتكلمت بهدوء
_أرمل..أرمل وعنده ولد عمره سنتين وأنت عارف إن محدش هيقبل بيا زوجة وأنا كدا
كان لسه هيعترض وبان كدا على وشه بس كملت كلامي
_أنت عارف من بعد الحادثة وأنا فقدت أغلى شيء ممكن يخليني مبسوطة فقدت نعمة إني أكون أم الإحساس بأمومة محستهوش غير مع زين الصغير أرجوك يا بابا متحرمنيش من إني أكون سعيدة أرجوك
عيطت وعيط على عياطي ضمني ليه وطبطب عليا بكل حنية العالم وقالي
_وأنا موافق يا حورية موافق يابنتي
في حضنه بلاقي حنية العالم زي ماما الله يرحمها كانت بتقولي..
عدا يومين وفي اليوم التالت بابا قعد مع حمزة علشان يتفقوا على كل حاجة وقررنا إنه يكون كتب كتاب علطول.
حمزة ساكن في الدور اللي فوقنا بقاله سنة ونص أول ما جم هنا كان هو وحبيبة مراته وزين لسه صغير دايمًا في حالهم، مش بتوع مشاكل ولا غيره راجل يعرف ربنا كويس وأنا مش عايزه أكتر من كدا.
حضرت شنطة هدومي علشان أخدها معايا وأنا طالعة بعد كتب الكتاب متوترة شويه بما إنها حياة جديدة عليا وأول مرة أتجوز
حورية..عندي 24 سنة خريجة علوم كنت بشتغل في معمل تحاليل وأشعة بس دلوقتي هتفرغ لزين ودا أحب شيء على قلبي.
"بارك الله لكما وبارك عليكما وجمع بينكما في خير"
الحب.." كلمة كله بيبني حياته عليها بس من وجهة نظري دا مبدأ غلط ممكن تحب شخص وميحبكش شخص يحبك وأنت متحبوش علاقات كتير خلصت بسبب "حب من طرف واحد" حاجة بتوجع القلب وبعد ما كنت شايف إن الحب أساس لكل حاجة في الحياة بقيت مبتشوفش حاجة أوحش منه..علشان كدا دايمًا وعلطول في حاجات أهم من الحب أولويات تستحق لقب أولوية فعلًا.
