كانت بتبص للبحر وقالت : زعلانة .. زعلانة من نفسي علشان وحشني
_ و انا زعلان إنك زعلانة علشان وحشتك
لفت بصدمة وقالت : أنت رجعت !!!
مسك ايديها وقال: حقك عليا
سحبت ايديها وقالت بعياط : مش عايزة اسمع صوتك مش عايزة اشوف منظرك ابعد عني .. ابعد زي ما بعدت يوم الفرح
مسح دموعها وقال : بصي اشتميني هزقيني أعملي اللي انتي عايزاه أنا استاهل ضرب الجزمة والله
بصتله بعتاب وقالت : مين قال اني هعمل كل ده ! مش هتلاقي مني غير الصمت
جرت بسرعة و جري وراها بس كانت اختفت ..
بص بصة اخيرة للموج و هو بيضرب ف البحر وقال : هفضل وراكي لحد ما تحني عليا .. حتي لو فضلتي تضربيني زي ما الموج بيضرب البحر كده
فلاش باك ^^^
قالت بعيون فرحة : عمران حقيقي مش مصدقة ان خلاص كمان كام دقيقة و هسمع جملة بارك الله لكما و الجملة دي هتكون لينا
رد بإبتسامة خفيفة : و انا كمان فرحان اوي
سكتت شوية و قالت : هو انت مش فرحان إننا هنكون مع بعض دايما !
اتخض و قال : هاا .. ايه الكلام ده .. مين قالك كده بس
بصت بحزن وقالت : عينك ..
قال بتوتر : مالها
عيطت و قالت : ولا حاجة
يلا يا ولاد المأذون جه
بارك الله لكما وبارك عليكما وجمع بينكما في خير ..
باك ^^^
قالت ببكاء : جاي يصالحني بعد ايه .. بعد ما كسرني .. مفكر ان خلاص كده هصفاله و ولا يهمك و يلا نرجع
حبيتك حب كبير أوي .. أوي لدرجة اني يمكن حبيتك اكتر من نفسي
و يمكن ده كان غلطي الوحيد ..
لو انت فوقت لغلطك ف انا فوقت لغلطي يا عمران ..
______________
دخلت امها الاوضة و قالت
_ ذكري
_ نعم يا حبيبتي
_فيه برا حد عايز يشوفك و أبوكي قالي ادخل اناديكي ضروري بسرعة
_ حد مين ده ! و ضروري و بسرعة مع بعض !
_ مش وقت أسئلة اطلعي وشوفي
_ استني طيب أغير
_ لا عادي اطلعي كده دي ست قريبتنا أوي
ضحكت وقالت : ربنا يستر الواحد مش مطمن
خرجت و كانت لابسة سويت شيرت اوفر سايز علي بنطلون ليجن و فاردة شعرها القصير بطريقة قمر
