_وهج يلا اقرأي علشان أشوف الaccent بتاعتك.
رفعت عيوني وبصيت على البورد فلقيت جمل ملزقة جامد، اتكلمت وأنا عيوني في الأرض:
_سوري يامستر مش هقدر أقرأ الجمل دي
سكوت عم المكان بعد جملتي دي أنا دلوقتي في كورس الإنجليزي وكلهم بيستغربوا مني لأني دايماً ساكتة ومش بتكلم مع حد أول يوم أحضر فيه الكورس أول لما دخلت من الباب كلهم ضحكوا عليا وبصولي بقرف لأني منتقبة فاكرين إن المنتقبات والمختمرات جهلة أخدت جنب وبدأت أركز في اللي أنا جاية له وبس
_وهج يلا اقرأي
دي كانت جملة مستر جاسر وهو باصص ناحيتي مستنيني أقرأ رفعت راسي وأخدت نفس عميق
_مستر جاسر غير الجمل لو سمحت جيب ليا جمل زي اللي اتمسحت دلوقتي
عقد حواجبه وصوت الهمز واللمز علي في القاعة ضميت إيدي جامد ومسكت طرف الخمار أستمد منه شجاعتي وأنا قلبي دقاته عالية جداً لقيته قرب مني بخطواته الواثقة وهيئته اللي تخطف أي حد نزلت عيوني بسرعة لأجل إني أحمي قلبي عشان أفضل محافظة عليه للشخص اللي يستاهله مش عوزاه ييجي يلقاه مستخدم وتم إستهلاكه ويكون بقايا قلب مش قلب
_وهج ارفعي راسك وبصي للجمل واقرأيها
ابتلعت ريقي وحالة العناد تلبستني
_لا يامستر الجمل دي قليلة الأدب هات جمل عادية وأنا هقرأ عادي
ابتسم وكلهم ضحكوا وأنا أدركت اللي أنا قولته بس بعد فوات الأوان لازم الإنسان مننا قبل مايتكلم يكون عادد من واحد لعشرة في عقله لأجل السلامة وأنا معملتش كده بس أنا مش غلطانة وأنا صاحبة حق وصاحب الحق دايماً عينه قوية جمل زي I love you و I wanna you أنا أتكسف أقولها ولأنها كلها l و N و you فتلقائي هيكون فيها خضوع بالقول
يعني أعمل إيه أخليها تنطق وهج بنت أم وهج بإسمها الغريب ده من ساعة مادخلت أول يوم القاعة وأنا فيا شيء اتحرك ليها بس هي جامدة جداً ومفيش مجال نقاش أو فتح كلام معاها ودي نقطة تُحتسب لها عندي ومخلياني واقع فيها بالقوي وبعد جملتها اللي قالتها دي كان نفسي أخدها في حضني وأضحك معاها بس معلش كل شيء بأوانه كويس قريب جداً جداً هتكوني في عالمي ياوهج عالمي...
_مش عاوز أسمع صوت المفروض إن إحنا متحضرين وعارفين آداب الحوار كويس وإن كل واحد له رأيه ورغبته يعبر عنهم زي مايحب
مسحت الجمل اللي أنا حاططهم عشان أشوف موقفها بس عجبتني عجبني رد فعلها وشخصيتها القوية كتبتلها فقرة كبيرة تانية وابتدت تقرأ وبعد أول جملتين وقفتها صوتها في الإنجليزي حلو ويخطف أي حد وأنا مش هخلي أي حد يبصلها أصلاً
_الأخ اللي ورا اللي في ملكوت تاني ركز معايا يابيه
قولت كده لما شوفته بيبصلها بصة إعجاب إحنا الرجال بنفهم نظرات بعض جداً حسيت بحالة غريبة جداً أول مرة أحسها، دمي غلي وحسيت بجسمي عبارة عن كتلة نار هتحرق أي حد، بدأت أسرع في شغلي عشان تمشي خلصنا وقامت أول واحدة خرجت نفسي أشوف ملامحك ياوهج نفسي
خرجت ركبت عربيتي وطلعت على عنوان بيتها وطلعت لوالدها أخدت منه ميعاد وهو كان مرحب جداً بالفكرة عدى أسبوع وجه اليوم اللي هروح فيه أنا وإخواتي الإتنين ميار ويوسف يوسف الكبير وميار الصغيره أنا اللي في النص مش قادر أوصف حالة قلبي دقاته سريعة ومرتبك وحاسس بتقلصات في معدتي والبسمة مرسومة على وشي إيه الحالة دي يمكن دا الحب اللي بيقولوا عليه اتنهدت وظبطت شعري بإيدي وبعدين رنيت الجرس وفتح ليا أخوها دخلنا وجه وقت الرؤية
_ممكن بس بعد إذنك يايوسف تيجي معايا البلكونة؟
دا كان طلب وليد أخوها ابتسمت وأنا مبسوط جداً إحساس إنها ليا لوحدي ومحدش هيشوفها دا خلاني عاوز أطير اتنهدت وأنا بحاول أسيطر على إبتسامتي اللي وشي وجعني بسببها حرفياً
مستر جاسر! أه هو دا هو العريس إحم هو حلو في البليزر ده كده ليه والله لو حد شافني وأنا واقفة ورا الستارة كده لأتفضح مهو بردو أنا مش هعرف أبص له وأنا قاعدة معاه
_وهج يلا تعالي.
اتحمحمت بهدوء قال يعني البت الرزينة بقا وكده خرجت قعدت ولقيت اللي بيتكلم
_البنفسجي إحلو كده ليه؟
ضحكت بهدوء
_ياصلاة النبي على الحلاوة
اتكسفت وبصيت الناحية التانية وأنا مش قادرة أبطل إبتسام، لطيف والقعدة كانت لطيفة واتفقوا على كتب الكتاب بعد شهر الشهر ده البيه منعني إني أنزل الكورس
فرحته يوم كتب الكتاب خلتني بكيت مش هنسى اللي حصل وأنا واقفة ورا نفس ذات الستارة أول لما المأذون خلص وقال أعلنكما زوجًا وزوجة حضن بابا ووليد ويوسف أخوه وسابهم وجالي
_بخ اطلعي بقا من ورا الستارة دي
ضحكت أد إيه أنا فرحانة بيه يمكن لسة محبتهوش الحب الكامل بس مش قادرة أحدد شعوري بيه ماهو ده الطبيعي لأن أي إنسان طبيعي ميقدرش يحدد أو يسمي شعوره في أي علاقة غير بعد أربع شهور من بدايتها حضني حضنه جميل
_اممم أوريكي الaccent بتاعتي أنا، I love you ياوهج عالمي
ضحكت وخرجت برة حضنه ولقيت ماما جهزت لينا أكل وجهزت أوضة الضيوف أخدته من إيده ودخلنا وقعدنا ناكل، أنا مكسوفة بس شعور فرحتي طاغي
_جاسر
_ياقلب جاسر
نسيت اللي كنت هقوله أه والله، عيونه ونبرة صوته وكلامه خلوني توهت من نفسي بصيت له وسكت سكت كتير لأن السكوت في حرم الجمال جمال....
ابتدت تمر الأيام وعوضلي الكورس في البيت كان بيجيلي بعد لما بيخلص كل مرة
_جاسر شوف الaccent في الجملة دي كده
_قولي
_I love you, no no i adore you
لا متفقناش على الغدر ده يابنتي والله العظيم قلبي هيقف
_سيبك بقا من الإنجليزي وسنينه وخلينا في الفصحى قوية وبحبها
_أه فعلاً، أحبكَ ياسيد قلبي ومالك عالمي.
_أيوا كده إنجليزي إيه وبتاع إيه كلام الفصحى كيف والله، أما أنا فقد تخطيت الحب وتخطيت العشق في هواكِ صرت متيمًا ومن خمور عشقكِ أبيت كل يومٍ ثملاً ترفقي يابهية الطلعة ترفقي بقلبي وكفاكِ جمالاً
_أيا ابن القلب أنا غارقة فيك حد النخاع فتنتي وغوايتي في عيني كل الرجال وفي قلبي سيدهم وفي روحي أنت ساكنها وعسى المقام بالمقيم يليق
_تعالي لأضمكِ قرب قلبي ياحبيبة قلبي
لــِ أميرة الأخرس
