-يا تقي اوعي هخسر
نظرت اليه بحزن قائله: ياسين ممكن تركز معايا
اغلق التلفاز قائلا :مالك يا حبيبتي ،فيه حاجه مضايقاكى؟.
تنهدت قائله:ممكن افضفض معاك شويه ؟
قال مبتسمآ: خشي البلكونه هروح اجيب السبرتايه و الفناجين و القهوه و اجي نفضفض.
ذهب الى المطبخ بينما اتجهت هى الى الشرفه و جلست على المقعد و اشعلت الشموع
لتهيئ جو مثالى للفضفضه
دخل ياسين الى الشرفه واضعا ما جلبه وجلس امامها بدأت تقى وضع القهوه و الماء و السكر و اشعل ياسين السبرتايه
امسك ياسين يد تقى قائلا :ها يا حبيبتي مالك.
امبارح كنت عند سمر ، كان فيها حاجه متغيره يا ياسين حاولت اتكلم معاها و اعرف فيه اي و بعد ضغط كتير منى قالتلى انها مش مبسوطه في حياتها و حاسه انها اتسرعت في خطوه الجواز
نظر اليها مستغربا ما قالته ف سمر تحب زوجها و بينهما قصه حب كبيره :ازاى يعنى .
بتقول ان محمد معاملته اتغيرت بيعاملها كأنها قطعة اثاث في البيت بييجى من شغله يتغدا و ينام ولو قالتله اقعد معايا يفضل ماسك تليفونه او يعمل اي حاجه غير الكلام معاها ولو قعد بتشتكيلوا من حاجه او بتتكلم معاه عادى بيقولها انه مصدع و مش قادر يسمع حاجه منها.
-ما يمكن يا حبيبتى عنده مشاكل في الشغل.
-ما انا قولتلها كده بردو بس هى قالت انه ممكن يرغى مع صحابه و اهله بالساعات و ييجى عندها هى ميتقبلش كلام .
-طيب انتى شايفه اي الحل
نظرت اليه مبتسمه بخبث:ان انت تكلمه و تشوف فين مشكلته
فهم ياسين ما تريده تقي :
-اااه.. فاكره يا تقي اول جوازنا قولتلك اي
فأبتسمت :
-قولتلى انا عمرى ما هقبل اهلى ولا اهلك يدخلوا ما بينا، مشاكلنا هتتحل في بيتنا بيننا و بين بعض .
-طيب و عايزانى ادخل ليه بين راجل و مراته .
-يا حبيبى دى اختك وبعدبن انت مش هتتدخل انت هتسمع محمد و هتفهم فين مشكلته ولو العيب عنده هتنصحه ولو العيب عند اختك هقولها عليه
-مينفعش يا تقي نتدخل في حياتهم انتى خلى سمر تتكلم معاه احسن
-مهو انا قولتلها بس هى طلبت منى اخليك انت تتكلم معاه .
-خلاص نبقي نشوف الموضوع ده
ابتسمت تقي بسعاده قائله :
-لا تشوف اي انا هعزمهم على الغدا بكره وانت تاخد محمد و تقعدوا تحت في الكافيه تتكلموا وانا هقعد مع سمر في البيت نتكلم
-ده انتى مجهزه كل حاجه بقي
-طبعا يا بابا هو انا يعنى هعرف اشوف سمر زعلانه و اسيبها .
كان ياسين يشعر بالسعاده لعلاقه تقي بسمر فمن يراهم الان لا يري الجفاء الذي كان بينهم في البدايه ف سمر توأمه لم يعجبها اهتمام اخيها بفتاه غيرها خاصة بسبب تعلقهما ببعضهم لكن تقي اكتسبت صداقه سمر لكنها ايضا عانت الكثير من سمر
في اليوم التالى دق جرس الباب ليعلن عن وصول سمر و محمد فيستقبلهم ياسين مبتسما محتضنآ لأخته التى عاتبته لانشغاله عنها كعادتها فلم تفوت مره إلا و عاتبته دلفت سمر الى المطبخ لتساعد تقي بينما محمد و ياسين ذهبوا الى الصالون الى حين وضع الطعام على الطاوله .
-يعنى هو هيكلمه
قالتها سمر بقلق فردت تقي
تحاول طمئنتها :
-اه يا حبيبتى متخافيش هيكلمه
اقتربت سمر من تقي و وضعت يدها على بطنها وقائله:
-اخبار بنت اخويا القمر اي
فأبتسمت تقي قائله:
-تعبانى ولله يا سمر مبتعملش حاجه غير انها بتضربنى في بطني
فضحكت سمر على تقي وثم قالت :
-هانت كلها ٣ شهور و هتشرفنا و مش هيبقي ضرب بس لا ده كمان عياط و صويت
-هبقي ادهالك مهى بنت اخوكي خدى يلا الاطباق دى و انا هناديهم
ذهبت تقي الى الصالون لتدعوهم الى السفره لكن يظهر عليها التعب فأقترب منها ياسين ممسكأ يداها ذاهبا نحو الطاوله :
-انتى كويسه
فأبتسمت:
-اه يا حبيبى
و قبل ان تبدأ في التهام الطعام قالت:
-يوووه انا نسيت اجيب مايه
اوقفها ياسين قائلا:
-خليكى انتى يا حبيبتى انا هقوم اجيب.
كانت تقي تتابع ذهاب ياسين الى المطبخ بحب فهى تحمد الله بأنه رزقها بزوج يراعيها و يعاملها بما يرضيه
بعد الطعام عرض ياسين على محمد الذهاب معا الى احدى المقاهى ليحتسون القهوه فرحب محمد بالفكره
- انت عامل اي يا محمد
فأبتسم محمد قائلا
-الحمدلله
قال ياسين يحاول ان يخرج الكلام من فمه :
-الجواز حلو ؟
فضحك محمد قائلا:
-مش عارف احدد بصراحه
-ليه كده
-فيه عيوب و فيه مميزات
-اي حاجه فيها عيوب و مميزات الفكره بقي اننا نهتم بمميزاته عشان متروحش و عيوبه نحاول نصلحه عشان منزهقش
-و ده ازاى بقي ؟.
فأبتسم ياسين :
-يعنى عندك انا مثلا يا سيدى بحب الزيطه و الهيصه و الصوت العالى و تقي عكسي تماما بتحب الهدوء و الروقان اول جوازنا كنا هنطلق بسبب ماتش كوره و بعدين اتفقنا ان مفيش فرجه على ماتشات في البيت و ان لما احب اشغل اغانى و اعلى صوتها اسألها الاول عشان لو بتقرأ كتاب ولا حاجه مفصلهاش عن الموود بتاعها
-مهو الجواز ده مليان قواعد و شروط و الواحد بيزهق
-قواعده وشروطه حلوه انت دلوقتى زيك زى اللى بيعمل شركه هتحطوا في بنود العقد اللى يحفظ حقوكم انتوا الاتنين و المميزات بينكم بتبقي متساويه لازم تحترم رأي شريكك عشان تقلل خلافات بينكم عشان الشركه متتفضش
فنظر محمد لياسين و بدا على وجهه الحزن :
-اللى بتتكلم فيه ده لاتنين متفاهمين يا ياسين
-انت فيه حاجه مضايقاك يا محمد
-لا عادى
-لا بقولك اي احنا مش مخطوبين مالك
-تعبت بصراحه من شكاوى سمر على طول بتشتكى مرات اخوك جت عملت كذا مامتك جت قالت كذا شوفت مامتك دخلت الشقه بالجزمه بتاعتها باجى من الشغل تقعد تشتكى بس لدرجه انى اخر فتره بقيت اتعمد اتعامل معاها بلا مبالاه .
-طيب ما تتكلم معاها يا محمد
-اتخانقنا كذا مره كل مره تقولى انت مبقتش بتحبنى انت مش عايز تسمعنى هو انا لو مشتكتلكش هشتكى لمين مش قادره تفهم ان اللى بتشتكى منهم اهلى و انها لازم تشيلهم فوق دماغها زى ما انا بعمل انت قولت مميزات متساويه هى بقى عايزه تمشي كل حاجه على مزاجها
- يعنى كده كل المشكله في اهلك ؟
-لا يا ياسين انا مش مرتاح في بيتى يعنى المفروض ارجع من الشغل تعبان الاقي مراتى قاعده مستنيانى مجهزه الاكل مروقه البيت الدنيا مترتبه و منظمه
-يعنى هى سمر معفنه
-مش معفنه طبعا بس كذا مره اقولها على نوع اكل مبحبهوش اول ما نتخانق على حاجه تافهه تعمله عند فيا مثلا وانت عارف انا عندى OCD بحب كل حاجه متنظمه و في مكانها و هى عشوائيه اوى يا ياسين
-طيب اتكلمت معاها ؟
-زعقتلها كذا مره
-طيب انت مش ملاحظ حاجه
نظر محمد بعدم فهم :
-اي؟
-انكم بتحلوا كل حاجه بزعيق و خناق بتلجأوا للحل اللى يخسركم المميزات انت مش مرتاح في بيتك عشان مفيش مشكله بتتحل فيه غير بخناقه كبيره و انك لما قررت تعالج المشكله قررت تعالجها بتجاهلها يعنى اي تيجى تحكى معاك حتى لو بتشتكى تتجاهلها انت بتحسسها انك فعلا مبتحبهاش يا محمد رغم انى عارف انت بتحب سمر قد اي و عافرت قد اي عشان توصل لأنها تبقي مراتك دلوقتى بقي بتضيعها من ايدك ليه انا مش بقولك الكلام ده على انى اخو سمر انا بقولك الكلام ده على انى صاحبك اللى شافك و انت بتسعى عشان توصلها انا عارف انى لو قولتلك دلوقتى لو مش مرتاح طلقها انت مش هتقدر عشان بتحبها يا محمد و هى كمان بتحبك و انتوا الاتنين معندكوش استعداد تخسروا بعض
-يعنى انت شايف فين الحل
-اتكلم معاها بهدوء يا محمد شوف فين مشاكلكم و عالجها بالكلام و التفاهم و الوعود الصادقه حياتكم هتبقي احسن هتبقوا مرتاحين
-حاضر يا ياسين هحاول اسمع كلامك
دلف محمد و سمر الى منزلهم
-شوفت يا محمد تقي عملت اكل حلو ازاى
فأبتسم محمد قائلا:
-مش احلى من اكلك يا حبيبتي
نظرت سمر اليه بعدم استيعاب :
-انت قولت اي
-مش احلى من اكلك يا حبيبتى
كأنها امتلكت العالم رغم ان تلك الجمله تبدو للرجال تافه لكن تعنى للسيدات الكثير
-انت بتشكر فيا اي التغير ده
-لو مشكرتش فيكى هشكر في مين يعنى
امسك يدها مقربا اياها الى صدره فأردف قائلا:
- معلش يا حبيبتى انا كنت مقصر معاكى الفتره اللى فاتت حقك عليا
فأبتسمت قائله:
-ربنا يخليك ليا يا حبيبى
-تعالى نقعد نتكلم شويه يا سمر ممكن
-ممكن
جلس الاثنان امام بعضهما و بدأ محمد قائلا:
-انا عارف انك متضايقه منى عشان قله اهتمامى الفتره اللى فاتت بيكى و بمشاكلك و عارفانى متغير معاكى و مش زى الاول بس انا كنت مضايق من شكوتك الكتير و مضايق ان الشكوى دى اغلبيتها من اهلى مهو بردو اهلى مينفعش متكونيش حباهم كده وانتى عارفه انى بضايق لو الدنيا مش متنظمه ف ممكن لما انظمها انا متبهدليهاش و تتعاملى بعشوائيه و الاكل يا سمر يا حبيبتى لو بتشتغلى هقول معلش بس الاكل يبقي جاهز بحيث لو عايزين نسهر بره نخرج يا حبيبتى
-يا حبيبى ولله انا بحب اهلك طبعا ما هما اهلى بس انت عارف ان انا حساسه و ممكن اتجرح بأقل حاجه مش اكتر و مش بحكيلك عشان تتخانق معاهم ده بفضفض معاك يعنى لو مش هفضفض معاك هفضفض مع مين و يا سيدى مكنتش اعرف انى كده بضايقك حقك عليا مش هتكلم عنهم كده تانى و بالنسبه للتنظيم ف يا حبيبى انت لو لاحظت كل مره الخناقه بتبقي على عدله الريموت او المخده و بالنسبه بقي للاكل ف اه مبشتغلش بس انت عارف العلاج بينيمنى و هحاول اخده في مواعيد تانيه عشان ميأثرش عليا كده بس عشان خاطرى بلاش تتجاهلنى كده انا حسيت شعور وحش اوى الفتره اللى فاتت بعدم الرغبه و بأنك مبقتش تحبنى و كنت في صراع نفسي رهيب بجد من خوفى اكون خسرتك
فقبل جبينها قائلا:
-انا اسف يا حبيبتى حقك عليا
بدأت تتحسن العلاقه بين سمر و محمد و اصبحا متفاهمان اكثر اصبحت حياتهما هادئه يعم عليها السعاده
-ااااااااااااه
-خدى نفس يا حبيبتى خدي نفس
- مش قادرررررررره
فتدخل الطبيب قائلا:
-خدي نفس يا مدام تقي
و بعد مرور نصف ساعه يعلو صوت صراخ الطفله لينظر كلآ من ياسين و تقي لطفلتهم بدموع و سعاده وها قد نبتت زهرتهم
كانت تقي ترضع طفلتها و تجلس بجانبها سمر تداعب الطفله قائله:
-اسمها حلو اوى بجد يا تقي
فأبتسمت تقي قائله:
-ياسين اللى صمم عليه ولله انا كنت عايزه ايلا
-ايلا ياسين المدني لا يا ستى ورد ياسين المدني احلى
-طيب نفكنا من ايلا و ورد انتى عامله اي
فأبتسمت مع تنهيده :
-الحمدلله يا تقي حقيقي الفضل يرجع ليكى و لياسين في اللى انا فيه محمد اتغير ورجع محمد اللى حبيته بيسمعنى و يطبطب عليا و يتكلم معايا وانا كمان اتغيرت و اي حاجه بتضايقه مبعملهاش حياتنا بقت احسن و بقينا سعدا اكتر
ثم وضعت يدها على بطنها قائله:
-وبقينا اسعد لما سمعنا خبر انى حامل
-ربنا يسعدك يا حبيبتى بجد مبسوطه ليكى ان تستاهلى كل خير
قاطع حديثهم دخول ياسين قائلا:
-انا عايز اخطف وردتى منكم الناس كلها بره مستنيين نطلع يلا يا تقي بقي
فضحكت تقي على زوجها الذى كان يرتدى بذله بيضاء كأنه يوم زواجه قائله:
-طيب انا البس فستان سواريه انا مامتها انت تلبس بدله ليه
-ما انا باباها بردو الله ما تقولى حاجه يا سمر
-اقول اي بس
فأحتضنت ياسين مردفه:
-يتربي في عزك يا حبيبى
فقال مازحآ:
-دي بيقولولها اي دى بقي
فضحك الاثنان على ياسين
خرج ياسين من الغرفه حاملا ورد بيده و ممسكآ بالاخري يد تقي و بدا الجميع الرقص على اغنيه السبوع (حلاقاتك برجالاتك حلقة دهب فى وداناتك)
#تمت
#رحمه_علي
#اتنين_متجوزين
