أنت بتعيط يا خالد؟!
= لا يا ماما مش بعيط..
- والدموع اللِ ف عينك دِ إيه؟
= عادي دخل فيها تراب.
احكيلي يا بني أنا أمك..
بصتلها بحزن وقُلت :خطوبتها كانت النهاردة..
لقيتها بتبسملي وبتمسح على راسي وبتضمني لحُضنها ودِي عادتها لما تشوفني زعلان وبتقولي :
خير يا حبيبي خير والله يا ضنايا مش نصييك مش مكتوبة ليك ربنا هيعوضك بالأحسن منها قوم اتوضَ وصلي ركعتين لله واحمد ربنا على فضله.
= أحمِد ربنا إنه بعد عني الإنسانة الوحيدة اللِ حبيتها؟!
أيوه واسمع كلامي وبعدين أنت لسه قُدامك سنتين وتتخرج يعني لسه بدري على موضوع الجواز والخطوبة دول لسه هتشتغل وتجمع فلوس علشان تشتري بيت تعيش فيك أنت ومراتك وولادك يعني قدامك على الأقل ٥ سنين قولي بقا هي هتستناك ٥ سنين؟ أبوها هيوافق يعلق بنته بيك ٥ سنين؟ سيبها لله وفكر بعقلك أوعى في يوم تسلم نفسك لقلبَك.
...................
" سبع سنين فاتوا على الوجع والألم وكسرة القلب اتفاجأت إنها اتخطبت لواحد صحبي كل ما يشوفني يحكيلي أد إيه هو تعيس معاها ونفسه يطلقها بيحكيلي إنها لا تصلُح زوجة على الإطلاق مُهملة في بيتها وولادها كل همها الخروج والسهرات وحياة مُرفهه حمدت ربنا على اختياره وعلى نصيبي اللِ كتبهولي اتنهدت وخرجت للبلكونة أشِم هوا وفي إيدي كوباية الشاي بالنعناع من إيدين ست الكُل لقيتها جاية من بعيد بتبتسملي وبتقولي :
مش ناوي تفرحني بقَ ولا إيه؟
= أفرحك أكتر من كده إزاي أنا بقيت أشهر مُدرس فيزيا في المدينة كلها والمُدن المجاورة والحمدلله قادر أشتري بيت بحاله وعندي عربيتي الخاصة.
مهو أنت مصحصح أهوه بس ناقص حاجة وفرحتي تكمل.
= مش عايز أتجوز.
ليه؟ دَ أنا جيبالك عروسة إنما إيه تقول للقمر قوم وأنا أقعد مكانك.
= ومين تعيسة الحظ دِ؟
آثار صاحبة آلاء آختك.
= آثار! دِ هبلة!
-بس طيبة والله ومحترمة ومتربية ويتيمة.
= مهو علشان يتيمة مش عاوزها مش عاوز أظلمها معايا، أنا مُعقد ومش هعرف أتعامل معاها هي طيبة وبريئة وأنا عصبي و..
مهي علشان طيبة هتستحملك صلي استخارة ولو خير هقول لأمها.
= اعملي اللي أنتِ شايفاه مش فارق معايا.
.................
لا استحالة أتجوزه ده أنا لما كنت باخد عنده درس ف ثانوي كنت بترعب منه بس كان شرحه حلو الصراحة بس ميمنعش إنه عصبي ومعقد وبيزعق على أتفه الأسباب.
= بس مُحترم وهيحافظ عليكِ وعارفين أصله وفصله.
وعصبي ومجنون.
= خلاص ارفضيه واتجوزي حسام ابن طنطك نهى.
ننوس عين أمه!
= أيوه هو.
يوووووه يا ماما!
= أنتِ حرة واختاري...
يا ماما أنا عيوطة ولو خالد زعقلي هقعد أعيط والتاني أمه ممشياه على العجين ميلخبطوش تحسيهم في مسرح العرايس أمه بتحركه.
= خدي خالد حلو.
هو فعلًا حلو..
= الله!
هصلي استخارة الأول.
.....................
كبرتي أهوه وبقيتي عروسة.
= على أساس إنك مكنتش عندكم الأسبوع اللِ فات ده أنا بقعد عندكم أكتر ما بقعد في بيتنا.
وبقيتي في سنة كام دلوقتِ؟
=إيه السؤال الغريب ده؟! على أساس إني مش قد أختك يعني؟
وأنتِ لما حد يسألك أنتِ ف سنة كام تقوليله قد أختك؟
= يوووه، في سنة تالتة وفاضلي سنة واتخرج.
تمام، فرحنا بعد سنة تالتة إن شاء الله وكتب الكتاب كمان ٣ شهور.
= إيه شُغل الروايات ده؟
أنا مليش في جو الخطوبات ده أنا عندي أخت وبخاف عليها، هنكتب الكتاب كمان ٣ شهور أعتقد كده أحسن.
= طيب! متزعقش وإلا هعيط.
ابتسمت على كلامها وقُلت : طفلة!
=أنا مش طفلة أنا عندي عشرين سنة ونص.
برضو طفلة خلينا في المهم أنا عاوزك تستحمليني أنا عصبي، وجاف في المعاملة.
= هستحملك وأمري لله أحسن من ننوس عين أمه.
قُلتي حاجة؟
= ها! لا ولا حاجة.
تمام الخطوبة كمان أسبوع بإذن الله وكتب الكتاب كمان ٣ شهور.
=ربنا يستر.
..............................................
" يا دبلة الخطوبة عقبالنا كلنا"
مكنش له لزوم نعزم الناس دِ كلها كنا نكتفي بكام شخص وبس.
= لازم الناس كلها تعرف إني خطيبتك.
مش عايز حد يعرف حاجة
= ليه؟
مبحبش حد يتدخل في حياتي ولا حد يعرف حاجة عني، وبطلي كلام شوية خلينا نخلص أنا زهقت من الناس.
