_اتطلقتِ يا أمان؟
_أيوا قال لي أنتِ طالق تلات مرات
_وبتضحكِ؟
_عوزاني أعمل إيه يعني؟ أعيط؟ عيطت كتير جداً ومجابش نتيجة يبقى الأحسن إني أتجاهل ألمي لحد ما أنساه ساعات كتير بيكون التجاهل أحسن حل
أنا أمان بنت كانت أحلامها وردية زي أي بنت فضلت مستنية بطل زي أبطال الروايات ييجي ياخدني لعالم وردي جميل فضلت أشيد في العالم ده في خيالي..
بنت جميلة هييجي الفارس بتاعها يخطفها له واتحققت أمنيتي إنسان وسيم مستوى مادي وتعليمي كويس وانبهرت الأميرة بالفارس بتاعها وقد كان اتجوزنا ومن هنا كانت بداية حكاية بسطرها أهو عشان بنات غيري تقرأها سا.دي بالظبط زي مقرأتوها كده قلت وماله كل أبطال الروايات اللي كده بيتعالجوا لما بيحبوا ويمكن يتعالج ابتديت أشوف أيام وليالي ما يعلم بيها إلا ربنا إهانة وذل لدرجة إني كنت بقعد في المستشفى بالأسبوع تايهة عن الدنيا عدت سنة وابتديت أفوق لنفسي هو أنا هفضل مستحملة الإهانة دي ليه؟ وعشان إيه؟ وكانت أول انتفاضة مني في وشه
_طلقني مادام مفيش منك رجا
_أطلقك؟ لا يا حلوة مفيش طلاق غوري من قدامي واقصري الشر
_طلقني بقولك حرام عليك اللي بتعمله فيا ده
_أنتِ شكلك مش هتجبيها لبر تعالي
وبعدها شهر في المستشفى لأني كنت حامل وسقطت
سيناريو معروف جداً ونهايته أنا اللي لازم أحطها بإيدي دور الضحية والضعف مينفعش يتنفذ في كل النهايات
والدتي ملهاش حد ومش هتقدر له بس أنا هقدر
رفعت دعوة تطليق للضرر وسقطت الدعوة وشفت أيام بعدها شوفت فيها الموت بعنيا وميأستش رفعت الدعوة تاني مرفقة بتقارير الطبيب اللي قدرت أخدها منه من ورا جوزي ولما عرف خاف على مركزه ونفسه من الفضيحة وطلقني واتهدرت جميع حقوقي واتهدرت معاه كرامتي
خارجة من علاقة مدمرة محتاجة شهور وشهور عشان أبني نفسي
الروايات طلعت وهم والواقع أقسى بكتير ومش النهايات سعيدة
اكتشفت كمان إني العالم اللي كنت ببنيه كان من رمل فأول موجة جت خدته في وشها وبقى منه أثر ملوش ملامح زي روحي المتشوهة
"قل يا عبادي اللذين أسرفوا على أنفسهم لا تقنطوا من رحمة الله إن الله يغفر الذنوب جميعًا إنه هو الغفور الرحيم"
يغفر الذنوب جميعًا
فضلت أرددها ورا الشيخ اللي بيقرأ في الراديو وكأنها رسالة ليا، لازم أفوق
_إيه ده يا أمان؟
_مروة أنا حرقت كل الميكب بتاعي مش هحط تاني هرجع لربنا هرجع وتوبتي نصوحه يارب
_بجد يا أمان؟ بجد ؟
_أيوا والله
حضنتني وعيطت يعني دايمًا كانت تلح عليا في الصلاة واللبس وإني هاجرة القرءان مروة منتقبة
_دعوتي لكِ في جوف الليل استجيبت يا أمان إلحاحي على ربنا بالهداية لكِ ربنا حققه يا أمان أنا مبسوطة
