بصدمه " عاوز تسيبني عشان ابويا ميكانيكي !!
ببرود - انا دكتور و ابن دكتور اتجوز بنت ميكانيكي ليه يا خلود ؟ انا اسف بس وضعي الاجتماعي مش متناسب مع وضعك انا واقف فوق نجم من نجوم السماء و انت تحت الأسفلت !
بجمود و هي بتقلع دبلتها" اتفضل دبلتك اهيه
ببرود - خلود انا
قاطعته بعصبيه" انت ايه ! انت شخص زباله اروح اقول لابويا ايه يا أخي ! حسبي الله ونعم الوكيل فيك يا جاهل يا ابن الجاهل
قالت كلامها و جريت جريت عشان تعيط يمكن قدامه كانت أقوى شخص في العالم لكن في الحقيقة هي جواها نار نار بتاكل في قلبها و عقلها و كل شيء حواليها !
دخلت ورشة باباها و قالت بحُب " ازيك يا سيد الناس ؟
رفع وشه تجاهها و قال ' كويس يا ست البنات عامله ايه ؟
سحبت كُرسي و قعدت قدامه و قالت بهدوء" ماشي الحال ، وراك شُغل كتير النهارده ؟
ابتسم' قولي يا خلود
باستغراب " اقول ايه !!
مسك ايدها و قال ' حبيبت بابا مبتعرفش تخبي حاجة عنه مالك ؟
اترمت في حُضنه و قالت " كل شيء أصبح اسود يا بابا انا بحارب لوحدي و الدُنيا مُصممه تضعفني ليه مُصممه تكسر الضلع السليم إلى انا محمله عليه كُل حملي ؟ ليه بتعاندني كده ؟ ليه مُعتز سابني ؟ ليه حاسه بغِصه في قلبي كل شيء أصبح بعيد ، بعيد اوي يا بابا ..
طبطب عليها و قال بحُب و يقين عُمر ما في شيء هيهزمك متأكد انك هتبقى اشطر دكتورة متأكد انك أقوى من كل شيء طول ما احنا بنتنفس يبقى لسه فيه امل طول ما ايدك و رجلك بيتحركوا يبقى انت قادره طول ما قلبك بيدُق يبقى هتحبي و تكرهي و تعيشي مفيش شيء بعيد احنا الي فكرين اننا بُعاد
ابتسمت و مسحت دموعها و قالت طيب هناكل ايه ؟
ابتسم مسقعه و عيش و بطاطس ؟
ابتسمت مسقعه و عيش و بطاطس من عيوني يا حج
____________________________________
' معجزه ؟
بتفكير شويه
طيب انا مُمكن ابيع حتت الأرض
بعصبيه" لا طبعا يا بابا انا هتصرف أن شاء الله
عيب ابقى عايش و انت تتصرفي
" يا حبيبي متخفش انا قدها و ان شاء الله كله هيعدي
' و الماده إلى انت مقلقه فيها و عاوزه تاخدي فيها محاضرة خارجية هتعملي فيها ايه ؟ ده الشهر ب ٢٠٠٠ ج
بلعت ريقها " أن شاء الله خير و انا هكلم دكتور المادة بكرة و ان شاء الله هتتحل
________________________________
ضحك _ ايه الفرك ده ؟
بتوتر دكتور هادي انا عاوزه .. عاوزه
_ عاوزه تعملي حمام صح ؟
ضحكت لا لا
ضحك _ ايوه كده فُكي من التوتر ده خير ؟
اخدت نفس عميق و قالت بسُرعه و هي مغمضه عينها ينفع اخد محاضره خارجية في ماديتك بنص التمن بتاع الشهر ؟
فتحت نُص عين لما ملقتش رد لقيته مُبتسم فابتسمت و قالت بفرحه يا رب تحج يا رب تتجوز إلى بتحبها يارب تعيش في تبات و نبات و مطر و زرع و خُضره و هيء و ميء و شربيق
ضحك _ شربيق ! طيب يا ستي مفيش اي مُشكله
ابتسمت و نطت من مكانها بفرحه و حياه امك !
_ نعم !
بكسوف اقصد و حياه والده حضرتك
ابتسم _ و رحمتها بقى
" اسفه اني ..
قاطعها و قال _ لا أبداً و لا يهمك
