"إنه من النوع الذي لا يرفع صوته،يتحدث بلطف،دائماً ما يبتسم للآخرين ،وهو بداخله بركان يثور."
-ابني مريض صرع
=حضرتك بتقول ايه يا عمي
-دي الحقيقة أنا كنت عايز أقولك قبل كتب الكتاب بس كل ماجي أتكلم يحصل حاجة
عارفة انه مش بيحبني وانه اتقدملي لأن والده اقترح عليه كده وهو عايز يخلص من الزن صارحني بكده من أول مرة شوفته فيها مكنش عندي حرية الاختيار لأن بابا كان وافق أصلا
-عشان كده مكنش عايز يتجوز فيظهر ضعفه أنا اللي ضغطت عليه لو مش عايزة تكملي يابنتي قوليلي
خدت نفس ورديت بثبات
=عمي حمزة دلوقتي جوزي وواجبي اني اكون جمبه
عيونه دمعت وهو بيتكلم
-أنا مش عارف اشكرك ازاي يبنتي
=متشكرنيش يا عمي ده واجبي
كان المفروض النهاردة الحنة وبكره الفرح بس بابا موافقش اني اعمل حنة وقال كفاية الفرح وكمان أنا معنديش صحاب يفرحو معايا
كنت قاعدة على السرير ضامة رجلي وبعيط مش عارفة هقدر أعيش معاه ازاي رغم انه عيونه مليانة دفا الا انه يملك نظرات حادة مش عارفة هقدر أساعده وأتعامل مع مرضه ولا لأ دلوقتي عرفت ليه دايما بيقولي راجعي نفسك ليه دايما بيبصلي بحزن وكأن عيونه مليانة كلام
-ألف مبروك يابنتي نورتي بيتك
دخلنا الشقة وفضل عمي ونورا أخت حمزة في الشقة التانية
غيرت فستاني وخرجت لقيته بياخد علاج حطه في الشنطة أول ما شافني
+أنا عارف انك مكنتيش موافقة على الجوازة دي
رفعت راسي ليه وكأني بسأله عرف منين
+كان واضح جدا من تصرفات والدك انه غصبك
بصتله وسكت فكمل
+أنا دلوقتي بسألك انتي موافقة على الجوازة دي
بصتله واتكلمت بدون وعي مني
=موافقة
كان بيبصلي بحزن مش عارفة على حالى ولا على حاله
+وعد مني اني مش هزعلك
شديته من ايده وأنا بتكلم
=يلا عشان ناكل
+لأ مش جعان كلي انتي
قبل ما يكمل كلامه شديته من ايده وقعدنا على السفرة
بصيت ليه وهو بياكل كان بياكل بنهم شبه الأطفال تلقائي لقيتني ببتسم
+الحمد لله أنا هدخل أنام واستكشفي الشقة براحتك تصبحي على خير
=وانت من أهل الخير
دخل ينام وأنا بلف في الشقة هادية وفيها دفا شبهه بالظبط عمري ماكنت بقدر أنام في مكان غير أوضتي بس نمت بسرعة
صحيت على صوت خبط الباب
+صباح الخير يا زهرة
اتكلمت وانا برفع صابعي في وشه
=اسمي فاطمة مش زهرة
+اسمك فاطمة الزهراء فهقولك زهرة
سبته ومشيت وأنا متعصبة اسمي فاطمة وبحب اسمي ومش بحب حد يقولي يا زهرة
+والدك جه وقاعد عند بابا وعايز يشوفك
جسمي اتصلب للحظة بخاف منه وجوايا حزن انه دايما بيعاملني بقسوة
+مالك
=أنا خايفة
جه قعد على ركبته قصادي واتكلم بحنان ظهر في عيونه
+خايفة ليه أنا معاكي وكمان بتخافي من باباكي ليه
اتكلمت وأنا بدمع
=عشان هو بيضربني
+بيضربك ليه
=على اي حاجة مثلا القهوة مش مظبوطة أو غصب عني كسرت كوباية أو نمت وصحيت متأخرة
+مستحيل اسمح انه يقربلك متخافيش
لبست ولفيت خماري ورحنا شقة عمي كان قاعد هو وأمي تلقائي حضنت ماما وأنا بعيط فاتكلم وهو بيشد على دراعي بطريقة خلت عيني تدمع واتكلم وهو بيضغط على أسنانه
-مش كفاية نكد ولا ايه
لقيت حمزة بيشدني من دراعي وبياخدني جمبه
+نكد ايه بس يا عمي انتو بس وحشتوها
-بطل تدلعها عشان مش هتعرف تحكم عليها تاني
+أعيش وأدلعها
سبتهم ودخلت أحضر العصير مع نورا
*عاملة ايه يا عروسة
=الحمد لله
*فرفشي كده مالك ها في ايه مالك
=مفيش
اتكلمت وهي بتغمز *يابت
حمزة وهو بيضربها على رقبتها
+على برا بقا يا سكر
*ايه يا حمزة يا حبيبي مالك بقيت عنيف كده ليه
للحظة حسيت بالخنقة انها قالتله حبيبي مجرد ضيق طفيف أكيد مش بغير
+سرحتي في ايه
=ولا حاجة
+طب يلا يا زهرة هاتي العصير
كنت لسه هتعصب عليه لقيته ضحك بشقاوة وأخد العصير وخرج
فات 3 شهور وحمزة رجع شغله تاني بقا يغيب كتير عن عيني بيروح الشغل ويرجع يقعد في اوضته من فترة وهو مهموم قادرة أشوف الحزن في عيونه النهاردة صحي متأخر وراح على الشغل وتقريبا كده نسي علاجه ولما رجع
كنت واخده العلاج عشان اعطيهوله بس سمعت صوت خبط في اوضته
كان جايله نوبة صرع جسمه متشنج كنت بلف حوالين نفسي مش عارفة أعمل ايه عمي ونورا مش موجودين وبكلمهم محدش بيرد قعدت جمبه وأنا بعيط وبنادي عليه شوية وكان هدي وتقريبا نام حاولت بصعوبة اني أنقله على السرير ونام
كنت قاعدة جمبه طول الليل أول مرة اشوفه عن قرب عنده لحية منمقة رموشه طويلة وعنده غمازة بتظهر في بوادر الابتسام كنت حاسه بالفزع من اللي حصله مش عارفة ابطل عياط طول الليل لحد ما عيوني ورمت
نمت على حرف السرير مش عارفة ازاي بس صحيت على صوته وهو بينادي
=انت كويس فيك حاجة
+لا الحمد لله أنا كويس
كنت بعيط بشهقات انا خايفة عليه واحساس العجز كان مكتفني
+بس بس بتعيطي ليه
=أنا أنا كنت خايفة عليك
+متخافيش أنا كويس والله
اتكلمت وانا بمسح دموعي
=بجد
+اه والله بس ممكن تسبيني لوحدي شوية
=حاضر
كنت بصلي وحضرت الفطار بلف لقيته ورايا
=بسم الله خضتني يا حمزة
+عايز أتكلم معاكي شوية
=استنى تفطر الأول
كان شارد بيلعب في الأكل أكل حاجة بسيطة وأخد علاجه
شدني من ايدي وقعدني
كان باصص في الأرض وهو بيتكلم بصوت مخنوق
+أنا بيجيلي نوبات صرع
كان مستني مني صدمة أو رد فعل غير طبيعي
+لو عايزة تطلقي ده حقك
=أنا عارفة كل حاجة يا حمزة
+من امتى
=عمي قالي كل حاجة قبل الفرح بيوم
+وليه قبلتي تكملي
=مش عارفة يا حمزة بس ده اللي حسيته ان زوجي
اتكلم بعصبية
+ازاي وافقتي تكملي انتي مفكرتيش لما يبقى عندنا أولاد هعرف أقوم بدوري كأب ولا لأ
ابتسمت لمجرد الصورة اللي اترسمت في خيالي
=هتبقى أب حنين أوي ياحمزة
+فكري يا فاطمة بالله
اتنهدت
=أنا موافقة أكمل معاك يا حمزة
حط راسه بين ايديه وهو بيتنهد بتعب فتلقائي حضنت راسه وطبطبت عليه
=متشلش هم حاجة يا حمزة هتبقى كويس أكيد في طريقة
+ممكن تدخل جراحي بس انا مش حابب أعمل عملية
=هتبقى تمام متقلقش
+شكرا انك هنا
=تيجي نعمل كيكة بالشيكولاته
+أنا مدخلتش المطبخ قبل كده
شديته من ايده =يلا بس
كنت بعمل الكيكة وهو بيساعدني وأنا بضحك على شكله وهو مش عارف يعمل حاجة
=خلصنا هنحطها في الفرن بقا
بعد شوية خرجت الكيكة من الفرن كنت بحط صوص الشيكولاته على الوش
قطعت الكيكة وعملت نسكافيه ووقفنا في البلكونة
=مبوز ليه يا حمزة
+عادي مفيش حاجة
قعدت على الكنبة اللي في البكونة وحطيت راسه على رجلي
=مالك بقا
+حاسس بالخنقة
=ليه يا حمزة
+مش هتيجي في يوم وتزهقي من نوباتي صح
=لا أبدا أنا هفضل معاك على طول
قمت الصبح بكل نشاط وحمزة راح على شغله
+ازيك يا زهرة عاملة ايه
=الحمد لله يا حمزة
+في حاجة ولا ايه
=معلش يا حمزة ممكن ....تجيب جبنة رومي وانت جاي
+من عنيا حاضر
بعد حوالي ساعتين الباب فتح كان ماسك كيس مليان حاجات كتير فسألته
=ايه ده
+افتحي وشوفي
فتحت الكيس كان مليان شيكولاته وشيبسي
+كنت قولي عايزة شيكولاته ليه اتراجعتي
=خفت تتريق عليا
+بعد كده لو احتاجتي حاجة قوليلي
=حاضر
+أنا خارج مع صحابي وهرجع كمان شوية كده
=ماشي متتأخرش
"كيف سمحت لعيناك بأسري وأنا التي بتُ كالطير لاأكترث سوى للحرية"
خرج وفات ساعات مرجعش كلمته وقال انه في الطريق كنت واقفة في البلكونة بشرب نسكافيه وبسمع عمرو حسن
""انا ف البعد متحاوط بطيف ريحتك
ولسه لحد هذا الوقت فاكر شكل تسريحتك
وتنهيدك
وشكل الساعة علي ايدك
طريقتك وانت بتغني
بعيد عنك حياتي عذاب
حياتك ايه بعيد عني
يا دنيا عرفتها فجأة
وارض لمستها بشويش
يا أطهر من رقم فلكي
ف عداد اسمه أكل العيش
بتحكمي ليه على غيابي
وف حضوري بتنسيني
رفضتي ان انتي تتسابي
وفجأة انتي اللي سيبتيني
كأنك ف الغياب أقرب…
وجودك بيزيد إذا بعدتي…
رصيد ناقص ف كل غياب، ووحدك ف الغياب زدتي
عرفتي ازاي..
عرفتي ازاي تشاركيني غنا التفاصيل..
بقيت متساب لكن شبطان….
شيطان طيفك ملاك ف شيطان
مخليني ف وسط الناس لكن وحدي…
أشوف العمر بيعدي،""
لقيته فجأة بيكمل مع عمرو
""وحسديني البشر ع ايه وانا بدونك؟؟
وايه الدنيا سوى عيونك؟!
سوا حضنك ف وقت الخوف…
يا عم الحاسد الطامع
تعالي وشوف طلل راجل ف عز الليل بيسرد قصته لروحه…
ويشكي جروحه ل جروحه،
ويظهر للبشر باسم،
يعيش وكأنه مطمن
وهو في قلبه عجيب
شوفيلك حل ف غيابك..
يا إما رجوع من المبدأ…
يا إما تقولي كيف أبدأ ف اي طريق ينسيني…؟؟""
=رجعت من امتى يا حمزة
+من شوية كده
=أكلت ولا لسه
+صحبي مستني تحت هنزله ورق بس وهرجع
كنت ببص عليه وهو بيعدي الشارع وبيتكلم مع صاحبه افتكرت ان معاد الدوا عدا وهو مأخدش
لاحظت توتره وهو بيفرك في ايده وكأنها بداية نوبة جديدة
من حسن حظه اني كنت لابسة اسدال فنزلت جري
كان بيبصلي باستفهام
=حبيبي ممكن تيجي شوية
+بعد اذنك يا احمد
-سلام يا حمزة أشوفك بكره
شديته من ايده وطلعت بسرعة وأول ما قفلت باب الشقة جسمه اتشنج فقد القدرة على جسمه كان بيتكلم بطريقة رعبتني
كنت لسه بقرب منه فزقني اتخبطت في عيني
ناديت على عمي بسرعة وقالي انه هيهدى دلوقتي
هدي ونام زي كل مرة وأنا ببصله بحزن وكأنه ابني
زي المرة اللي فاتت فضلت جمبه لحد ما صحي
=انت كويس دلوقتي
+الحمد لله بس عينك مالها
حطيت ايدي على عيني وأنا بخفي الورم
غمض عيونه بتعب
+أنا السبب صح
=لا انا اتخبطت بس
قام وقف وقعدني مكانه
+نامي يازهرة يلا
باس راسي ومشي ولأني كنت تعبانة نمت بسرعة حسيت بيه وهو بيبوس جبيني
مش عارفة نمت أد ايه بس لما صحيت مكنش موجود سألت عمي ونورا قالو انهم مشافهوش جزء من هدومه مش موجودة
-اهدي بس يابنتي هو بعتلي رسالة وقالي انه سافر يريح أعصابه
=طب اتصل عليه يا عمي
-قفل تليفونه
فات أسبوع معرفش حاجة عنه احساس القلق هيقتلني أيوا حبيته مش عارفة امتى جايز حبيته من اول ما وافقت أكمل من الأول
كنت نايمة على سريره وأنا دافنة وشي في المخدة والفون رن أيوة هو ده رقمه فرديت بسرعه
=حمزة انت فين ليه بتعمل فيا كده ارجع يا حمزة
+أنا هدخل العمليات دلوقتي
=عمليات ايه
+هعمل العملية عشان مأذكيش تاني يا زهرتي أنا بحبك ومش هستحمل اني أئذيكي
=انت في مستشفى ايه
+مستشفى ............
=أنا جيالك يا حمزة
كلمت عمي بسرعة ونزلنا نروح المستشفى
على مارحت وسألت عليه كان دخل العمليات
كنت حاضنه نورا وانا بعيط
*هيبقى كويس يا فاطمة متخافيش
=يارب يانورا يارب
عدا أكتر من 4 ساعات واحنا مستنين لحد ما الدكتور خرج
=هو كويس يا دكتور
-الحمد لله العملية نجحت والنوبات مش هترجعله تاني هو هيتحط 24 ساعه تحت الملاحظة وبعد كده هننقله أوضة عادية
=الحمد لله
فات يومين وهو لسه مفاقش كنت قاعدة جمبه وانا بعيط
=اصحى بقا يا حمزة أنا خايفة لوحدي
+مش قولتلك متخافيش طول منا موجود يا قلب حمزة
=انت مصحتش على طول ليه
+راحت عليا نومة
ضربته =ابقا نام بدري
+ها
ضحكت
=بحبك
"وكانت لي قصة يملؤها الحنان بين سطور الاقدار"
#غسق
