My First Love is💛

Just Sailing(Final extra)

အမြဲတမ်း...ထာဝရ...အချစ်...ပျော်ရွှင်မှု။

အမှန်တော့ မမြဲခြင်းတွေပဲဆိုတာ ငါသိပါတယ်။သူတို့ကပြောတယ်အချစ်ခံရတိုင်း လည်းမပျော်သင့်သလို အမုန်းခံရတိုင်းလည်း ဝမ်းမနည်းသင့်ဘူးတဲ့။ဒါပေမဲ့ ဘယ်သူကများအချစ်ခံရတိုင်းမပျော်ဘဲနေမိလိမ့်မလဲ။
လူတွေရဲ့ဒဿနတွေကို ငါလိုက်မစဉ်းစားတော့ပါဘူး ဒီတိုင်း ဒီတိုင်း ငါ့ရဲ့ပျော်ရွှင်ရာဆီကိုပဲငါရွက်လွှင့်လိုက်တယ် ကံကောင်းထောက်မစွာနဲ့ ငါ့အတွက် စစ်မှန်တဲ့လူတစ်ယောက်တော့ ရှိနေပါစေ။

*****

'ဘာတွေတွေးနေတာလဲ ကောင်ကလေးရဲ့'

ဝရန်တာကပန်းပင်တွေကြား ငုတ်တုပ်လေးထိုင်ရင်း ငေးမိငေးရာတွေးမိ တွေးရာတွေးနေတဲ့ ခစားရံတစ်ယောက် ဘုန်းကြွယ်ဌေးရဲ့အသံကြားမှ အတွေးလွင့်လွင့်တို့အား အမြန်စုစည်းလိုက်မိသည်။

'ကိုကို'

'အင်း ပြောဗျာ'

'ကျွန်တော်လေ'

မျက်နှာလေးမသာမယာနဲ့ ပြောလာတာကြောင့် ဘုန်းကြွယ်ဌေးရဲ့မျက်ခုံးတန်းတို့အနည်းငယ်တွန့်ချိုးလာစပြုလေသည်။
သူ့အသည်းငယ်ဟာ ဘာတွေများ ပူပန်သောကရောက်နေပြန်ပါလိမ့်။

'ကျွန်တော် ရင်ထဲမကောင်းဘူး'

သက်ပြင်းဖွဖွချလို့ခေါင်းလုံးလုံးလေးဟာ ရင်ခွင်ထဲမှီသက်လာလေသည်။

'ဘာဖြစ်လို့လဲရံ မှန်း နေမကောင်းများဖြစ်ချင်လို့လား'

အခုတလောအရင်ကနဲ့မတူအရမ်းငြိမ်ကျလာတဲ့ကောင်လေးအား သူသတိထားမိနေတာကြာပြီ။

'ဒီတိုင်း အလိုလိုနေရင်း ဝမ်းနည်းလာသလိုပဲ'

တလောက ဖျားပြီးတည်းက အရှင်းမပျောက်သေးတာကြောင့် နေဝင်ရီတရော ညလေအေးကြောင့် အေးစက်နေတဲ့ရံ့ရဲ့လက်မောင်းလေးတွေကို သူ့လက်တွေနဲ့ထွေးပိုက်ထားလိုက်လေသည်။

'ကျွန်တော် ဘာတွေကို တွေးကြောက်နေမိမှန်းမသိဘူး ဟိုစာအုပ်ထဲမှာရေးထားတဲ့ မမြဲခြင်းတရားတွေကိုကြုံရမှာကို ကျွန်တော်ကြောက်တယ်'