Falling In Love With My Husband.

အခန်း 21

"သမီးလေး ဒါလီ လိုက်လာလို့ တော်သေးပေါ့...အန်တီမီတစ်ယောက်တည်းဆို ချမ်းလေး လေယာဉ်ထွက်ချိန်အထိ စောင့်နေရင်း တစ်ယောက်တည်းပျင်းနေမှာ...သူ့ဒယ်ဒီက အစည်းအဝေးရှိနေတာနဲ့ မလိုက်လာဖြစ်တော့ လေ"

လေဆိပ်ရှိ အဆောက်အဦးကြီးထဲ သုံးယောက်သား ဝင်လာကြရင်း ဒေါ်မေမီကဆိုသည်။ဒါလီက အဖြူရောင်ဂျင်းဘောင်ဘီရှည်ပွပွလေးနဲ့ အဖြူရောင် croptopအကြပ်လေးကို တွဲဝတ်ထားကာ အပေါ်ကပန်းနုရောင် ဆွယ်တာပါးပါးထပ်ဝတ်ထားသည်။နေကာမျက်မှန် တပ်ဆင်ထားကာ ပိုက်ဆံအိတ်ကို လက်မှာဆွဲချိတ်ထားရင်း ဒါလီက ဒေါ်မေမီလက်မောင်းကိုတွဲချိတ်ထားသည်။

"ဟုတ်..အန်တီမီ..သမီးက ချမ်း ကိုလိုက်ပို့မှဖြစ်မှာပေါ့"

"အင်းပေါ့"

ဒေါ်မေမီနဲ့ဒါလီက အတိုင်အဖောက်ညီစွာ စကားတပြောပြောဖြင့် ရှေ့ကလျှောက်နေကြသည်။ချမ်းက oversize တီရှပ်အဖြူရောင်လက်ရှည်လေးနဲ့ခဲပုတ်ရောင် ဂျင်းဘောင်းဘီရှည်ကို တွဲဝတ်ထားသည်။ချမ်း ဆံနွယ်ပွပွလေးတွေက နဖူးပေါ်ဝေ့ဝဲကျနေကာ maskအဖြူရောင်ကိုပါ တပ်ထားသည်မို့ ချမ်း မျက်နှာလေးထက် မျက်လုံးဝိုင်းဝိုင်းလေးတွေသာ ပေါ်လွင်ကျန်နေသည်။

suitcaseကိုလက်က ဆွဲကာ ဒေါ်မေမီတို့နောက်မှ လျှောက်လိုက်လာရင်း ချမ်းမျက်လုံးလေးတွေက ဟိုဒီဝေ့ဝဲရှာကြည့်နေသည်။ဒီအချိန်ဆို မောင်ရောက်‌နေလောက်ပြီဖြစ်သည်။‌အဆောက်အဦးကြီးထဲ ဟိုဒီသွားလာနေကြသည့် လူတွေက များသည်မို့ ချမ်း မောင့်ကို ချက်ချင်းရှာမတွေ့ပေ။

သုံးဦးသား တန်းစီချထားသည့် ခုံလေးတွေပေါ်တွင်ဝင်ထိုင်လိုက်ကြသည်။ခရီးသည်တွေကြားထဲ ထိုင်နေသည့် အနက်ရောင်ပုံရိပ်ကို မြင်လိုက်သည်နဲ့ ချမ်း ရင်ခုန်သွားရသည်။နေက တီရှပ်အနက် ဂျင်းအနက်နဲ့ဖြစ်ပြီး ဦးထုပ်ကို ခပ်ငိုက်ငိုက်ဆောင်းထားသည်။ဘေးမှ ကျောပိုးအိတ်တစ်လုံးချထားလျက်။ချမ်း တို့ရောက်လာတာမြင်တော့ တစ်ချက်လှည့်ကြည့်ပြီး ဦးထုပ်ကိုပိုမိုငိုက်ဆောင်းသည်။ပြီးနောက် လက်ထဲက ဖုန်းကိုစိုက်ကြည့်နေဟန်ဆောင်သည်။