တိမ်ယံလွှမ်းတဲ့တောင် / တိမ္ယံလႊမ္းတဲ့ေတာင္ (Complete)

🦋49🦋

Unicode
တိမ်ယံလွှမ်းတဲ့တောင်

                       🦋49🦋

       နတ်ဆိုးမွေးဖွားခြင်းတောင်ကနေ ပြန်ထွက်လာပြီးနောက် လော့လော်သည် နတ်ဆိုးသားရဲပြောလိုက်သော အကြောင်းအရာကို မကြာခဏဆိုသလို စဥ်းစားခန်းဖွင့်နေရသည်။ ဘယ်သူက ဟွမ်ကျင်းရွှေကို မွေးကတည်းက သတ်ချင်နေတာလဲ။

       ဘယ်လို ဓားစွမ်းအင်မလို့ ဆံပင်အရောင်တွေပြောင်းပြီး ငယ်ငယ်ရွယ်ရွယ်နဲ့ သွေးကြောတွေ ပွင့်ထွက်လာအောင် ဖြစ်သွားရတာလဲ။ သူတို့၏ အပြန်လမ်းက ချောမွေ့ခဲ့သည်။ သဲသောင်ပြင်ကို ဖြတ်ပြီး တောအုပ်ထဲဲ ရောက်တဲ့အထိ အဆင်ပြေ၏။

       တစ်ရက်ကြာတော့ ယခင်က ဟွမ်ကျင်းရွှေ နဲ့ လော့လော်တို့ ပြန်ဆုံတွေ့သော တောအုပ်ထဲကို ပြန်ရောက်လာခဲ့သည်။ တစ်ညတာ အိပ်စက်ရန်ပြင်တော့ ကျီဟန့်က လော့လော်ကိုခေါ်၍ သီးသန့်စကားပြောလာ၏။

"မင်းသမီး.... အဆင်ပြေပါ့မလား"
"အဆင်ပြေပါတယ်... ယဲ့ယဲ့နဲ့ ရိယုံလည်း ပါတယ်လေ အရင်ပြန်နှင့်ပြီး ပုဖောင်အရိုးပြာအိုးကို သေချာမြှုပ်ပေးလိုက်နော် မှတ်ထား.... ကိုယ်ရံတော် မှတ်တမ်းကျောက်တိုင်လည်း ရှိရမယ်"

"ဟုတ်ကဲ့"
"သူ့မောင်လေးကို စောင့်ရှောက်ပေးဖို့အတွက် သေသေချာချာ ပြင်ဆင်ပေးလိုက်...."

       လော့လော်က သူမ၏ကိုယ်ပိုင် တံဆိပ်ပြားကို ပေးလိုက်သည်။

"ယူသွား.... အစ်ကိုတော်ကို ပြလိုက် "
"ဟုတ်ကဲ့...."

       သို့နှင့် ကျီဟန့်၊ ကျီစုနဲ့ ချင်းယန်တို့သည် ခဏနားကြပြီးနောက် ညတွင်းချင်းပင် ချင်းချုံးတောင်ပိုင်းသို့ ပြန်ထွက်ခွာသွားလေသည်။ တောအုပ်ထဲတွင် ဟွမ်ကျင်းရွှေ ၊ လော့လော် ၊ ယဲ့ရှားလုံနဲ့ရိယုံတို့သာ ကျန်ရစ်ခဲ့၏။

       ဟွမ်ကျင်းရွှေ သူ၏သိုလှောင်လက်စွပ်ထဲကနေ မြေပုံကို ထုတ်ယူလိုက်သည်။ ပြီးနောက် သူဒူးပေါ်တွင် ဖြန့်ချကာ သေချာကြည့်ရှုနေသည်။ သူလာတဲ့ နောက်ရည်ရွယ်ချက်တစ်ခုက သူ့အမေကို ရှာဖို့လေ။

       ရိယုံကလည်း မြေပုံကိုလှမ်းချောင်းကြည့်လေသည်။ သူသည် ဤမျှ သပ်ရပ်လှပသော မြေပုံကို မတွေ့မမြင်ဖူးသော သူတစ်ယောက်လို မျက်လုံးအရောင်တို့က တောက်ပသွား၏။