وتلاقت الأرواح

البـارت السادس

مِن الخمر حَد عتبة المحراب أحِبَك
..

.. #وتلاقت_الأرواح

  ..#فاطمه_أحمد

°• البارت السادس °•

☆☆☆☆☆

حاولت اخفي ابتسامتي الي نرسمت على وجهي واني افكر بي .. قاطعتني ام الصالون بفضولها وهي تسأل
ـ متزوجين عن حب؟
ـ اي
ـ الله يحفظكم أن شاء الله
ـ شكراً

خلصت لمساتها الاخيره ..  وطلعت "ساره" (اخت خالد) توكف تكسي ماعندي صديقات بس ريمه وقوة علاقتي بساره من خلالها ولأن ريمه حامل ماكدرت تجي ودزت ساره وياي للصالون ..

اليوم هو اليوم الي انتظره من اشهر

، بعد خطوبتي بمنقذ صار عرس ريمه وخالد وهسه هي حامل اما اني ومنقذ ف بعد الخطوبه ب٤ اشهـر قررنا نتزوج ..

بعدما انتقلوا للكاظميه ورتبوا وضعهم قررنا نتزوج وزفتنا بالكاظميه ..

دخلت ساره وهي تكول
ـ يلا نداوي وكفت تكسي ، جاهزه؟
ـ اي يلا
دفعت حساب الصالون و ودعتهم وطلعنا وهي تساعدني برفع البدله جانت ساده من الصدر والجوه نفشه بدانتيل
..

رفعتها وصعدت التكسي وتوجهنا للبيت ..
دخلت البيت واشتغلت الهلاهل والصلوات واجتني امي تركض
ـ يا هلا بسورها ونورها يمه اسم الله الرحمن عليج تخبلين ، اللهم صل على محمد وال محمد

ـ يووم

ـ يبعد امج ، تعالن يلا ادخلن
تقربت يمي وهمست :- سويت الج كوشه بسيطه

ـ فدوه اروحلج يمه

ابتسمت وراحت تستقبل النسوان .. اخذوني البنات للكرسي المجهز الي ، كعدت والمسكه وقرآن صغير مفتوح على سورة "الفتح" بايدي لازمتهم  ..

بدت تدخل النسوان والجوارين ..
بدخلت مجموعة نسوان دخلت ريمه وبطنها كدامها بعدها بالاشهر الاولى بس شفتها ابتسمت على منظرها .. سلمت على ساره وساره ردت
ـ وين صرتي يمعوده راح تجي الزفه
ـ غير اخوج عطلني ، شلونج نداوي ابوسج لو يخرب المكياج
ـ عوفيها يمعوده

ـ لج شنو هاي طالعه تخبلين
ـ والله؟!
ـ والله كمر ماشاء الله تبارك الرحمن عليج حبيبي

بعدها تحجي وصاحوا  "اجتي الزفه"
عدلت كعدتي وريمه لبستني البركع   ..

كلبي حسيت دكاته صارت الف بدخوله .. والهلاهل والصلوات والهوسات ..

دخل وياه بابا ، اجه بابا باس راسي ، سحبت ايده وبستها :- الله يحفظك الي بابا

ـ الف مبروك بنيتي
ـ شكرا بابا
دنك راسه وكال
ـ اجه اليوم الشفتج عروسه بس راح تروحين من يمي
هزيت راسي بخوف من الجمله الاخيره ..