وتلاقت الأرواح

البـارت الخامس والثلاثون

.. #وتلاقت_الأرواح

..#فاطمه_أحمد

°• البارت الخامس والثلاثون  °•

ضاكت ..
ضاكت ياعلي وانت الها من اتضيك ..

مد ايدك وحلها الناس
تعبانه ..

مد ايدك وخلي العافيه
بـ كل بيت ..

الدوه ضايع ويوسف كثروا اخوانه ..
ياعلـــي ..

♥

حبيب :-

دخلت فلة غرفة العمليات وأحنا بقينا ننتظر بره .. ابوي وامي ماكعدوا ولا هدأ بالهم ، أمي تقرأ قرآن وتدموعها مابطلت .. وأبوي بس يفتر ويسبح
عمي كاعد ويحاول يهدأهم بس هيهات ..

علي يروح ويجي مايعرف شنو يسوي .. كل شوي ومباوع بـ ساعته .. اني!
اني جنت منتجي على الحايط ومغمض ، اليشوفني بـ هذا الوضع يكول " يا برودة دمه "
بس داخلي جان بركان نار ..

كأني الهدوء ماقبل العاصفة ..
ادعي ربي وداخلي ينتفض ، لو بيدي اني ادخل بدالها العملية .. لو بيدي اشيل وجعها عنها ..
بس مو بيدي!!
بلعت ريكي وفتحت عيوني ، قرفصت بـ الكاع وأديّ على وجهي ..

فلة قوية كلش .. ماتخاف من أحد ..

رقيقة كلش كأنها طفلة .. قوية ولسانها اطول منها بس عدها جانب الفهاوه ..
مرات تشوف كلامها عبالك اكبر منك .. تحجي بـ منطق وعقل .. بس عدها جانت الطفولة ..
كلش طفولية من ناحية تصرفاتها وشكلها ، عبالك طفلة من صدك ..

تلكاها مره أحياناً واحياناً تلكاها  بألف مره
وكعتها ماجنا متوقعيها وصدمة النا .. بـ الأخص هي أكثر شي تكره هو الدكتور والمستشفى بـ صورة عامة ..

بعدما مرت ساعة تقريباً .. طلع الدكتور وهو يبلغنا بـ نجاح العملية .. وكالوا تبقى اليوم بـ المستشفى ..

ركضنا ندخل الها .. نسمعها بس تون الدكتور كال جاي تصحى من البنج ..
هزيت راسي واني امسح على شعرها :- ها فُلتنا ، عندج العافية ياروحي .. تكومين النا بالسلامة يارب ..

كعدت من البنج وبدت تفتح بعيونها ، بـ هالاثناء اتصلت بيه نرجس اروح اخذها من المدرسة واجيبها هنا ..

طلعت من المستشفى ورحت للبيت ، فتحت الباب وصحت بالبيت :- ها نونايتي ؟

اجاني صوتها من الغرفة :- انتظرر دابدل ..

ابتسمت وهي طلعت لابسة فستان وحجاب طالعة مرتبة ، ابتسمت وتقدمت :- ها حبيبي ، بشر شلونها فله؟

ـ زينة ، طلعت من العمليات والعملية نجحت

غمضت عيونها وزفرت :- اوووف الحمد الله الحمد الله .. يلا لعد امشينا

ـ وهيج ؟!

التفتت مستغربة:- شنو

ـ لا شي شياتين!