من بعد اول لقاء جمعهم كال :
" بستها الچنت بس محتاج شوفتها "
.. #وتلاقت_الأرواح
..#فاطمه_أحمد
°• البارت الثالث والثلاثون °•
☆☆☆☆☆
بس صعد حبيب حجيت بصوت مخنوك :- حبيب مااكدر اتنفس بعد .. راااح امووت راح اموت
ركضوا عليّ هو وعلي ، طلع بطل ماي وفتح باب السيارة :- شبيج شبيج
ـ مختنگه حموووت
ـ جري نفس
ـ مااكدر عفيييه
بقيت اكح وشربت ماي .. عاد صاحت نرجس :- دمشوا ناخذها للطوارئ ننتظرها تموت!!
صعدت واني سانده راسي على الكشن ويمي زينب تقره ايات بوجهي وتنفخ :- ها شلونج هسه
مارديت عليها .. سحبت بطل الماي وفرغته على وجهي .. الحجاب تبلل والملابس ..
اريد هوا ماكو ماجاي اكدر اجر نفس .. عيوني بدت تغوش ودخت حييل والسيارة تهز بيه :- اووووكف حـ اتقيء
بسرعة وكف السيارة ونزلت فرغت كل الاكلته .. روحي عبالك جاي تطلع .. عيوني غوشت وبس صوت طنين الأذن اسمعه ..
وصلنا للطوارئ بالف يالله .. حطوا الي مغذي وكانونه والاوكسين ..
اجت الدكتوره وسألها علي ، التفتت عليّ وهي تكتب علاج ، ردت :- فلاونزا مستبرده .. وعندها حساسية .. بالإضافة إلى نقص بالاوكسجين ..
هذا موسع قصبات تاخذه من الصيدلية وهاي ادوية هم وره كل وجبه حباية وهذا العلاج حبتين باليوم .. بعد هو الصيدلاني يفهمك طريقة العلاج
ـ شكراً دكتوره
ـ ولو مابيها غير العافية ..
طلع واني كملت المغذي وشلت الكانونه ورجعت للبيت .. مباشرةً دخلت لغرفتي .. شوي ولحگتني امي وحدها حضنتني ودمعت عيونها :- يستاهل تسوين بـ روحج هيج!!
ـ لا طبعاً مايستاهل ، بس هي الدكتورة كالت مستبرده ماله علاقه بـ السالفه ..
ـ يمه بنيتي .. حياتنا ماتوكف على شخص .. محد يدوملج حتى احنا اهلج باجر عگبه ربج ياخذ امانته ..
شهكت :- اسم الله يمه لاتكولين هيج
ـ كلنا نموت .. خلي اكمل ، اسمعي بنيتي محد يبقى لـ أحد ويدوم النا ، أنتِ لازم تركزين على نفسج وحياتج .. تركزين على مستقبلج وشهادتج ، لاتبقين تتأملين بـ هذا وذاك .. حتى اخوانج هسه سند الج ويعاملونج زين بس منو يكول من نموت يبقون هيج؟! كلمن يروح لـ حضن مرته ويشمرونج على زلمة .. ولو اعرف ولدي مايسوونها بس جاي اوضح الج بـ صورة عامه ..
مُهيمن صح ابن اختي واحبه .. بس من البداية جنت متردده منه لأن مااريد ارجع لذاك المستنقع وماريد ارجعج اله وتتعذبين وتشوفين العذاب الشردت منه اني ، يبقى بي رس من عمامج .. ابوه نفسه الحرمني من اختي سنييين لو ما لطف ربي فَ لا اشوفها ولا احصلها ..
