.. #وتلاقت_الأرواح
..#فاطمه_أحمد
°• البارت السابع والعشرون °•
☆☆☆☆☆
ٱجَة وكت الحَچي
الغَطى بَرمَوشي الشَيب
وٱجة وكت
العِتاب اليَنزعل مِنة،
كامت تدفع بيه واني لازمه اديها وحاضنتها مااكدر اخليها تطلع ، سمعنا كسرة جام بسرعة صرخت امي ، شوي وسمعنا صوت ابراهيم يرعد
بقوا بس يغلطوون وهوسة كلشي مانفتهم ، نص ساعة وصار هدوء ، واسمع مهيمن يصيح :- لك هاييي شسوييت؟!!!
فزينا مخروعين بسرعة فتحت امي الباب وركضت ، ركضت وراها ، لكيت ابوي متمدد نايم على التخم ، صرخت امي :- يمممه تصخمت وتعزيت لك گتلت ابووووك ؟؟! جاوبني؟؟
لزم ايدها ابراهيم يهدي بيها :- يمه إبرة منومه والله
مسحت دموعي ومُهيمن جر أيدها وكعدها :- ضربه ابره .. مالها حل ثاني
ـ لك كولولي شسوي لو عرفوا بـ ندى المرة متبهذله وحالتها حاله ، يااايمه اني شحجاااني
صحت واني لازمه أيدها :- استغفر الله يممه هدي شبيج
ـ ولج راح اموووت ، ندى لو خسرتها اموووت مابقى الي أحد من اهلييي ولج بقيت وحيييده حتى لو بعيدة عليها بس عالاقل اسمع صوتها واعرف هي عايشه .. اعرف عندي اخت الوكت الاطيح توكفلي مو اروح أكملها عليها
مُهيمن يفتر ويفرك بـ راسة ، وامي تسولف لـ إبراهيم الي صار .. رحت غسلت وجهي ورجعت ، اباوع لـ شعري مكفش و واكع ، وراسي يأذيني لان سحبني حيل
باوعلي ابراهيم ودنك يمي .. مسح على راسي وهمس :- أذاج؟
ـ ابوية شسوي يعني؟!
تغيرت تعابير وجهه بـ اسف ، والتفت لـ مهيمن :- ها شنو راح نسوي
ـ أحنا ماعرفنا اذا هو عرف مكانهم لو لا
ـ يعني منتظر تتأكد؟!
ـ ضروري ..
بقوا كاعدين واني اخذت امي ودخلت جوه ، فرشت الها تمددت وغفت من التعب ، واني تمددت وتلفلفت بـ البطانية وكتمت شهكتي وبجيت .. بجيت وبجيت الا ان غفت عيوني وبداخلي قهر يزيد يوم بعد يوم ..
كعدت الصبح جوه عيوني حمر ، بسرعة رحت اغسل وطلع بـ وجهي إبراهيم :- ليش تبجين عيوني أنتِ
حضني واني دمعت بسرعه ونزلت دموعي :- لييش الله مارزقني بـ اب حنون ويحبنا ويطلعني ويحترمني ومايأذيني ، ليش هيج ديسوي ، ليش ماجاي احس بـ حنان ابوي ولا عندي مشاعر اله؟!
ـ أحنا نحب وتتكون مشاعر عدنا بـ الاهتمام .. شلون لو ماكو اهتمام؟ وتردين تنخلق الج مشاعر تجاه أحد مامهتم بيج؟
هزيت راسي ودخلت غسلت وطلعت لكيت مُهيمن يكعد بـ ابوي كعدت قريب عنه :- يصير مايكعد لفترة ؟
