.. #وتلاقت_الأرواح
..#فاطمه_أحمد
°• البارت الثلاثون °•
☆☆☆☆☆
عَريان يكَول :
- ومِن وِصلنه البابهم كَالو شجابك ؟
لا تِجينه
فَـ يرد كاظم إسماعيل :
- تالي طِبگوا بابهم وبِـ نار فَشلتنه نچِوينه
مُهيمن :
فزيت من اتصال أبوي واحنا صارلنا فترة وضعنا متوتر .. رفعت الخط وجاوبته بـ :- هلا بوية !؟
ـ مهيمن بوية الحك علينا .. بت عمك خاطـ،ـفينها ماخذين شرفها وشامرينها كبال بيت اهلها ، كلها ملتمه روح شوف شكو واني بـ طريق سليمانيه يحتاجلي وقت اوصل .
ـ اي اوكف بوية ، غير نفتهم ياهي ، وشصاير
ـ خايب بت عمك فيصل ، أشرَيقه ( اشراق) ..
ـ اي شلون خاطفينها غير افتهم
ـ ماادري شمدريني !
بس هي ماتبعد ولاتطلع وحدها بس مدري شمطلعها .. وانت لأن ضابط يحتاجونك عمامك روح وبلغني شيصير ..
ـ خوش
سديته منه واني متلخبط ، هو عمامي مرة مدري مرتين شايفهم لااعرفهم ولايعرفوني ، بس وكت المصلحه ..
التفتت لـ حبيب سألني :- شصاير؟
سولفت اله مختصر طبطب على جتفي وكال :- روح توكل .. مهما كان يبقون اهلك ،
ـ هم ذول ..
استغفر الله ، يالله اودعناكم ..
ركبت سيارتي وطلعت لـ عمامي ..
.
.
.
.
فلـه :
دخلت ادرس بس نرجس بقت تنتظر بالكراج ..
لحدما راحوا .. وهي اجت تركض .. فتحت باب الغرفة ونكزت :- لج بت عم مُهيمن خاطـ،ـفينها ، ولاعبين بيها لعب وشامرينها باب اهلها ..
شمرت الكتاب واني فاتحه حلگي :- عزززا بـ عيني يمممه
ـ اششش وج على كيفج لاتسمع عمتي
تربعت وكعدنا بـ الكاع واني اسألها :- وهسه شنو صار ، وماعرفتي ليش خاطـ،ـفينها ، وليش هيج صار ، خطيه ماتستاهل ، يووو هسه عمامها محد يرحمها ، وتصير سالفتها مثل خالتي مروة الله يرحمها ..
ـ وچ على كيفج .. بعدها ماكملت الجمله وعاطت ، شنوووو ، شنوو شيصير ، ياعززا بـ عيني ، تصخمتي يَ فله ، شووف حظج!!
ـ شكووو شبيج؟
ـ أنتِ تعرفين بيهم وهستوج حجيتيها ، هم لازم يتسترون على السالفه
هزيت راسي بفهاوه:- اي؟!
ـ ابن عمهاااا منوووو لاتنثولين
ـ منو...
عززززا بـ عيني مُهيمن!!!!!!!!
ـ وچ ايي شلون لو شمروها بـ راسه
كمت واني افتر واهز راسي بـ نفي :- لا لا اكيد عدهم ولد عم غيرهم ، اخوان حكيم شكد؟
