وتلاقت الأرواح

البـارت الثامن

حمَد چا ما ترد لينهَ. حمَد خربَت معانينهَ .

..

.. #وتلاقت_الأرواح

..#فاطمه_أحمد

°• البارت الثامن °•

☆☆☆☆☆

دكت الباب وي دكة كلبي .. معقوله الكاها معقوله تشوفها امي بعد هالسنوات وتفرح ؟
عالاقل ترد الها وحده من بناتها الضاعن من اديها بلا سبب ..

انفتح الباب وطلع ولد صغير بس ملامحه عبالك أبويه بدون شوارب .. كلش نسخه
من شفته ماصدكت وكلبي ترتفع نبضاته ..

دنكت يمه ريان وهي تهمس:- وين امك؟
ـ بالغرفه تخيط
ـ صيحها ..

بعدها تحجي وطلعت حجيه ركزت بيها عمتي ميساء
ارتبكت خفت تعرفني .. ندستني ريان وهمست:- مريضه ماتشبهه عليج

صاحت :- منهووو !!

ريان ـ اني عمه اجيت على ام مهيمن دااريد اخيط يمها

ـ چا واليجي وكت الضحه! تعالن فوتن الاستقبال فارغ محد عدنا الزلم طالعه

هدأت من ماعرفتني .. بس بعده كلبي يدك ومامصدكه كل الي صار كدامي وماصدكه راح اشوفها ..

دخل ولد ثاني غير ذاك وكف بالباب خجلان وهو يتمرجح بالتخم وكال
ـ ماما تكول تعالوا

ـ منو هذا ؟

ـ الاول ابنها مهمين وهذا ابراهيم

ـ بس هذول عندها ؟

ـ اي

دخلنا الغرفه وهي وكفت .. متغيره متغيره هواي ملامحها منتهيه مو ذيج اختي الاعرفها
بياضها رشاقتها جمالها .. ذول وين؟

التفتت النا بابتسامه :- هلا بيج خيه ام محمد ، شلونج

ـ بخير حبيبتي

التفتت الي وعقجت حواجبها وصفنت
همست واني ارجف :- رُسل!

ـ تفضلي يبعد عمري

ـ رسل انـي ندى ندى بنت امج وابوج

بهت وجها وصفنت .. نزلت عيونها علي وتفحصتني شبر شبر .. فتحت اديها ودموعها نزلت :- نداوووي حبِيبتي

" يبعد روحي اختي "

حضنتها وكلبي ينتفض الم وشوق وحب وحزن .. مااعرف مشاعري بذيج اللحظه .. بس الاعرفه جنت مشتاقه الها حيل ..

كافي عليّ هالسنين وحيده واني عندي اخت ،
وحده خسرتها بالمكبره ووحده عايشه ومااعرف اخبارها

حجت ريان :- اني راح اكعد يم الحجيه حتى تسولفون براحتكم ،
هزيت الها راسي واني بحضن رسل ، طلعت وبقينا اني ورسل

بعدتني عن حضنها وتلمست وجهي باديها الخشنه
ـ ندى هاي أنتِ .. والله ماجاي اصدك

ـ اني اني لج اااااخ رسل متدرين شكد مشتاقه الج ، وينج ، وينج يروح اختج