.. #وتلاقت_الأرواح
..#فاطمه_أحمد
°• البارت الرابع الخمسون °•
صحينه وهز كلبنه الضيم
وأسمك جان عامينه
" عريان السيد خلف "
مبتسمه بـ توتر .. نزلت من السيارة همست :- ادعيلي هِـشام
ـ أن شاء الله يَ گلبي
عفته ودخلت .. ماجبت وياي كتاب .. الطالبات كلهم مخبوصات ويراجعن .. بس اني اعرف المراجعه تشوشني .. ولازم اعوف المراجعه قبل ساعه او نص ساعة ..
حضرت أقلامي وقريت الفاتحه لـ أم البنين ودخلت للقاعه .. بدون مااباوع لـ باقي الأسئلة بديت من السؤال الاول حليته ورا ماخلصته كلش يالله انتقلت للسؤال الي بعده ..
وهيج إلا أن كملت .. بقيت اراجع الدفتر واتأكد ماعندي شي ناقص أو خطأ .. سحبت نفس شهيق وزفير وسلمت الدفتر وطلعت انگز فرحانه من شفت هِـشام منتظرني
رحت اركض والضحگه شاكه حلگي :- جاووبت جاوببت كللللوش
ـ عفيية بـ بنيتي الشطورة ..
ـ اريد بـقلاوة
صفن بـ وجهي واني اضحگ .. حركت جتافي ورفعت اديّ :- معليّ اريد مكافأة .. تدري بـ نص امتحان العربي واجتي بالي متت اشتهيت بقلاوة جيب الي يطلعني ويجيبلي بقلاوووة
ـ انتِ بقلاوة
ـ قشمر قشمر .. يلا شو اشوف حبااااب يلااا
هز راسه وضحگ .. اخذنا جبنا بقلاوة واني حاطتها بـ حضني طيرت نصها لحدما هو سحبها مني وصاح :- راح يفووول السـُكر لچ!
ضحكت ومسحت أصابعي .. وصلنا للبيت وبدت رحلتي وي ثاني امتحان ..
هِـشام رغم مريض وتعبان بس يساعدني .. و وياي من ماافتهم شي هو يشرحلي ..
ورحت ثاني امتحان نفس الشي ..
مرت أيام الامتحانات كدما تعبت بيها كدما ضحگت عليها بعدين
واضحگ واكول " واني شبيه جنت مكبرتها شو بسرعه خلصت!"
دخلت للبيت بـ آخر يوم فرحانه ودي اطير من الفرحة ..
بـ يومها صليت الشكر لـ ربي .. ودعيت مايضيع تعبي واطلع المعدل الي اتمنى ورحت سبحت وطلعت ماسكات وكعدت اعتني بـ روحي ..
صفنت على المراية .. خصرت دشداشتي على جسمي .. عقجت حواجبي ودنكت اباوع لـ بطني :- شنو هذا الكرش الطالعلي نوب!!
سحبت نفس بـ انزعاج ونزلت جوا .. كاعد هِـشام يباوع اخبار ..
اباوعلة وعيوني دامعه .. يربي شنو الي بيدي اسوي واخلي ينسى همومه ..
يذب حسرات شگت گلبي شگ ويجر بـ النفس من الجگارة ، باكيت كامل خلصه بـ ساعة وحده ..
