.. #وتلاقت_الأرواح
..#فاطمه_أحمد
°• البارت الأربعون °•
" تلاكينه وجزتني العين
وحسيت الجدم ثكلان
مابين العشك والخوف
الحب المن صدك يحتاج له انسان "
ملاحظة " بـارت اليـوم طويل ويحجي عن أكثر من شخصية يحتاج تركزون بـ الأحداث "
التفتت لـ عمي متفاجأة وهو يسلم عليهم ويضحك وياهم ويعرفهم عليّ ، بقيت صافنه متفاجأة تقدمت اسلم على نسرين مدت ايدها :- هيلاووو
ـ هلا بيج شلونج نسرين!
ـ I'm fine
" انا بخير "
ابتعدت مستغربه شنو جاي يصير وشنو هذا الاستقبال البارد والـ كلش جاف!!
اخذني عمي لـ غرفة ، فتحها وهو يحجي :- هذه غرفتج رتبناها كد مانكدر نتمنى ترتاحين بيها ..
هزيت راسي ودخلت الغرفة .. سد الباب وطلع .. كعدت واني احجي شلون ابقى هنا هاي من اول يوم وهيج ، شلون راح اتحمل اعيش عدهم واني مااعرفهم؟؟
هزيت راسي ونزعت حجابي .. غيرت ملابسي وطلعت لكيت نسرين تطلع الاكل الجاهز من المواعين وعمي كاعد ومخلي رجل على رجل ويباوع على التلفزيون ..
كعدت يمه التفتت الي وابتسم :- أنتِ حتبقين بالاسود؟
ـ اي ليش؟تريدني انزعه؟
ـ مُغيم عليچ وأنتِ شابه الحزن مو باللبس ترا ..
هزيت راسي وسكتت .. كعدت اباوع للبيت جان وسط مو كلش جبير .. بس 3 غرف وصالة مفتوحه على المطبخ .. وحديقة خلفية .. والأمامية هي عبارة عن حديقة واسعه داير مادايرها بيوت ..
يعني مجمع سكني ..
حطت الاكل نسرين .. رفعت راسي الها وابتسمت .. ماباوعتلي .. صفنت على ملابسها برموده بنفسجي كلش قصيره .. وهي جسمها تارس مو سمين ..
بس مبينه تقاسيم جسمها ..
استغفرت ربي بـ داخلي وبدينا ناكل واحنا ساكتين ..
ورا ماخلص عمو فتح قوطية ببسي وبقى ساعتين يشرب بيها ..
همست بـ خفوت :- عمو منو هذا الي قبل شوي جان موجود بالبيت؟
ـ اها منو ؟ قصدج "چان"
ـ منو چان؟
ـ حبيب نسرين
حجاها بلا مبالاة واني التفتت مصدومه .. باوعتلي نسرين بـ نظرة غريبة وابتسمت بـ توتر .. بقيت صافنة اني شجابني هنا؟؟
شوصلني لـ هنا؟ مو مثل العشت وتربيت عليه ولا مثل طبايعي؟ شلون اعيش وياهم؟؟
بقيت كاعده بـ مكاني ، شفت الشمس غربت وهنا الوقت يفرق 5 ساعات ..
رحت لـ غرفتي اكل بـ أظافري احس روحي مامرتاحه ..
