မြွေသားရဲ၏ဇနီးသည် 【MM Translation】

(42)

(Unicode)

ရက်စက်ကြမ်းကြုတ်သော သားရဲအော်သံသည် ချိုင့်ဝှမ်းတစ်လျှောက်တွင် ပဲ့တင်ထပ်သွားပြီး ဒေါသအရှိန်ကြောင့် ကမ္ဘာတစ်ခုလုံးကို ဝါးမြိုတော့မတတ်ပင်။ ရှုကျင်ထျန်းမှာလည်း အိမ်မက်ကမ္ဘာထဲနစ်မြောနေလေ၏။ တိရိစ္ဆာန်အရေခွံဖြင့် ဖုံးအုပ်ထားသော သူ၏ခန္ဓာကိုယ်က အနည်းငယ် တုန်ယင်သွားသည်။ မျက်မှောင်ကြုတ်ထားပြီး နဖူးမှချွေးများက တစက်စက်ကျဆင်းနေကာ သူ့မျက်နှာမှာလည်း သွေးရောင်ကင်းမဲ့လျက်ပင်။

ရှုကျင်ထျန်းသည် မျက်ခွံများကို တင်းတင်းစေ့ပိတ်ထားလိုက်သည်။ သူ၏အားနည်းသောနှုတ်ခမ်းများက ဖွင့်လိုက်ပိတ်လိုက်ဖြင့် တစ်ခုခုပြောနေပုံရသော်လည်း အသံမထွက်နိုင်ပေ။

ရက်စက်ကြမ်းကြုတ်တတ်သည့် ထိုလူ၏မျက်နှာသည် သွေးဆာနေသော အပြုံးများဝေဆာနေ၏။ ထိုလူသည် ရှုကျင်ထျန်း နားမလည်နိုင်သော စကားလုံးများစွာကိုပြောရင်း ကြီးမားသော သားရဲတစ်ကောင်ကို သယ်ဆောင်လာပြီး ရှုကျင်ထျန်းထံသို့ ခြေတစ်လှမ်းပြီးတစ်လှမ်း ချဉ်းကပ်လာခဲ့သည်။

ရှုကျင်ထျန်း၏နှလုံးသားလေးမှာ ရုတ်တရက် တုန်လှုပ်ထိတ်လန့်နေ၏။ သူ၏ ထိတ်လန့်နေသော ရုန်းကန်မှုသည် မမြင်နိုင်သော စွမ်းအားအချို့ဖြင့် ချည်နှောင်ထားသလိုပင်။ သူ့ကို ချည်နှောင်မထားမှန်း သိသာပေမယ့် ရုန်းမထွက်နိုင်အောင်ရှိလေ၏။ ခြေလှမ်းများနီးကပ်လာသည်နှင့်အမျှ သူ့မှာ မတတ်သာဘဲ ငေးကြည့်နေရုံသာရှိတော့သည်။

အချိန်တွေ မရေမတွက်နိုင်အောင် နှောင့်နှေးသွားသလိုပဲ။ ထိုသားရဲက ခြေလှမ်းကျဲကြီးတွေနဲ့ ချဉ်းကပ်လာပေမယ့် သူ့အနားကိုမရောက်နိုင်။ ရှုကျင်ထျန်းသည် မရှောင်တိမ်းနိုင်ဘဲ သူ့ဆီလာနေသော သားရဲကိုသာ ကြည့်နေခဲ့ရသည်။ ခြေလှမ်းတိုင်းက သူ့နှလုံးသားကို နင်းခြေသွားသလိုပင်။ ရှုကျင်ထျန်းသည် ထိတ်လန့်မှုကြောင့် တုန်ယင်သွားပြီး အသက်ရှူမှားသွားရလေ၏။

အကွာအဝေး မည်မျှပင်ရှိစေကာမူ အဆုံးသတ်သွားမည်သာ။ ထိုသားရဲက သွေးများရွှဲနစ်နေသော သားကောင်ကို လည်ပင်းမှကိုင်မြှောက်လိုက်ပြီး ရှုကျင်ထျန်း၏ပါးစပ်ထဲသို့ ညှစ်ထည့်လိုက်သည်...။