[Unicode]
" ရှင်း "
တိမ်ယံဆင့် တိုးတိမ်စွာရေရွတ်လိုက်သည်။ ဝင်လာသူက လေပြေရှင်းပင်ဖြစ်သည်။ မျှော်လင့်နေသောသူမဟုတ်တဲ့အတွက် ဆင့်ကအနည်းငယ် စိတ်ဓာတ်ကျသွားသော်လည်း ဟန်မပျက်စကားပြောလိုက်သည်။
" မင်းဘယ်လိုလုပ်ပြီး ရောက်လာတာလဲ "
" တိမ်ယံဆင့်ကို လာကြိုတာပါဗျာ "
ရှင်းကပြောင်စပ်စပ်ဖြင့် ပြန်ဖြေလေသည်။ သို့သော်ဆင့်က သူငယ်ချင်းနှင့်အတူ မနောက်ပြောင်ချင်တဲ့အတွက် မရယ်ရသောဟာသကြောင့် နည်းနည်းလေးတောင် မပြုံးမိခဲ့ချေ။
" လာနောက်မနေနဲ့ "
" ဘာဖြစ်နေတာလဲ မှိုင်တိုင်တိုင်နဲ့ ဒါကငါသိတဲ့တိမ်ယံဆင့်ကော ဟုတ်ရဲ့လား "
" .......... "
" သွားမယ် စောင့်မနေနဲ့တော့ သူလာမှာမဟုတ်တော့ဘူး "
" ငါဘယ်သူ့ကိုစောင့်နေလို့လဲ "
ခဏအကြာတွင် တိမ်ယံဆင့်က တိုးဖွစွာပြန်ပြင်ပြောလေသည်။
" သူမလာတာမင်းက ဘယ်လိုသိလဲ "
" မင်းကို ဒီနေ့တစ်ရက် လာကြိုပေးဖို့အတွက်
ကိုပြဒါးရံကိုယ်တိုင် ဖုန်းဆက်ထားတာ "
" သူကမင်းကိုဖုန်းဆက်တာလား "
" လာ....ပြန်မယ် ဘယ်သူမှမရှိတော့ဘူး "
တုပ်တုပ်မလှုပ်ဘဲထိုင်နေသော တိမ်ယံဆင့်ကို ရှင်းကလက်ကနေဆွဲကာ ကားထဲထည့်လိုက်သည်။
" မင်းတို့ဆက်ဆံရေးပိုကောင်းလာကြတာပဲ အရင်ကဆိုမျက်နှာချင်းတောင် ဆိုင်လို့ရတာမဟုတ်ဘူး။ တွေ့လိုက်တာနဲ့ စကားများနေကြတာ "
ဆက်တိုက်ပြောနေသော လေပြေရှင်းစကားကို လျစ်လျူရှု၍ ဆင့်ကစကားလမ်းကြောင်းလွှဲလိုက်သည် ။
" မင်းလည်းကိုးလ်နဲ့ တော်တော်မဆင်ပြေနေတာပဲ မဟုတ်ဘူးလား "
" ငါတို့ကသူငယ်ချင်းတွေပါ "
လေပြေရှင်းက ချက်ခြင်းပင်အဖြေပြန်ပေးလေသည်။ သူနှင့်ကိုးလ်ဟာ သူငယ်ချင်းတွေသာဖြစ်ပါကြောင်း။ ထို့ထက်အဆင့်မပိုကာ ဘယ်တော့မှလည်း ထပ်မလွန်လာမည့် ပုံသဏ္ဍာန်ဖြင့်။ ဒီစကားဝိုင်းတွင် ဆင့်က သူကိုယ်သူရှုံးသွားကြောင်း သိနေလေပြီ။ အကြောင်းမှာ သူ့ထံတွင် ပြန်ခွန်းတုန့်ပြန်စရာ စကားမရှိပါသောကြောင့်ဖြစ်သည်။ လေပြေရှင်းနှင် ကိုးလ်က သူငယ်ချင်းတွေ။ ရှင်းကထိုအရာကို တွန့်ဆုတ်ခြင်းမရှိပြန်ဖြေနိုင်သည်။ ဒါဆိုသူနှင့် ပြဒါးရံကကော ဒီတိုင်းသူငယ်ချင်းတွေပါပဲလား။ သို့သော် ရှင်းအပေါ်ခံစားရသည့် ခံစားချက်နှင့် ပြဒါးရံနှင့်အတူရှိနေရသည့်ခံစားချက်က နည်းနည်းလေးမှမတူတာကိုတော့ တိမ်ယံဆင့် ခွဲခြားသိလေသည်။ ဆင့်ကခေါင်းကိုထပ်ခါလိုက်ပြီး တိတ်တဆိတ်သာနေလိုက်တော့သည်။
YOU ARE READING
Hate Poem Written With Love࿐
Fantasyရင်ထဲမှာ နက်ရှိုင်းစွာနာကျင်စေတဲ့ ခံစားချက်ကို ဆွဲထုတ်လိုက်တဲ့အခါ မင်းကြောင့်ပဲဆိုတာ သိလာတယ်။ " မင်းဟာလေ....စေ့ပိတ်ထားတဲ့ တံခါးတွေကို ဆွဲဖွင့်ပြီး ဒူးထောက်လာအောင် ပြုစားနိုင်တယ်။ " " မင်းဟာလေ.....အကြည့်တစ်ချက်နဲ့ ကိုယ့်အသိစိတ်ကို လောင်ကျွမ်းစေနိုင်...
