Hate Poem Written With Love࿐

[55]

[Unicode]

လေပြေရှင်းရဲ့ကားမှာ ပြိုင်ပွဲကွင်းထဲ ဗိုလ်လုပွဲ ယှဉ်ပြိုင်နေရ‌သည့် ကားတစ်စီးနှယ်ပင်။ သူဟာ မီးနီ ဘယ်နှစ်ခုလောက်ကို ဖြတ်‌မောင်းခဲ့လဲ မမှတ်မိတော့သော်လည်း မျက်စိရှေ့‌၌မြင်နေရသည့် နောက်ထပ်မီးနီတစ်ခုကိုပါ တစ်ချက်ကလေးမှ မတွန့်ဆုတ်ဘဲ ဖြတ်မောင်းလာခဲ့လေသည်။ လီဗာကိုအသားကုန်တင်လျက် လေအလျင်နဲ့ အံတုနေသည့် အသွင်သဏ္ဌာန်တို့ရောယှက်နေပါသော်ငြား ရှင်းရဲ့ ကားက ရပ်တန့်သွားဖို့ အစီအစဉ်မရှိသည့်အပြင် ပို၍ပင် လျင်မြန်လာလျက် ရှိပေသည်။

ကားဆီမှ အရှိန်လျော့ဖို့ အချက်ပေးသံများ တရဆက်ထွက်ပေါ်လာသည့်အပြင် လမ်းပေါ်မှာဝိုင်းတားကြတဲ့ မော်တော်ပီကယ်များကိုတောင် ရှင်းက အဖက်လုပ်၍ ဂရုစိုက်မနေခဲ့ပေ။ အချိန်အတိုင်းအတာတစ်ခုအကြာတွင် လေပြေရှင်းတစ်ယောက် ထိုဆောက်လက်စ အဆောက်အဦးနားကို ရောက်လာခဲ့ပြီဖြစ်လေသည်။ ရှင်းက ထိုနေရာတွင် ဦးစစ်ဟန်၏ လူများနှင့်အပြည့်ဖြည့်ထားလိမ့်မည်ဟု မျှော်မှန်းထားသော်လည်း ဆန့်ကျင်ဘက်ဖြစ်နေသည့်အခြေအနေနှင့် ကြုံတွေ့လိုက်ရသည့်အခါ အနည်းငယ်မျှ အံ့အားသင့်သွားခဲ့သည်။ ဦးစစ်ဟန်က ဘာတွေကြံစည်နေလဲဆိုသည်ကို အဖြေရှာရန် ရှင်းက အားလပ်မနေခဲ့ပေ။ အမြဲဆောင်ထားလေ့ရှိသော သေနတ်တစ်လက်ကို ကျည်အပြည့်ဖြည့်လိုက်ပြီး အင်္ကျီကြားထဲ၌ဖွက်ကာ လှေကားမှတစ်ဆင့် အပေါ်ထပ်ကို သတိကြီးကြီးဖြင့် တက်သွားလိုက်သည်။

အဆောက်အဦးက နံရံတွေမရှိသည့်အတွက် အတွင်းဘက်ကို အကုန်လုံးဖောက်ထွင်းမြင်နေရတာကြောင့် ရှင်းရဲ့ စွန်ရဲတစ်ကောင်လို စူးရှပြတ်သားသည့် မျက်လုံးတစ်စုံသည် သားကောင်ကိုအမြန်ဆုံးရှာတွေ့ရန်အတွက် အထောက်အကူကောင်းဖြစ်သည်။ လှေကားတစ်ဆင့်တက်လိုက်တိုင်း မမြင်ရသည့် ဆူးချွန်တစ်ချောင်းက နှလုံးသားကို ထိုးစိုက်နေခဲ့သလိုပါပင်။ သူဟာ လေးလံနေသော ခြေလှမ်းများကို အဆုံးသတ်လိုက်ချင်ပြီ ဖြစ်သော်လည်း သူ့ဦးနှောက်ကအပြင်းအထန်တားမြစ် ဆန့်ကျင်နေခဲ့ခြင်းကြောင့်သာ လက်မလျော့နိုင်ခြင်းဖြစ်သည်။ လှေကားတစ်ဆင့်တက်လိုက်တိုင်း ထိုးစိုက်လာတတ်သည့် ဆူးချွန်တစ်ခုကြောင့် ယခုသူ့နှလုံးသားမှာ ဆူးချွန်များပတ်ပတ်လည် ထိုးစိုက်နေလိမ့်မည်ဖြစ်ကာ ပုံသဏ္ဌာန်အမှန်ကို မြင်ရဖို့တောင် ခဲယဉ်းလှချေပြီဖြစ်သည်။