《Wolf pair》- ဘာသာပြန်

Chapter - 16

Chapter ● 16 ●

ခုတင်ပေါ် လှဲလိုက်ပြီးနောက် ပျန်းနမ်မှာ လူတစ်ကိုယ်လုံး သက်သောင့်သက်သာဖြစ်ပြီး အပန်းပြေသွားတော့သည်။ ကိုယ်ပေါ်တွင် ခြုံထားသော တဘက်စောင်နှင့်အမွေးပျော့စောင်ငယ် နှစ်ထပ်ကလည်း ဘာမှ မထူးခြားနေသော်ငြား၊ ကြမ်းပြင်ပေါ်တွင် လှဲအိပ်ရသည်နှင့်စာလျှင် များစွာပို၍နွေးထွေးသွားသည်။

နံဘေးတွင် လှဲအိပ်နေသူက တကယ်ကို ချိုးယိဖြစ်နေသည့်အချက်ကသာ သူ့ကို အနည်းငယ်နေသားမကျ ဖြစ်စေသည်။ ထို့ပြင် အနှီငနဲ ခြုံထားသည့်အမွေးပျော့စောင်က သူ့ခြုံထားသည့်စောင်ထက်ကို သိသာစွာ ထူထဲနေသည်။

အကယ်၍ ထိုလူက ဝမ့်ဖေးသာဆိုလျှင် သူ အစောကြီးကတည်းက ထိုစောင်ကို လုယူလာခဲ့ပြီ ... ...

ပျန်းနမ်၏အတွေးစိတ်ကူးတို့မှာ တောင်ရောက်မြောက်ရောက်ဖြင့် ဟိုဟိုသည်သည် ရွေ့လျားလှည့်လည်နေကာ ဘယ်လောက်မှ မကြိုးစားလိုက်ရပါဘဲ မိန်း‌မောနေရင်း မကြာမီအချိန်အတွင်းတွင် အိပ်ပျော်သွားတော့သည်။

ညလယ်ခေါင်လောက်တွင် အနည်းငယ်အသက်ရှူကျပ်သလို ချိုးယိခံစားလိုက်ရသည်။ နိုးလာချိန်တွင် မိုးတိတ်သွားခဲ့ပြီ။ အိမ်တံစက်မြိတ်မှ တတောက်တောက် ရေစက်ကျသံကိုသာ ကြားရတော့သည်။

သူ မျက်လုံးများကို ဖွင့်လိုက်သည်။ နားရွက်နားတွင် ခပ်နွေးနွေး လေပူလေးက လာရောက်ထိခတ်နေသည်။ သူ ခေါင်းတိမ်းကြည့်လိုက်သော် ပျန်းနမ်၏ နွေးထွေးသောဝင်သက်ထွက်သက်က သူ့မျက်နှာဆီ ဝင်ရောက်မိတ်ဆက်လာသည်။

"လခွမ်း ... ..."

ထိုတော့မှ ချိုးယိသိလိုက်ရသည်မှာ ပျန်းနမ်သည် လူးလှိမ့်ရင်း ဘယ်အချိန်ကတည်းကမှန်း မသိဘဲ ခုတင်အလယ်နားသို့ ရောက်လာနေပြီဖြစ်ကာ လက်မောင်းတစ်ဖက်က သူ့ရင်ဘတ်ပေါ်ကို လာတင်ထားသည်။

သူ မျက်မှောင်ကြုတ်လျက် ပျန်းနမ်လက်မောင်းကို ဖယ်ထုတ်ရန်အလုပ်တွင် ပျန်းနမ်က သူ့နားရွက်နားတွင် ဗလုံးဗထွေးရေရွတ်လိုက်ပြီး ခြေထောက်တစ်ဖက်မြှောက်ပြီး သူ့ကိုယ်ပေါ်ကို လာဖိလိုက်သည်။ ထိုခြေထောက်မှာ သူ၏ ကျောက်ပတ်တီးစည်းထားဆဲခြေထောက်ပေါ်သို့ လာတင်ရန် ပြင်ဆင်လိုက်သေးသည်။