《Wolf pair》- ဘာသာပြန်

Chapter - 32

Chapter ● 32 ●

ချိုးယိ ကြော်တဲ့ ကြက်ဥထမင်းကြော်ကတော့ ထုံးစံအတိုင်း အပြတ်အသတ် အံ့မခန်းဖွယ် ဖြစ်နေဆဲပင်။ ပျန်းနမ်နှင့်ချိုးယန့်တို့ တစ်ယောက်တစ်ပန်းကန် သယ်ပြီး စပျစ်စင်အောက်ရှိ စားပွဲဘေးနားတွင် ထိုင်လိုက်ကြသည်။

ကြက်ဥထမင်းကြော်၏မွှေးရနံ့ကို ရရှိသောအခါ ပျန်းနမ်၏အစာအိမ်မှာ အလွန်အကြူးပင် တဂွီဂွီ မြည်လာတော့သည်။

"စပျစ်သီးက ဘယ်အချိန်မှ သီးမှာလဲ"

ပျန်းနမ်က ထမင်းတစ်လုတ်စားပြီးနောက် ခေါင်းထက်ရှိ အုပ်အုပ်ဆိုင်းဆိုင်း ထူထပ်နေသော စပျစ်ပင်သစ်ရွက်များကို မော့ကြည့်လိုက်သည်။ စပျစ်တစ်ခိုင်မှကို မတွေ့ရချေ။

"နွေရာသီပိတ်ရက် ပြီးသွားရင်"

ချိုးယိက သခွားသီး တစ်ပန်းကန် ထပ်ယူလာပြီး စားပွဲပေါ်တင်လိုက်ရင်း ပျန်းနမ်ကို ကြည့်ကာ -

"ဘီယာ သောက်မလား"

"...... မသောက်ဘူး"

ပျန်းနမ် ကျွတ်ခနဲ စုတ်သပ်လိုက်ပြီး ဆက်၍ -

"ငါ ဘယ်လောက်ပဲသောက်နိုင်လဲဆိုတာ မင်းမသိတာလည်း မဟုတ်ဘူး။ သောက်ပြီးရင် မင်း ငါ့ကို ငေါ့တော့တော့တွေ ပြောချင်ပြောနေဦးမှာ။ မသောက်ဘူး"

ချိုးယိ ရယ်လိုက်ပြီးနောက် အိမ်ထဲဝင်ကာ ဘီယာတစ်ပုလင်း ယူထုတ်လာ၏။ ပုလင်းအဖုံးကို သွားဖြင့် ကိုက်ဖွင့်လိုက်ပြီးနောက် ပုလင်းကို စားပွဲပေါ် တင်လိုက်သည်။

"သား တစ်ငုံသောက်မယ် ရလားဟင်"

ချိုးယန့်က စားပွဲပေါ်တွင် မှောက်ရင်း မေးသည်။

"အင်း"

ချိုးယိ ပြန်ဖြေသည်။

ချိုးယန့်သည် ပုလင်းကို ဖက်၍ ယူလိုက်ပြီး တစ်ငုံ သောက်လိုက်သည်။ သောက်ပြီးသွားပြီးနောက် မျက်လုံးကလေးမှိတ်ကာ သံရှည်ဆွဲပြီး သက်ပြင်းတစ်ချက် မှုတ်ထုတ်လိုက်ရင်း -

"အေးနေတာပဲ"

ပျန်းနမ်သည် သူ့အား အတော်ကြာအောင် စိုက်ကြည့်နေလိုက်ပြီးမှ ချိုးယိကို လှည့်ကြည့်လိုက်ပြီး -