مذاق الحرمان بقلم لبنى الموسوي الناقل آدم العربي

الحلقة ٥٥

الحلقة ٥٥ من #مذاق_الحرمان
للكاتبة #لبنى_الموسوي

-- ( بعد مرور سـنـه )

فيض.. اباوع للتحاليل وافرك ايدي بتوتر
شويه عيني عليهن وشويه ع الدكتوره
چنت اراقب ردة فعلها وشنو ممكن راح تگول بعد هل نظرات الممفهومه

ظلت تقرا بيهن وتصعد وتنزل بمناظرها
الهي دخيلك ساعدني
دخيلك شيل هلافكار السلبيه من راسي لأن بداخلي احساس اكو شي مو زين راح اسمعه بعد ثواني معدوده

الدكتوره.. ماما فيض

فيض.. نعم دكتوره

الدكتوره.. انتي انسانه مؤمنه بقضاء رب العالمين وقدره وهالشي واضح على وجهچ

فيض.. ونعم بالله

الدكتوره.. بالعاده احنه نسعى حتى ننطي الأمل للمريض بس مو بحالتچ

فيض.. شلون يعني

الدكتوره.. يعني للأسف ومجبوره اگلچ بالحقيقه
طبياً يستحال حدوث الحمل عندچ إلا اذا شاءت قدرة القادر وصارت المعجزه

فيض.. ليش دكتوره شنو السبب

الدكتوره.. مبايضچ متوقفه عن عملها تماماً
ومثل هالحاله تحدث فقط في سن اليأس ونادراً جداً ما تحدث تحت هذا السن

يعني تگدرين تگولين كل مليون حاله وحده
بس حالتچ غريبه جداً
رغم توقف المبايض عن عملها بس العاده مستمره عندچ حسب ما سمعت منچ

شوفي ماما
هذا مؤشر ايجابي اما اكو امل او اكو خلل
ما اعرف والله بس اني عجزت اوصف حالتچ والظاهر عندي مبايضچ متوقفه تماماً وبهيچ حاله مستحيل يصير حمل

فيض.. زين دكتوره شنو السبب
ليش مريت بهاي الحاله واني بعدني بعمر العشرين

الدكتوره.. هاي ترجع لاسباب وراثيه او هرمونيه

فيض.. بس احنه ما عدنه هيچ حالات بعائلتنه

الدكتوره.. اذاً الاسباب هرمونيه

فيض.. افهم من كلامچ ماكو امل يعني

الدكتوره.. ما دام ربچ موجود فـ الامل اكيد موجود
انصحچ تطلعين للخارج اذا حالتچ الماديه تسمح يجوز يتوصلون العلاج مناسب الچ بس بالعراق ماكو شي يگدر يحفز المبايض حتى ترجع تشتغل وهي ميته 

فيض.. شكراً الچ دكتوره

الدكتوره.. كل الهلا حبيبتي

طلعت من يمها ميته
اجر بخطواتي مثل الغرگان بالبحر ويحاول يوصل البر الامان

اكثر من سنه مرت على زواجي وماكو حمل
بكل مره اريد اراجع بيها ماما ومرت عمي يوگفون بوجهي ويمنعوني لمن يگولون اگعدي واسكتي هواي بنات مثلچ يتأخر الحمل عدهن لبعد سنه من زواجهن