مذاق الحرمان بقلم لبنى الموسوي الناقل آدم العربي

الحلقة ١١

الحلقة ١١ من #مذاق_الحرمان
للكاتبة #لبنى_الموسوي

خيال.. دنگت منه ودموعي نزلت چان يعتني من زندي حيل ويرفع راسي بأيده

اسر.. باوعيلي يا چذابه
انتي واختچ نفس النقشه ثنينچن ملعبات وثنينچن چذابات لذالك ما اتشرف اتزوج وحده مثلچ وأأمنها على حياتي

مع الأسف لأن حبيتچ ومع الأسف ضيعت عمري واني انتظرچ تكبرين حتى اخذچ وتصيرين ام بيتي وجهالي

كلشي انتهى خيال
من اليوم كلشي بيناتنه انتهى يبت عمي ودفعني وطلع بسرعه

خيال.. اهدي خيال اهدي
لتضعفين
لتبچين
ابد مو وقت مشاعرچ ،، عسل تحتاج وگفتچ وياها حالياً اكثر من اي شي ثاني

تمشيت للباب قفلتها وجريت السرگي
لزمت موبايلي حظرت عمار ورجعت العسل لگيتها فاتحه عيونها وتون كالعاده : ها عسوله شوكت گعدتي

عسل.. سمعت صوت اسر

حيال.. يا اسر يمعوده !! متوهمه شيجيبه بهالليل

عسل.. خيال اريد شي يخفف وجعي داموت

خيال.. سوده عليه حبيبتي ،، هسه راح ادهنلچ جسمچ وانطيچ هذا المسكن بي نسبة منوم عاليه بلكت ترتاحين علي وتنامين

ظليت طول الليل گاعده وياها هي هم تنام دقايق وتگعد ساعه حقها اذا طاهر جارم بيها لو معتقل بيد جلاد ميسوي بي هالشكل

بالسته ونص شفتها نامت وما گعدت بعد خليت راسي ع القنفه اباوع عليها ومن التعب ما اعرف شلون غفيت على نفسي لحد مفزيت على صوت موبايلي كتمته بسرعه قبل لتگعد شفت حسام ديتصل

خيال.. الووو

حسام.. ها خوخه صباح الخير

خيال.. صباح النور

حسام.. بلا زحمه عليچ اني بالباب گومي فتحيها

خيال.. اي تتدلل

لبست حجابي وطلعت من الاستقبال لگيت بابا وماما بالمطبخ ديتريگون صبحت عليهم ورحت فتحتله الباب بس شافني صفن بوجهي

خيال.. ها شبيك صفنت

حسام.. شبيهن عيونچ حمر

خيال.. ما نايمه هستوني يلا گدرت اخذلي غفوه قليله
تفضل فوت

حسام.. شلونها عسل

خيال.. شلونها يعني الليل كله منامت من الوجع سوده عليه

حسام.. وعمي

خيال.. زين گاعد ديتريگ ويا ماما

ليث.. ها وليدي شلونك

حسام.. انت الشلونك مو اني

ليث.. عمك حديد لتخاف علي

حسام.. ههههه دومك ان شاء الله
خيرك شو مبدل ترى ماكو شغل اليوم من هسه اگلك