الحلقه الأولى من #مذاق_الحرمان
للكاتبه #لبنى_الموسوي
مساء الـــ🌹ـورد
كل انسان في هذه الدنيا قد تذوق الحرمان بطريقة او بأخرى
فمنهم من حرم من ولده ومنهم من حرم من ابيه
امه
اخيه
زوجته
او حتى حبيبته
بعضهم قد حرم الامان
وبعضهم الحب
والبعض الاخر حرم من احترام الاخرين
الحرمان من الاموال لا يعد حراماً حقيقياً فـ اقسى انواع الحرمان هو حرمانك من جنتك على الارض الى ان ينتهي بك المطاف لتعيش في الجحيم حتى الرضا
فـ مذاق الحرمان يختلف طعمه عن مذاق الفقر كـ اختلاف الموت عن الحياة
_______________
خيال.. عسل عسل عسل گومي بسرعه
عسل.. باوعت عليها بملل افرك براسي وفاتحه تك عين : شكوووووو
خيال.. گومي عاد كافي كسل الساعه راح تصير ١١ وماما دتصيحچ
عسل.. يمعودين مو عطله شتريدون مني والله نعساااانه
انزلي گليلها متقبل تگوم ... ورجعت غطيت راسي
خيال.. جرت الغطه مني : گومي لچ شنو نسيتي اليوم عيد ميلادچ
بس سمعت اليوم عيد ميلادي طفرت من مكاني وصحصحت من الفرحه
عسل.. اي والله اليوم عيد ميلادي الله
خيال.. ههههه يروحي كل عام وانتي احلى وارق واجمل اخت بالدنيا كلها
الله ليحرمني منچ ويحققلچ كل التتمني ويا حسام
عسل.. باوعتلها صفح : انچبي واحچي عدل ولچ
هو شكو بيني وبين حسام حتى اتمنى شي ويا
خيال.. بس لو اعرف ليش متحبي چان ارتاحيت
عسل.. شبيچ خيال صدگ تحچين ؟!!
هاي وانتي اكثر بشر فاهمني بالدنيا حتى يمكن اكثر من نفسي
خيال.. مو هي هاي المصيبه .. اني فاهمتچ عدل بكلشي إلا بسالفة حسام ولاا اگدر اطلع للموضوع راس خيط
عسل.. ديلا كافي حچي انزلي قبلي
شويه واجي وراچ هسه ماما تستلمنه اكس مربع
خيال.. ههههه گولي تستلمني لأن انتي التنمبل اني گاعده من التسعه
عسل.. دمشي ام حلگ .... وضربتها بالمخده
خيال.. وداعة ليوثي اموت عليچ
عسل.. ههههه وداعة زنوبه اموت على لواگتچ
خيال.. ههههههه يلا انتظرچ لتتأخرين
عسل.. ماشي
نهضت من مكاني فرحانه لان ماكو شي يسعدني بالدنيا بگد الهدايا
مهما كانت بسيطه إلا انها تحسسني بقيمتي عند المقابل خصوصاً اهلي
باوعت للمرايا صارت صورة سجاد گبالي .. اخويه النفقد باحداث الشعبانيه بالـ ٩١ وحتى جثته ما حصلوها اهلي حتى يدفنوا حاله حال باقي الناس
