مذاق الحرمان بقلم لبنى الموسوي الناقل آدم العربي

الحلقة ٢٣

الحلة ٢٣ من #مذاق_الحرمان
للكاتبة #لبنى_الموسوي

روحي عقلت واختلف قانونها
العشره التعب بلاها ودونها
وياك كلش صار باهت لونها
ما تقدر !! غيرك يقدرونها
منك انه شحصلت غير المرار
ودمعة عيوني وسواد جفونها
وحرگة اعصاب وسهر شذكر اااف
طلعتها وياي من ماعونها
هسه احس مرتاح يا حب يا غرام
شوف وجهي وشوف صحتي شلونها

اول ما راح بچيت بحرگه
باوعت الموبايلي وكتبت رقم بابا الحافظته على غيبي مثل اسمي رن مرتين چان يجيني صوته بس سمعته شهگت

عسل.. الوو بابا

ليث.. منو !!!

عسل.. اني عسل

گبل سد الخط بوجهي
وگعت بالگاع منهاره كل جسمي يوجعني
گلبي يوجعني راسي يوجعني روحي توجعني حتى الدنيا ضاقت بعيني واحس نفسي بعد ما اگدر اجر الهوى الصدري واتنفس

خلص عسل محد يريدچ بعد باوعت للشارع شفت سياره دتجي من بعيد
گمت بسرعه اركض وشمرت نفسي گدامها بس ضرب بريك قبل لا يوصلي ونزل بسرعه

-شبيچ تخبلتي شنو تشمرين روحچ گدام السياره تردين تبليني بيچ

عسل.. دا اعبر اني ما شمرت نفسي

-اي واضح
باوعلي بنظرات تخوف اكيد شك اكو شي ورايه بعد ما شاف حالي و وجهي المتروس دم
گبل اخذت موبايلي وسويت نفسي اخابر

عسل.. الوو بابا وين صرت مو خشمي طگ دم من الحر
ها زين يعني وصلت اي واگفه ع الشارع بس تدخل بي تشوفني گدامك

-محتاجه شي

عسل.. لا شكراً

-ديلا روحي اوگفي على صفحه لا بنص الشارع لتسحگين

عسل.. اي ميخالف

مشيت بخطوات بطيئه خايفه وما اعرف شراح يصير اكثر من كل هذا
درت وجهي شفته راح جريت نفس بس چذب لو اگول انجر وكأنو طابوگه نايمه على صدري ماكو هوى يدخل بي نهائياً

ظليت اباوع للشارع لشوكت راح اظل واگفه هنا هسه لو داعمني ع الاقل اذا ما اموت انام بالمستشفى واخلص من الشارع
فجأه شفت سيارة ياسر طلعت من الفرع گبل ختلت قبل ليشوفني

عسل.. يلا عسل تصرفي اذا لگاچ ياسر مراح يرحمچ ابد

اخذت جهازي ورجعت اتصل بفداء
يلا فداء جاوب ... ابوس رجلك رد اختك محتاجتك وينك عنها 

ظل يدگ لحد ما فصل دا ارجع اخابر چان يتصل بيه عمار معناها عرف طلعت من البيت
باوعت داير مدايري هسه وين اروح اخاف يجي يدور عليه هنا ويلگاني وساعتها اخسر كرامتي قبل كل شي

ياربي ساعدني دخيلك ساعدني ما عندي غيرك بعدما الكل اتخلوا عني
مسحت خشمي بعباتي لأن الماي انشمر بنص الشارع من ردت اندعم اجه صوت حسام براسي : چم مره گتلچ ميمسحون بهدومهم عيب هالشي لشوكت اظل اعلم بيچ