مذاق الحرمان بقلم لبنى الموسوي الناقل آدم العربي

الحلقة ٤١

الحلقة ٤١ من #مذاق_الحرمان
للكاتبة #لبنى_الموسوي

عسل.. مر شهر وماكو شي جديد
چنت گاعده بالصاله اوكل خيال بالگوه الي من يومها صارت عايشه بس ع السوائل

سمعت الجرس اندگ قوي
نغزني گلبي وحسيت اكو شي راح يصير ورى هاي الدگه

حطيت الماعون ع الميز وطلعت اركض
صحت منوووو
هو اني سمعت صوت بابا لو عبالك روحي ردت الجسمي

ركضت للباب فتحتها وبدون مقدمات حضنته حيل
بقيت ابوس بي وابچي ممصدگه شايفنه گدامي واشتم ريحة الجنه بريحته الطيبه

ليث.. بنيتي تعبان ومستعجل وخري عني شويه

عسل.. رفعت نفسي منه امسح بدموعي
بابا شلونك وين اا
سكتت وظليت صافنه على شكله

هاي شصاير بي يربي ؟!!
هدومه مصبوغه بلأحمر ولحيته وشواربه وشعره عبالك مال سجين صارله سنه ما لازم المكينه بيده

عافني وطب سريع
رحت ورى لگيت ماما حاضنته وتبوس بي وهو يتأفأف بضجر ما اشوف إلا خيال اجت تركض
باوعتلها بصدمه

هاي شگومها ؟!!
مو چانت الصبح متحرك حتى ايدها منين اجتها هالطاقه فجأه !!!

خيال.. چنت فاصله عن كل شي
تعمدت ما اكل ولا اشرب بلكت اموت وارتاح من عذاب التفكير بـ اسر وابويه بس مصار هالشي لأن عسل واخواني چانو يشربوني سوائل مثل الطفل بالگوه واني ما عندي طاقه امنعهم

بعد شهر چنت متمدده بالصاله وعسل يم راسي
حسيت الجرس اندگ شويه وسمعت صوت ماما تبچي وتصيح ليث اجيت ممصدگه دا اشوفك بعيني

گبل گمت من مكاني
اي ما بيه طاقه بس كل حيلي رجعلي بمجرد تخيلت راح اعرف شي عنه وعن اسر
فركت راسي حيل حتى اگدر اركز ورحت اركض للممر

ياربي يطلع حقيقيه
يا رب بابا صدگ موجود ومديتراوالي حسه و وجوده بيناتنا
باوعت بخوف چان اشوفه گدامي گبل بچيت وركضت حضنته

خيال.. هذا انت رجعت
والله ممصدگه كل ضني رحت وعفتنه للأبد

ليث.. واني اگدر اعوفكم

خيال.. بابا اسر

ليث.. موجود بنيتي بس ادعيله

خيال.. ليش شبي

ليث.. تعبان كلش
قريب الشهرين وهو عايش تحت تعذيب هل ميخافون الله لحد ما حيله انهد

خيال.. وينه هسه
فدوه بابا احچي وييينه

ليث.. بـ اربيل
اجيت ابدل وانطيكم خبر حتى ارجعله
يمشي ويحچي ويانه عسل خابريلي حسام خلي يجي بسرعه

خيال.. رحت ورى الغرفته لگيته واگف گبال المرايه يباوع النفسه ما تحملت وگمت اشهگ بصوت عالي
دار عليه يباوعلي من فوگ ليجوه