مذاق الحرمان بقلم لبنى الموسوي الناقل آدم العربي

الحلقة ٦٤

الحلقة ٦٤ من #مذاق_الحرمان
للكاتبة #لبنى_الموسوي

بعدهن يحچن چان اسمع الصلفه گالت شلونچن بنات
رفعت راسي اباوع عليها والدمعه بطرف عيني
فاتحه عبايتها والبنطرون مشكگ وحصر والبدي طز بـ بابا تقريباً

حوراء.. هلا والله بالحلوه

شهد.. شكراً حبيبتي
عسل بلا زحمه عليچ گلاص مي ترى عطشانه كلش

حوراء.. صدگ چذب يمعوده بيچ خير وتتدللين

حچتها وراحت سدت باب المطبخ
باوعت عليها رجعت تضحك منشوفها إلا نزعت النعال ولزمت شهد دگ على راسها

بس شنو من هذا الضرب اليثلج الصدر
گبل ركضت فيض للباب الثانيه جابت شحاطة اسر الزوجين

شمرت وحده على حوراء والثانيه بـ ايدها
هاچ ولچ النعال ميوجع شحاطه شحاطه
ردت عليها حوراء عفيه بـ السباعيه طالعه ذيبه على بت عمچ

لزمنها ضرب وين اليوجعك واني واگفه اصيح عليهن
يا بنات عوفنها خطيه
وداخلي چان يرگص چوبي من الفرحه والسعاده

حسام.. نايم وحسيت بـ لمسات خفيفه على لحيتي
تفاجأت كلش
معقوله عسل حن گلبها عليه واجت حتى تصالحني ؟!!

فتحت عيني مبتسم
چان افز من مكاني لمن اشوف شهد گدامي
هاي شجابچ هنا !!

شهد.. اجيت اشوفك غير

باوعت عليها لبسها ابد مو تمام
شلت العبايه من السرير وشمرتها على وجها
بعد لتلبسين هيچ ملابس خصوصاً من تجين لهنا ترى معايشين وحدنه

شهد.. ههههه تغار عليه

حسام.. باوعتلها صفح
غيره سز لتصيرين واطلعي بره اريد انطمر

شهد.. اسفه لأن گعدتك
بس شـ اسوي غير ردت اشوفك واطمأن عليك

حسام.. چان انتظرتيني لمن اگعد
تدرين راجع من الدوام وتعبان والعصر هم عندي شغل لو ماكو عقل يفكر

شهد.. اي يلا لتضوج
هسه راح اعوفك واخذ راحتك بالنوم لحد متشبع

طلعت وسدت الباب وراها
شمرت نفسي على وجهي وغطيت راسي بالمخده ضاغط عليها حيل 

هي صح ما سوت شي
بس ما اعرف اني ليش انزعجت من تصرفها لهذي الدرجه

تعبت كلش
مگاعد اگدر اتأقلم ويا الوضع الحطيت روحي بي
من جهه تفكيري المستمر بعسل الدا يذبحني يوم بعد يوم

ومن جهه ثانيه دخول شهد الحياتي
هذا الدخول المگاعد اتقبله ولا بـ أي شكل من الاشكال رغم ادري بي صار واقع وانفرض عليه مثل اسمي بالضبط

بعدني افكر سمعت صوت هوسه بره
گمت من مكاني حتى اشوف شگاعد يصير
لگيت امي وبيبيتي واسر واگفين يم باب المطبخ ويحاولن يفتحوها بصياح