مذاق الحرمان بقلم لبنى الموسوي الناقل آدم العربي

الحلقة ٥٦

الحلقة ٥٦ من #مذاق_الحرمان
للكاتبة #لبنى_الموسوي

قبل النتائج بيوم
چنت واگفه بالمطبخ اشتغل قريب الضهر دگ جهازي
باوعت ابو قصي يتصل جاوبته بـ استغراب

عسل.. ها عمو

ابو قصي.. السلام عليكم

عسل.. وعليكم السلام

ابو قصي.. اني بالباب بنيتي
ابوچ دز مسواگ الكم بـ ايدي ذبي شي على روحچ وطلعي اخذيهن مني بلا زحمه عليچ

عسل.. اي عمو جايتك ثواني

شمرت السچينه من ايدي
رحت الغرفتي ع السريع اخذت عباتي لبستها ونزلت
بعدني بـ أول الممر ما اشوف إلا حسام طب

بقيت فاتحه عيوني من الصدمه
ممستوعبه الگاعد اشوفه گدامي معقوله هذا حسام
فجأه ضحك وفتحلي ايده ما صدگت روحي

ركض شمرت نفسي بحضنه
ولا ارادياً نزلت دموعي من الفرحه
حسيت بي شالني من الگاع حسام والله ممصدگه معقوله هذا انت لو دا احلم 

حسام.. ههههه لا متحلمين هذا اني رجعت

رفعت راسي لزمت وجها حيل
باوعلي مبتسم ومسح دموعي بـ ايده هاي ليش دتبچين ممكن اعرف

عسل.. شصاير بيك ليش هيچ ضعفان

حسام.. ههههه بس مو اضعف منچ
اني شوصيتچ قبل لا اروح ؟! هاي شصاير بيچ باقيه بس جلد وعظم

ردت اجاوبته تذكرت اسر
باوعتله فاتحه عيوني اخوك وين حسام
روحي صيحي امي وبيبي وتعالي

عسل.. ليش ؟!!

حسام.. دروحي ولتسألين

عفته ودخلت بس كل شويه التفت علي
خايفه ليكون حلم وبس اطب من الباب اصحى منه
توني بـ اول المرر اجت باجي

وئام.. هاي وين رحتي عسل

عسل.. صيحي بيبي وتعال للحديقه

وئام.. ليش شكو بالحديقه

عسل.. دتعالي اريد اراويچ شسويت

باوعتلي بدون متحچي وراحت
شويه واجتني هي وبيبي لزمتهن كل وحده بـ ايد وطلعت اركض

اول ما فتحت الباب صاروا حسام واسر گبالي
ظليت جامده من الصدمه بس باجي وبيبي ركضوا عليهم وصياحهم ترس المكان

يا ربي ممصدگه عيوني
هاي شنو اسر واگف على حيله ؟!!
صح بالعگازات بس المهم رجع واگف مو ع الكرسي مثل ما راح

وئام.. يا يمه معقوله حقيقه وگفتك اسر لو اني بحلم

اسر.. لا يمه حقيقه

الحجيه.. الف الحمد لله والشكر
الحمد لله من شغناك واگف على طولك مره ثانيه يبيبي

حسام.. كافي لتتعبوا
خلي يدخل للصاله وعود اشبعن بچي وبوس