الحلقة ٥٠ من #مذاق_الحرمان
للكاتبة #لبنى_الموسوي
الجمعه بلليل چنت گاعده بالصاله اكرز حب ويا خيال ونباوع مسلسل تركي فجأه سمعت صوت حسام
درت وجهي متعجبه شفته ديسلم على بابا
العصر چان يحچي ويايه مگلي راح اجي لهنا
گمت سلمت علي ورحت للمطبخ
جهزت الچاي وچنت مسويه كيك ويا خيال
رتبته بالمواعين واخذته للصاله قدمتلهم وگعدت
ديحچون فجأه حسام گال
عمي احسب حسابك الخميس الجاي عرسي على عسل
گبل باوعتله بصدمه چان يبتسم بوجهي
ليث.. ها يعني قررت
حسام.. اي عمي
مثل متعرف راح اسافر ويا آسر علمود علاجه
والله يعلم شگد نتأخر هناك فـ خلي نتزوج قبل لا اسافر احسن
عسل.. بس ما گتلي حسام
حسام.. هاي اني گاعد اگلچ هسه
ليش عندچ شي لو حابه تطولين الخطوبه اكثر
زينب.. لا يمعودين كافي
راح يصيرلكم سنه مخطوبين والاقارب گرعوا راسي على ابو ما حددتوا العرس وشوكت ناوين يتزوجون
عسل.. ممكن نحچي شويه حسام
ليث.. اي اخذوا راحتكم وليدي
گمت سبقته للاستقبال وهو بقى يحچي ويا فداء
دقيقتين واجه ورايه
سديت الباب وباوعتله مدري ليش خفت من صارت الشغله صدگ يمكن لأن چنت متصوره زواجنا يتأخر لحد ما آسر يصير زين ويخلص علاجه
حسام.. شبيچ عسل !!
عسل.. ليش راح تسافر انت حسام
حسام.. لعد منو يسافر
عمي راد يروح بمكاني بس شغله ميتحمل تأخير
بعدين آسر محتاجني يمه بهيچ وقت اكثر من اي شخص ثاني
عسل.. وشگد راح تطولون هناك
حسام.. ما ادري بس اكيد مو اقل من ٦ اشهر
عسل.. حييييل
حسام.. لعد شعبالچ
عمليه وعلاج طبيعي يعني مو هينه الشغله حتى ترديها تخلص بين ليلة ويوم
عسل.. زين لعد ليش منأجل الزواج لحد مترجعون بالسلامه
يعني هيچ هيچ انت ماكو على شنو نتزوج بعد
حسام.. كل شي يصير عسل
بعدين نتزوج احسن حتى تترتب حياتنا واريدچ هالسنه ترجعين للدراسه وانتي يمي
بعدين لتنسين امي وبيبي راح يبقن وحدهن
يعني ضروري تظلين يمهن بفترة غيابي احسن ما يصيرلهن شي ومحد يعرف لا سامح الله
عسل.. بس اني ما جاهزه حسام
ليش فاجأتني هيچ چان گتلي قبل اسبوعين ع الاقل جتى اجهز نفسي
حسام.. بس اني مهدت الچ لمن خليتچ تجهزين كل احتياجاتچ تقريباً
شعندچ نواقص بعد بس گولي وانا حاضر
