مذاق الحرمان بقلم لبنى الموسوي الناقل آدم العربي

الحلقة ١٤

الحلقة ١٤ من #مذاق_الحرمان
للكاتبه #لبنى_الموسوي

حسام.. گاعد بمكتبي حتى ما اگدر اشتغل راسي يريد يطگ من القهر والتفكير و وجع ايدي ياكل بگلبي ابد مچان سهل عليه اتقبل الموضوع وانسى بليله ويوم

بهلاثناء اتصلت والدتي عرفت صاير شي لأن مو بالعاده تتصل بهيچ وقت وبس فتحت الخط تفاجأت بصياحهم العالي

حسام.. شصاير يوم شبيكم

وئام.. ولك يمه الحگ اختك وگعت من طولها وماكو احد يمنه بالبيت حتى يساعدنه
تعال بسرعه حسامممممم قبل لا يصيرلها شي وتروح من ادينه

حسام.. جاي مسافة الطريق
سديت الخط وطلعت اركض لغرفة آسر لگيت فداء يمه

اسر.. شبيك حسام

حسام.. خابرتني امي تگول فيض متخربطه گوم ويايه بسرعه

فداء.. شبيها فيض

اسر.. ولك شبيها احچييييي

حسام.. وشمدريني مو گاعد يمكم فضني خلي نروح ونعرف شبيها

فداء.. جاي وراكم بس ابلغ ابويه والحگكم

حسام.. وصلنه للبيت لگيت فيض متمدده بالگاع وامي تغسل بوجها وتبچي
ركض اسر شالها واخذناها للمستشفى شويه ولحگونه عمي وفداء

ليث.. حسام شبيها فيض

حسام.. ما ادري عمي لحد الان ما طلع واحد يطمنه

ليث.. هسه راجعلكم
راح شويه ورجعلنه : هبوط حاد وانهيار عصبي شبيها اختكم فهموني ؟!!

اسر.. عمي مندري حالنه حالك متفاجأين من الصار

ليث.. يعني شلون متدرون !!!
غير انتو اخوانها وعزوتها
غير واحدكم بالنسبه الهم السند والظهر والاب قبل ليكون مجرد اخ

حسام.. عمي بالله العظيم الصبح مچان بيها شي حتى حاولت تشاقيني قبل لا تطلع للدوام بعد ما شافتني تعبان وضايج
يعني اني لو حاس بيها شي مستحيل اخليها تروح بلا ما افهم منها

اسر.. صح كلام حسام حتى اني البارحه بلليل چانت گاعده ويايه تباوع فلم كوميدي وتضحك يعني چانت طبيعيه وممبين بيها شي نهائياً

ليث.. خير ان شاء الله خلي تگوم بالسلامه واشوف شنو وراها

حسام.. بقينه ننتظر قريب الساعتين يلا گدرنه نطلعها
وصلنه للبيت دخلتها الغرفتها چان عمي يطلب من الكل يطلع حتى يظلون وحدهم

فيض.. ما عرفت شصار ويايه بالضبط فجأه صحيت واني بالمستشفى شويه وشفتهم فوگ راسي بس محد منهم حچه شي غير الحمد لله ع السلامه

باوعت الفداء چان الخوف واضح بعيونه
ما اعرف خاف عليه لو على نفسه من الراح يصير لو اني گلتلهم شنو السبب الوصلني الهاي الحاله