مذاق الحرمان بقلم لبنى الموسوي الناقل آدم العربي

الحلقة ٩

الحلقة التاسعة من #مذاق_الحرمان
   للكاتبه #لبنى_الموسوي

خيال.. بعد ما جاب حسام غرفة النوم ونصبها رحنه نشوفها اني وماما وعسل
چنت واگفه وياهم وعيوني تتجول بين قطع الغرفه نازكه وموديلها حديث اما الوانها تفتح النفس على گد ما هادئه وبسيطه

باوعت الاسر اشرلي بعيونه وطلع بسرعه
عرفته يريد يحچي ويايه استغليت انشغال الكل وانسحبت من بيناتهم بهدوء ولگيته ينتظرني بأول الدرج :
ها اسر خير

اسر.. خيال اريد اسألچ سؤال ومن هسه اگلچ بغير الصراحه ما اقبل

خيال.. يا ستار يا رب شكو شصاير وگعت گلبي

اسر.. الصراحه خيال

خيال.. احچي يمعود واكيد اجاوبك بصراحه

اسر.. شبيها عسل مو طبيعيه ؟! احد جابرها على حسام احچيلي

خيال.. ياااا منين دتجيب هالحچي اسر

اسر.. من حسام
اي لتباوعيلي هيچ حسام شكالي منها گال احسها مجبوره عليه لدرجة متطيق تحچي كلمتين ويايه وتتهرب مني باستمرار

انتي اختها خيال واقرب الناس الها يعني اكيد تعرفين شبيها لذالك دا اسألچ واريدچ تحچيلي سرها حتى اذا فعلاً مجبوره كل واحد يروح بطريقه من هسه احسن ما تتعذب هي واخويه بالخالي بلاش

خيال.. يمعود يا سر هذا !!
صدگني متوهم ماكو هيچ شي لأن عسل تحب حسام وتريده المسأله وما بيها ضغوطات الدراسه والدوام وهاي الامور الكلنه مرينه بيها من قبل

اسر.. متأكده خيال

خيال.. اي وداعتك عندي

اسر.. خير ان شاء الله
ما گلتيلي عجبتچ الغرفه لو لا

خيال.. غير تموت

اسر.. يوم النشتري غرفتنه سوه وغمزلي

خيال.. هههههه ان شاء الله

كلش خفت من شفت الشك بعيون اسر بس مستحيل اگدر اتجرأ واگله اختي تحب شخص غير اخوك
هي كلها ايام ويتزوجون واكيد تنسى عمار لأن حسام ماكو منه وراح تكتشف عسل هذا الشي بعد متعاشره كـ زوج وزوجه

اجه موعد زواج عسل وحسام وصار التوتر واضح على ملامحها
حسيت اكو شي مو طبيعي بيها ولمن سألتها صاير وياچ شي چان جوابها مجرد توتر وقلق طبيعي حالي حال باقي البنات

وبيوم العرس گعدت على المنبه الساعه سبعه لأن عندي هواي شغل بعدني ممخلصته
غسلت ورحت العسل اگعدها ما لگيتها بالغرفه دورت عليها بالحمام الصاله الاستقبال المطبخ السطح الحديقه بس ماكو فص ملح وذاب

رحت الغرفتي اركض اخذت موبايلي وخابرتها چان اسمع صوت جهازها بالغرفه كيفت عبالي موجوده دخلت ع السريع شفته مشمور ع الچربايه