مذاق الحرمان بقلم لبنى الموسوي الناقل آدم العربي

الحلقة ١٦

الحلقة ١٦ من #مذاق_الحرمان
للكاتبة #لبنى_الموسوي

اسر.. بيها الخير بلكت تصير القسمه ونتزوج بيوم واحد

زينب.. صلوات على محمد ليش ناوي تتزوج

اسر.. اي باجي

وئام.. شو ما گتلي اسر هاي واني يوميه يوگع لساني واني اقنع بيك وباخوك حتى ترضون اخطبلكم

اسر.. بالجديد يمه الشغله صارت فجأه

زينب.. ضحكت وباوعت عليه : ومنو هاي سعيدة الحظ

اسر.. زميله بالعمل ويايه

خيال.. فتحت عيوني علي من الصدمه
احس ضربات گلبي صارت براسي وگوه حابسه دموعي حتى لتفضحني
چان يباوعلي ويگول : استعدي يوم نهاية الاسبوع ترحين تخطبيلياها من اهلها
درت وجهي عنه احاول الزم نفسي لأن لو بيدي اگوم اكله باسناني حتى تبرد نار گلبي

زينب.. بالخير عليك ان شاء الله

اسر.. رحم الله والديچ باجي
يلا اذا ممحتاجين شي صار لازم اروح

وئام.. لا يمه سلامتك

خيال.. بقيت گاعده على اعصابي اسمعهم يتناقشون بخطوبة فيض وفداء بس بالي مو يمهم
استمر الكلام اخذ وعطه لحد ما باجي گالت نسأل اخوانها ويصير خير ،، چلبت بينه ع العشه بس اني شاورت ماما حتى نروح وعلمودي رفضت نبقى واول ما وصلنه للبيت انصدمت بيها من گالتلي

زينب.. اسر مو چان رايدچ شنو هسه يگول اريد اخطب زميله بالعمل

خيال.. منيلچ هالحچي ماما

زينب.. اني مو غشيمه خيال والغلطه الصارت ويا عسل مستحيل اسمحلها تتكرر وياچ

خيال.. هاي شبيچ ماكو هيج شي متوهمه صدگي

زينب.. شنو دتضحكين عليه لو على روحچ 
بسرعه احچي شصار بيناتكم وليش فجأه قرر يخطب غيرچ

خيال.. للمره الألف اعيد واكرر بيني وبين اسر ماكو اي شي
ثم انتي على شنو ضايجه وحارگه دمچ واذا خطب قابل فد نمونه هو يطبه مرض ما كاتله نفسي علي

زينب.. واضح ما بيناتكم شي من اعصابچ وغلطج علي
اول تالي تحچين على اسر !!! اني امچ خيال حافظتچ حتى اكثر من نفسي فـ لتحاولين تقنعيني اعصابچ وحرگة گلبچ هاي ما وراهن شي

خيال.. تتعشين لو لا

زينب.. جاوبي خيال

خيال.. تتعشييين

زينب.. لا ما اشتهي

خيال.. لعد صاعده لغرفتي ارتاح اذا احتاجيتي شي صيحيني

زينب.. بسيطه خيال اول وتالي اعرف شضامه عليه وساعتها شوفي الحساب شلون راح يصير

خيال.. الله كريم