နှလုံးသားနူးညံ့သောဗီလိန်နှင့်လက်ထပ်ခြင်း [ဘာသာပြန်]

Chapter-74 ကိုက်ခြင်း

Clickဖို့မမေ့ကြပါနဲ့ရှင့်🌻

Title - ကိုက်ခြင်း

ရွမ်းကျောင်၏အသံမှာ တိုးညင်းသော်လည်း ထင်းမီး တဖျစ်ဖျစ်မြည်သံ တစ်ခုတည်းသာရှိသည့် ဂူထဲတွင် အလွန်ပင်ထင်ရှားနေလေ၏။

ယွမ်ချိုးချိုး၏လက်များသည် တုန်ရီနေဆဲဖြစ်ပြီး သူမ၏ရှည်လျားပျော့ပြောင်းကာ နက်မှောင်နေသည့်ဆံပင်အား လက်ချောင်းတို့ဖြင့် အသာအယာသပ်တင်လိုက်ရင်း နားများတွင် ပြဿနာတစ်စုံတစ်ရာများ ရှိနေသလားဆိုသည်ကို တစ်ခဏလောက် တွေးမိသွားရလေသည်။

ရွမ်းကျောင် ယခုလေးတင် ပြောလိုက်သည်က...

သူ သူမကို ကိုက်ချင်သည်?????

ယွမ်ချိုးချိုး၏ နီရဲနေပြီးသား ပါးပြင်တို့မှာ ချက်ချင်းပင် ပိုမိုနီရဲလာရသည်။ 

သူမမှာ သူမ၏ခံစားချက်တို့ ဤဝံပုလွေအပေါ်တွင် သာမန်မဟုတ်ကြောင်း ယခုမှ သဘောပေါက်သွားရုံ ရှ်ိသေးသည် သူ‌ပြောလာသည်က ... သူ ... သူမအား ... ကိုက်ချင်သည်???

သူ သူမအား မည်သို့မည်ပုံ ကိုက်ကာ မည်သည့်နေရာသို့ ကိုက်မည်နည်း.......

အသက်တစ်ချက်ရှူစာအတွင်းမှာပင် ယွမ်ချိုးချိုး၏ခေါင်းသည် ယောက်ယက်ခတ်နေသည့် အတွေးမျိုးစုံတို့ဖြင့် ပြည့်နှက်သွားလေပြီး ဖြေရန်ပင် မေ့သွားတော့လေ၏။

ရွမ်းကျောင် အချိန်အကြာကြီး ကြာပြီးသည်အထိ အမျိုးသမီးလေ၏ အဖြေကို မကြားရပေ။ အပြစ်ရှိစိတ်နှင့် နောင်တစိတ်တို့ကြောင့် နာကျင်နေခဲ့ရသော နှလုံးသားသည် တဖြည်းဖြည်း တင်းကျပ်လာ၏။ သူ၏အသံထဲက ဗလာဖြစ်မှုကို ထိန်းထားရန် အကောင်းဆုံးကြိုးစားနေရကာ ဤလူသားအား အိပ်ယာပေါ်သို့ ချက်ချင်းဖိချလိုက်ပြီး အထိန်းအချုပ်မရှိ လျက်ကာကိုက်ပစ်ရန် ဆူညံအော်ဟစ်နေကြသည့် နတ်ဆိုးဆန်ဆန်အတွေးများကိုလည်း သည်းခံနေရ၏။

ယွမ်ချိုးချိုး အချိန်အတော်ကြာအောင် တိတ်ဆိတ်နေခဲ့ပြီးနောက် သူ ကျိန်းစပ်နေသည့်မျက်လုံးများကို ဖြည်းညင်းစွာသာ ပိတ်ချလိုက်တော့၏။ "ရပါတယ် ကိစ္စမရှိပါဘူး"ဟူသော စာကြောင်းအား သူပြောရန်လုပ်လိုက်သော်လည်း စကားတစ်ခွန်းပင်ထွက်မလာ။