Mga Tula Ni Mang Wengs

Ro Baeay sa Tunga it Sapa

Ro Baeay sa Tunga it Sapa
(Bahay Sa Gitna ng Sapa)

- Isang tulang Aklanon (wika ng mga taga Aklan)

Samtang naga hiyum-hiyum ag gabaktas sa kaesada
Naghuyop do hanging maeamig sa akong abaga
Sa akong huna-huna mauean baea?
O basi mag dueogdug ag kilat ag magkupag kita.

Nagpundo sa may sapa ag nagpahuway
Nakibot ako sa akong nakit-an, mabahoe nga baeay?
Nagkurinot, nangawa ag gin punasan ko ang mata
Haman ta may baeay nga mansyon sa tunga it sapa ngara?

Matsa naging istatwa ako ag indi makahueag
May nag eapit nga isaea ka magueang
Naghambae, "Gusto magsueod anay sa among baeay?"
Wa ako kasayod ag nagsabat akon it, "Huo lo."

Ginbuytan na ang alima nagpanaw kami
Gindaea na ako paagto sa andang balkunahi
Pinapungko nana ako ag hueat anay kuno
Pagbalik na may daea maw nga pagkaon
Nagduda ako haman kulay itum?
Hambae ko sa eaki nga magueang, "Lo, ano ron haman itum?"
Anang hitsura hay wat reaksyon,
Daw angan-angan hay kan-on ka eon.
Nagbuhi ako it hambaeon,
"Lo, busog pa ako. Ag isaea pa indi ako kauyon sa ing pagkaon na daea haman makaron".

Nag-isip ako ano ra sanda hay engkanto?
O basi hay maligno?
Kasi kung huo ako hay tigpo eon.

Hambae it mga magueang indi kuno kan-on
Ro itum nga pagkaon
Kung kinaon mo indi ka eon kaguwa
Kulong ka eon sa lugar nanda.

"Kailangan ko makaguwa iya". Hambae ko.

Pagdungok ko sa akong ueo nagbahoe ang mata
Nag-eain do hitsura it magueang naging agta
Ginapilit na ako nga kan on do itum nga pagkaon
Nagasukoe ako pero makusog imaw
Ano ro akong obrahon?
Indi ako magsugot nga makueong
Kinahangean ko makahalin sa andang mansyon.

Nagsinggit ako,
"Tabang! Buligi niyo ako".

Wat nagsabat. Naduean eon ako it pagsalig.

Sige gihapon nana ako nga gina puwersa
Asta gina eu-ok eon nana ako indi ako makaginhawa
May nahabatian akong hutik
Wa ako kasayod kung sin-o ag siin naghalin

"Mangamuyo ka para makaguwa". Siling it nagahutik.

Ginpiyong ko ang mata ag nagpangamuyo
Pagmuk-eat ko sang mata wa eon do mansyon nga baeay
Iya eon ako sa binit it sapa indi magpati sa nagkataeabo
Saeamat sa naghutik ikaw do nagbulig kakon.