البارت٧
ليته يعلم (أحببته منذ الصغر)
الشعور جان ماينوصف بالنسبه لبنت أهلها متوفين وكضت حياتها بيت عمها ومن هي وصغيرة تحب هالانسان.
اختنكت كلش وماعرفت ارد
رنا:هااا
رحاب: اي وأخيرا اقتنع والله هداه وماشاء الله ولاء شاطرة وسبعه.
رنا: أن شاء الله خير
صعدت للغرفه وسديت الباب وفحطت بالبجي.
اني هس صرت يتيمه .نكزت من البجي هلكت واني اشهك وابجي.باوعت بالمرايا شحالي وعيوني وارمه
اكول بيني وبين نفسي لو يعرف بحالي جان خطب جان عادي عنده لوشنو .كلبي اشتعل
حاولت اصبر نفسي وماكو فرق
بدلت ملابسي وغسلت وصليت واني اصلي ادعي الله يخفف ألمي وارتاح
ماردت انزل جوة لان ماريد اشوف وجه أحد احس صرت اكرهم كلهم.اعرف مالهم ذنب بس شعور لاارادي
تمددت ونمت من القهر بمدي ماكعد من النوم
اخذتني النومه.وكله كوابيس
احس سراب تكعد بيه
سراب:رنا رنااا اكعدي تغدي جدة تصيحج
رنا:ماريد موجوعانه
بقيت بفراشي بعد شوي اجت جدة
جدة فطوم: رنا بنتي كومي كومي اكلي لكمه
وخرت الغطه من وجهي باوعت عليها
ماتحملت كبل دموعي كامت تنزل صب صب
جدة فطوم:يابنتي عفيه لاتسوين هيج ترى فطرتي كلبي
ماحسبالي تحبينه الهالدرجه
جنت ابجي بهدوء واحجي
رنا:شون هيج صار ها شون
جدة فطوم:اني هم تفاجئت رحاب هي اللي سوت هالشي
كايله لصادق ع ولاء بنت خالتها بالبدايه مو راد
بعدين مقتنع.واجت كالتلي
رنا:هيج بهالسرعه اوف
جدة فطوم:كافي تبجين بنيتي عفيه
شتسوين قابل.تعرفين زين شكد اني ردتج تصيرين اله
بس ماباليد حيله كلشي قسمه
رنا:هاي موقسمه هاي كلها دروب رحاب
عرفت ليش من وكت حجت وياي تكول هومايرهملج مايحبج لاتنتظرين منه شي.
طلعت تحوك من جوة ع بنت خالتها
جدة فطوم:هس كومي اكلي لكنه
رنا:ماريد والله مامشتهيه من اجوع اني اكل
راحت جدة فطوم وغفيت شوي
بعدين سمعت الجامع يأذن عصر. كمت صليت
ونزلت جوة طبيت للمطبخ
سويت جاي وطلعت قشطه
اجت رحاب
رحاب: ها سويتي جاي اي زين لعد صبيلنا بطريقج
رنا:انتي صبي
رحاب:اها وعيني ليش مزعوجه.حتى مانزلتي تغديتي
رنا:معليج ومايخصج
عوجت حلكها وكالت
رحاب: ماشي عيني ماشي بس هالله هالله بنفسج
كالت هيج وطلعت
شكد كرهتها لان حسيت هيج خبثت وياي بعملتها
اكلت شوي تااطلع من المطبخ
سمعت صوته طلع من الاستقبال كال رايح رايح للجامع
شصار بيه بلحظتها اوف احس تحطمت.هذا بس صوته بعد هالخبر هيج سوى بيا
صعدت فوك وطلعت تراك زيتوني وفتت سبحت
وكل الوكت بالحمام واني دموعي ويه ألمي سوى
طلعت يم المرايا اسشور شعري وكمت اصبر نفسي واكول
وشنو يعني عادي خلي يخطب ويزوج قابل شنو اضل ابجي وانوح.خلي ادحك على روحي شوي
كمت اخلي مكياج خفيف ومشطت شعري ورتبت نفسي حتى احسن من نفسيتي
بس بين لحظه ولحظه من اتذكر عبالك اسمع صوت كلبي ينكسر
ومن جييهه اباوع ع الكتب وعندي امتحانات تبدي بعد باجر
اكول شون راح اركز واسيطر بدرسي ماصار هيج خبر وهيج وضعيه اله ويا الامتحانات
صارت الدنيا مغرب والبيت هوسه كلش وكلهم متحضرين حتى يروحون يخطبون وره صلاة العشه
نزلت جوة شفت الصاله مليانه بس هو ماموجود . والبنات بالمطبخ يسون العشه.وكلهم متونسين وفرحانين.الا اني 💔
شافتني عمى منى كالت:ها ولج وينج شو ماشفناج
رنا: والله جنت فوك وراسي يوجعني وعندي امتحانات
منى: اي صحيح قربت الامتحانات الله يسهلج
كعدت وياهم واباوع عليهم يتناقشون ويسولفون
احس صدري ضاك وخنكتني العبره.كمت اتذكر من يوميه هو يكعد هنا واباوع علي واني فرحانه واجيب الجاي اله
حسيت دموعي تريد تنزل
طلعت بره بالطارمه بصفحه كعدت.وخليت اديه ع رجليه ووجهي بينهم والجامع يقرأ واني دموعي تنزل واكول يارب عفيه صبرني شهالحب هذا تعبت كلش.وبعد الجاي اكثر واكثر شون راح اتحمل اطلب القوة منك.بعد شوي
انفتح الباب باوعت هو فات جوة بس ماشافني اني جنت بصفحه.كمت فتت جوة وغسلت وجهي بدون مااحد يشوف
بدو البنات يصبون العشه.خلو العشه للزلم جان موجود زوج عمى منى وابنها ويه صادق وفراس بالاستقبال واحنه بالصاله.صاحتني جدة كالت تعالي اكعدي يمي تعشي
كعدت يمها والكل ملتمين بديت اكل شوي شوي
نور: بس ماشاء الله ولاء كلش حليانه شفتها اخر مره بعرس اخوها
رحاب:اي ولج ولاء تحب تعتني وترتب نفسها دايما .بس من كتلها ع صادق كلش فرحت لان تعرف صادق ذهب
عمى منى: والله صادق يستاهل وحدة تهتم بي صارله ٧سنوات من توفت زوجته .زين من عنده بقى صابر كل هالفترة
سراب: ماعرف منين طلعتولنا بسالفه الزواج هاي.ماريد ابوي يتزوج
جدة فطوم: مايصير بنيتي .لازم تفكرين بابوج هم
نور: شوفي سراب اول وتالي يزوج واني وانتي هم يجي يوم ونزوج ع الاقل يأخذ وحده زينه حسب ماحجت عنها رحاب
ام رحاب: لاتتاخرون بالسوالف استعجلن وراجن تحضير وطلعه.اني كتلهم وره صلاة العشه نجيكم.
من كالت هيج ام رحاب.بعد خلاص مابقالي نفس اكمل
كبل كمت من مكاني.وطلعت برة اشم هوى
بقيت واكفه شوي باوعت طلع صادق وصار مقابيلي
بقيت صافنه علي وهو يباوعلي
ماجان عندي اي رده فعل معينه بس صافنه علي وعيوني حزينه.جنت اتمنى اكله عفيه لاتخطب...
بقى يباوعلي واستغرب من عندي حسيته حس انو بيه شي
رفع حاجبه شوي بمعنى بيج شي؟!
مارديت نزلت راسي وفتت جوة
خلص عشه وبدو يتحضرون . صعدت فوك طبيت لكيت نور وسراب وبنات عمى منى يتحضرن بالغرفه
زينب بنت عمى منى كالتلي:لج تعاي تحضري شتنتظرين
رنا:اي هس
والله محتاره اكول اروح لو ماروح واخاف يشكون بيه لان كلهم راح يروحون مامعقوله بس اني ابقى.نفسيا خلاص ماريد اروح بس واقعيا ماترهم ماريد احد يحس بيه
انجبرت اروح وياهم.لبست القابوط وخليت الشال بس هيج ع راسي.مالي واهس لا اخلي شي ولا أرتب نفسي
كلهم تحضرو وفراس جاب بقلاوة وببسي وياه لان هما بالاصل منطين خبر لاهل ولاء يعني عدهم علم واصلا موافقين.طبعا ولاء عمرها٢٨ سنه مامزوجه بس قبل مخطوبه وخربانه خطوبتها.هذا اللي اعرفه عنها
الكل كملو تحضيرات وطلعنا.مجتمعين كلنا يم الباب اجه صادق جان لابس دشداشة كحليه وعليها جاكيت جان طالع كلش حلو ومرتب كالعادة هو دايما يهتم بمضهرها ومخلي عطر يفوح من بعيد
جدة فطوم وعمى منى: ماشاء الله عليك جنك العافيه لويموتون مايكون هيج نسيب
هو ضحك من حجن هيج.صعد بالسيارة هو وجدة فطوم وابنو حسن وعلاوي اخو وام رحاب
وعيله عمى منتهى طلعوا بسيارتهم
واحنه ويه فراس رحنا.رحاب من كدام واني ونور وسراب من وره
الجو بارد ثلج وبي شوي ضباب
الطريق موكلش طويل.بس جنت أتمناه يطول
شغل المسجل فراس .اشتغلت اغنيه
عذبنا البعاد نار الكلب زاد لو تلحك علينا لونصبح الرماد
واني بهاي حالتي متحملت كبل نزلت دموعي .همزين جنت كاعدة من جبهه الشباك ومحد شافني
نور: فراس شنو هاي شغل شي حلو رايحين نخطب لبابا ترى
فراس: صار هس اشغلج ردح هههه
خلص الطريق وصلنا واني بمدي نرجع لي وره
نزلنا يمهم فتنا جوة
الزلم كعدو بالاستقبال
واحنه جوة .تلكنا نسوان هواي وكلهن كاشخات وحاطات مكياج.وع اخر حبايه ومبينين فرحانين ومومصدكين صادق يخطب من عدهم
سلمنا عليهن وكعدنا.
جانت ام ولاء كاعده ويه ام رحاب ويتسولفن لان هنا خوات
ام ولاء: والله من كالت جايين تخطبون ولاء.كلت هاي القسمه الزينه وين نلكي احسن منكم
جدة فطوم: انتو هم ماشا الله معروفين وخوش ناس
نور: وين ولاء نريد نشوفها
ام ولاء: هس هس تجي
بعد شوي طبت ولاء. وكمان نسلم عليها
جانت لابسه فستان قديفه لونه حني ومخليه مكياج مرتب وطالعه حلوة .
ماحجيلكم عن الغيرة اللي صارت بداخلي بركان وانفجر .معد اتحمل .هي طويله وتراسيمها حلوة بيها شبه من رحاب بس ماحبيتها ابد واكيد ماراح احبها ...
كعدت مقابيلنه .واني شكد ماجان موقفي ضعيف وصعب حتى ماريد اباوع عليها.
اباوع شوي واوخر..وره شوي شفت رحاب تباوعلي ومبتسمه
خوزرت عليها.
جابو جاي وره شوي بقلاوة وشربت وكيك
بقينا ساعه كاعدين. جان يطب اخو ولاء وكال
الحمد لله فضت وتمت على خير
كامت تهلهل عمى منى.وولاء ابتسامتها مدري لي وين
عمى منى:شتفقتو شكد الغايب والحاضر
الحاضر: ٥ ملايين والغايب ٨
جدة فطوم: الحمد لله تمت على خير
سمعت نور بصوت ناصي تكول لرحاب
نور:شدعوة طالبين ٥
رحاب: دوبهن يمعودة .
اخو ولاء:لو اكو الشيخ اليوم جان هس كطعو مهر
بس هالاسبوع ان شاء الله
حسيت نفسي انحصرت شوي.كلت لسراب خلي نروح التواليت
طلعت ويه سراب. طبينا بنص البيت واباوع عليهن وعلى خواتها.شون لابسات وهالمكياج والعطورات وطايرين فرح
رحت التواليت ومن تاارجع هم بجيت بوحدي متحملت اضم العبرة.اكول اوف شيصبرني شون وشوكت راح تخلص هاي الايام. كل مايصير شي اني اتحطم شوكت ارتاح
بعد مافضت واني بالكوة تحملت هاي الطلعه.
رجعنا كعدنا واريد بس ارجع للبيت .الكل جانو فرحانين والفرحه ماتسعهم كلها تضحك ومتونسه
الا اني عكسهم تماما جنت.فراس دك على جدة وكاللها يلا ماشين
كمنا تانرجع صعدت بالسياره اول وحده باوعت على صادق وهو مبتسم وفرحان.جنت أتأمل بي وبداخلي اكله شجاك ماشفتني شجاك رحت لهذول الناس
رجعنا وكل الطريق مشغلين اغاني ومتو للف يرى رونسين
وصلنا البيت اني كبل نزلت وصعدت لغرفتي .جاهدت نفسي انو ماابجي
طبت نور الغرفه:اكلج وين المسجل اريد نشغل أغاني هنا بيناتنا
رنا: ماعرف
نور : شبيج شو انتي مو طبيعيه
رنا: كلشي مابيه
نور: اي تذكرت يمكن بالمخزن خليته
كلت خلي انزل ويتهم ماريد بعد احد يحس كافيني عاد هيج مسويه بروحي
من نزلت شافتني رحاب
رحاب: هاي عيني شو مختفيه لازم حزينه
رنا:انجبي ولج ادبسسز اعرفي شتحجين
رحاب: وتغلطين هم .يصير خير
رنا:الي يعرفج مايشوف خير حقيره هذا هو جان هدفج وصار تريدين تجيبين بنت خالتج حتى تتحدن هنا
رحاب: ههههه اقل شي هذا اذا انتي فاهيه صارلج سنين ماسويتي شي مشكلتج
رنا:اني موفاهيه.اني مربيه عدل ومالعب مثلج
رحاب:اسمعي زين صادق انسي هاي هي والي تمنيتي طول عمرج انتهى.ارضي بالواقع وحبي غيرة
رنا: سدي حلكج ومالج دخل بيه ابد
رحت وعفتها
كعدت بالصاله وياهم وهو جان كاعد
عمى: ماشاءالله ولاء صايره تخبل تستاهل انت وكلش فرحت بيك
هز راسو من حجت هيج عمى منى
نور: بس مو كأنو المهر هواي
عمى: اني توقعت أقل بس هاي هيه الحمد لله
رحاب: وين هواي لاتنسون ولاء بعدها مامزوجه
عمى:هم صحيح
جدة فطوم: شوكت تمسك عقد ملا
صادق: هاليومين.اخابر الشيخ ونروح
بهاي الاوقات اني بس اباوع علي وساكته
فجأة اجت عينو عليه
اني كبل درت وجهي بصفحه
صادق: رناوي..خابرني علي يكول يدك عليج ماكو
رنا:هاا مادري والله عايفه الجهاز بالجرارت
صادق: ماشي عود ردي علي من تصعدين
رنا:ان شاء الله
بعد ساعه هيج بيت عمى منى راحو وام رحاب هم راحت
صعدت فوك حجيت شوي ويه علي
بعدين طفيت الضو ردت انام وارتاح بلكي
نمت وكعدت الفجر.كعدت مخنوكه حيل كمت ابكي بفراشي بحركه احس بعد ماتحمل اريد اطلع من هذا البيت بعد ماريد اشوف أو اسمع شي كدامي يقهرني
مسكت الموبايل بلحظه صار عندي جرأة انو ادزله رساله
اني حافضه راقمه.كتبتله (ليش هيج سويت)
وبعثت ارسال
جنت ارجف بهاي الاثناء.سمعت الجامع إذن
كمت تمسحت وصليت وبجيت بصلاتي ودعيت من كل كلبي انو الله يصبرني.وؤه شوي حسيت نفسي ارتاحيت
تذكرت الرساله اللي بعثتها.جفلت كمت على حيلي
ماعرف شسوي اريد امسحها بس هي وصلته بعد لان بعثتها ع الخط
ياربي شسويت اني
جان يدك الموبايل بيدي باوعت رقمه .انتهيت واني ارجف ماعرف ارد مارد
مارديت ماعندي اي جراة انو احجي وياه بعد هالرساله وشراح اكله
بعد شوي اندك الباب ........يتتتتتبع
أنت تقرأ
#ليته يعلم(أحببته منذ الصغر)
Romanceقصه تتحدث عن فتاة عمرها٢٠ تعيش في بيت عمها بعد أن توفي أبوها وأمها.فوقعت في حب ابن عمها الذي يبلغ من العمر ٤٠ عاما
