#ليته يعلم(أحببته منذ الصغر)

تكمله بارت ٧٤

تكمله بارت ٧٤
ليته يعلم ( أحببته منذ الصغر)
كعدت بنص الليل على وجع يمووت واحس نزيف قوي عندي
كمت تعدلت من الوجع
وخرت الغطى شفت نفسي فايضه دم
رنا:صابرررين....صابرررين
كعدت صابرين :هاا
كمت ابجي
رنا:كوووومي عفيه
عالسريع كامت:شبييج.
رنا:عفييه كووومي والله يمكن رميييت .
كامت عالسريع شغلت الضوه اجت يمي
صابرين:يبووو
راحت بسرعه صاحت صادق
كعدت جده
جده: هااا شبييج
شافت حالتي
جده:ياستار ياربي
ماعرف اكوم لو ابقى بمكاني بس الوجع أضعاف وجع الدورة ...ماضل بيه اي حيل
اجه صادق وصابرين...
اني هنا حسيت نفسي شبه فاقده من الوجع...يحجون وياي بس ماسمعم زين
صادق:تكدرين تكومين
اهز راسي يعني لا
صابرين جابت ملابس..نزعتني هدومي ولبستني بالكوة
بعدين اخذوني للطبيبه نفسها
فحصتني..
دكتوره: بعده بي نبض..بس احتمال تسقطين هس
عيوني تصب دمع لاارادي
رنا:عفيه ماريده يروح
كتبت فحص مال دم..
اجت ممرضه سحبتلي دم...بعد شوي جابت النتيجه للدكتوره
دكتوره:محتاجه دم ضروري
حولتني لغرفه خاصه..وشدولي بطل دم ..
كبل نمت...سمعت صوتهم وكعدت
جده:شونج هس
رنا:....... احسن
صادق كاعد عالكرسي مقابيلي ماحجه شي بس يباوعلي
انداريت على صابرين
رنا:شكالت الدكتوره اخر شي
صابرين:بعده مونازل بس احتمال ينزل
رنا:........
جده: عاد ياربي اذا ماالج قسمه بي شسوين...تحلكين تحملين نوب بعدج بدايه زواجج
رنا:لا جده لاتسولفين هيج
احس ماريد احد يكول عادي ومدري شنو ابد
صادق:........
خلص بطل الدم واجت الدكتوره هم فصحتني
وهي تفحصني أسأل بيها
رنا:هاا دكتوره
دكتوره:نزيفج مستمر بس لي بعده موجد.. على هذا النزيف مفروض نازل هس
بكلبي اتمنى وادعي يبقى وماينزل 💔
دكتوره:هس حالياً أبقي هنا.. منا للصبح اذا مانزل تكدرين ترجعين
دكتوره:اخذتي المثبت
رنا:اي اخذته
دكتوره:منا للصبح تبين...بعد بطل دم ثاني راح تخلين
طلعت الدكتوره
والممرضه خلتلي بطل ثاني
بعدين نمت ماذكر شصار وراها
كعدت جده يمي
رنا:شكد الساعه
جده:خل اشوف الموبايل......٩
جده:خل اخابر صادق كال بس بس تكعد خابريني..دكت علي
جده:هلا وليدي...كعدت هس...
بعد ذلك اجه
صادق:ها شونج هس
رنا:.....وين صابرين
صادق:هس تجي ....
اجت صابرين..كمت وياها للمغاسل
جنت بس اريد اشوف خما اكو دم هواي...باوعت اكو دم بس أقل
طلعت من المغاسل
رنا:خلي نروح للدكتورة اريد تشوفني
صابرين:بعد اكو نزيف ؟!
رنا:اي بس أقل من الليل
دك موبايل صابرين
صابرين:والله سرى خبصتني كل شوي تدك
رحنا لغرفه الدكتورة ..لگينا غير دكتوره لان ذيج راحت خلص دوامها
شرحتلها صابرين عن وضعي...فحصتني
دكتوره:كلشي مانكدر نسوي هس لان بعده مو نازل...صح اكو نزيف بس بعده موجود
رنا:الف الحمدالله ياربي
دكتوره:ابقي عالمثبت.
صابرين:عادي نرجع للبيت هس
دكتوره:اي عادي..بس خلي انشوف نسبه الدم شكد صارت
كتبت فحص دم..اخذته وره ساعه طلعت النتيجه..كالت زينه هس..بس عوضي بالاكل شكد ماتكدرين..وكتبتلي فيتامينات هم
طلعنا اني وصابرين تانرجع للغرفه
رنا:ابد لاتطمنينه وتكوليله  الأمور تمام ومعرف شنو
صابرين:لا اله اخوفه بسيطه ...وهو أصلا بعد الأمور فعلاً موتمام لان اكو دم يطلع منج
رنا: عفيه لاتخوفيني
صابرين:مو اخوفج بس هذا الصحيح
وصلنا الغرفه
جده:ها شو تاخرتن
صابرين: جانت تفحصها الدكتوره
صادق:شكالت .هس شنو وضع الحمل
صابرين: بعد بعد..ماكو شي مستقر ...كالت عادي نرجع للبيت هس
صادق: ماشي
رجعنا للبيت..جان يمشي على كيفه ..
حتى من وصلنا فتحلي الباب
طبيت جوة تلكتني سرى وسراب وفراس
سرى: فوتي جوة تمددي
طبيت للغرفة جانت فارشتلي فراش
تمددت..
سرى:ها رنا هس شون وضعج وضع الحمل
رنا:مادري..متوكله على الله ..كعدت بنص الليل دم ووجع موطبيعي..كلت مستحيل بعده مونازل...بس لي هس مانازل...
سرى: سبحان الله
رنا:عفيه سرى ادعي ماينزل...والله اريده كلش اريده
سرى:ان شاء الله يثبت ان شاء الله
اجت جده وصابرين كعدن يمي
جده:والله مالها داعي هالبچي..الله ياخذ والله ينطي..حتى ماصارلج شهر حامل..ولادرينا بيج .... بقى الف الحمدالله مابقى الله يعوضج بغير مره
حجي جده صحيح ودتخفف عليه..بس اني احسه نااار على صدري..مداتقبل ابد انو يروح...وهم تعال ارجع انام وياه بعدالصار حتى أحبل!!؟؟.
بعد شوي اجه وجايب وياه كباب وچبد
خلاه يمي
صادق:يلا اكلي
ماجنت جوعانه ابد...واحد ماله خلك كلشي
بس ردت اكل على مود نزفت هواي
جده:اكلي زين بنتي
اكلت شوي شوي بالكوة ابلع اللگمه
رنا:كافي ماريد هس
كمت غسلت ورجعت لمكاني
طلعو كلهم من الغرفه بس هو بقى
جنت اباوع علي..غضب چبير بداخلي تجاهه بس ماريد احجي واعاتب واللوم هس ماريد انفعل..خل بس يثبت الطفل ويصير خير
تقرب يبوس بوجهي ويحضن بيه
رنا:ماريد وخر عني
صادق: ليش
رنا: لاتسألني اسأله تعرف جوابها
صادق:ماشي ماشي
رنا:عوفني اريد أنام
صادق:.......هس طالع
بقى شوي وطلع
نمت بس مونومه عميقه يعني مابين الكاعده والنايمه
انفتح الباب باوعت صابرين
صابرين:هاا شونج
رنا:..... مادري شلوني..خل اروح للمغاسل واشوف شلوني
كمت وطبيت للحمام باوعت هم دم..طلعت من الحمام..جانت سرى وصابرين واكفات
رنا:سرى ..بس طلعيلي هدوم من فوك اريد اسبح
صابرين:هس اني اروح
رنا:جيبيلي وصله نضيفه اخليها احسن
راحت صابرين وجابتلي هدوم...سالتني اذا اكو دم بس مارديت عليها
فتت سبحت .اشوف الدم ينزل وي المي
احس ايست هاي هيه
خلصت وطلعت..كعدت شوي باالصاله.
اجه علاوي
علاوي:ها شونج رنا شون صرتي
رنا:على الله
علاوي:مابيج غير العافيه
رنا:تسلم..رجعت للغرفه كعدت بفراشي
اجت صابرين وسرى كعدن يمي
سرى:هاا
رنا: بعدني انزف هو ميت ميت خررررب بالحظ ..الله ياخذني وياه واخلص... سبحان الله لازم لازم ابقى وحدي واجرع كلشي وحدي
صابرين:كولي يالله يمعوده حتى اذا نزل ماتكف الدنيا..قابل بس هاي البطن يعني...تحبلين مره ثانية
رنا:اييي ايييي بكيف اليسولف بكيف اليحجي
دنحجي واجه
صادق:ها شبيها
سكتت مارديت..طلعت سرى
واجه يمي
صادق:شبيج ياعمري
رنا:يعنييي شبيييه شبيييه لي هسس صخااام دددم يننززل
صادق: .......
رنا:لي هس لي هس اكو دددددم ..يجوز من جنت نايمه نزل يجوز من جنت اسبح نزل..شمعرررفني يااااربي ...
صادق: صابرين بس شوي اطلعي..طلعت وسد الباب وراها
رنا:رووح لاتجي عليه رووح
صادق:بس اسمعيني ياروحي.. مايصير هيج تبقين بس تبجين وانتي من غير شي نازفه دم هواي
رنا:حييل يهمك عساس حييل...هو انت السبب انتتتتتت...اخخخخخ منك بس والله اذا صار شي اله احملك المسؤلية طول عمرك
صادق:ترا اني كاعد اتعاقب هس ...هاااي عقوبه اللي..شتحسبين متهني لو مكيف لو عادي عندي...اني مسؤل عن الصار وياج اعرف اعرف زين هالشي...وادري الله ديعاقبني...فيااااروحي انتي ياااعمري لاترجعين هم انتي تضلين تلومين بيه ....شمعرفني بيج حااامل شمعرفني
رنا :من وكتها واني دم يطلع مني
صادق:زين ليش ماحجيتي ماكلتي
رنا:بلي كتلك
صادق:كلتيلي مره وحده ماحسبالي مستمر عندج..كتلج خل نصعد فوك نتفاهم ماقبلتي
رنا:كافي كافي ماريد اسمع شي ...
تقرب مني
صادق:حتى اذا لاسامح الله نزل...اخليج تحبلين مره ثانيه
رنا:......اذا نزل مووو... تحلم اصلا انام وياااااك..
صادق:...... استغفر الله ياربي صبراً صبراً ياالله
بجيت
رنا:هيييج عندك عادي تحجي بسهوله ..احبلج مره ثانيه
عسساس اللي نفس بيك بعد
مارد سكت كام ينافخ ويتنهدد
صادق: الله كريم يابعد روحي
كمت تااطلع احس اختنكت من الغرفه
صادق:وين
رنا:اطلع للحديقه
طلعت للحديقه كعدت عالكرسي..اجه جر الكرسي وكعد مقابيلي ...خابر على ولد
صادق:هلا عبد شونك.....اكلك اني باجر ماراح اداوم..... لاماكو شي بس ماراح اجي..... ماشي هلاا
اجت جده
جده:ها اخبارج ...
رنا:نفس الشي
بعد شوي اجت صابرين كعدت ويانا
صابرين:لكيته داك عليه
صادق:منو
صابرين:محييسن الافندي
صادق:شيريد
صابرين:مارديت علي ......ها رنوش الأمور
رنا:........تعبانه.. اوووف
صادق:اوديج هس
رنا: مادري..بس أريد اروح اجيك وضعي
صابرين:لاتروحين اليوم موزين الج الطريق بالسيارة..صبري لي باجر
رنا:هذا اذا ضل منا لباجر
صادق:ليش هالگد متشائمه
رنا:ماعندي ثقه بحضي ابد.. أعرفه زين زين
صابرين: اول البارحه كعدتي بالليل تبجين..كلتي حلمت بأهلي شحلمتي ؟؟
رنا:اي حلمت بيهم.......كلش محتاجتهم علواه هس هما يمي...عالاقل لو واحد منهم..امي ابوي علاوي..اي واحد منهم
حجيتلهم الحلم بالكامل
صادق صفن شوي جان يكول
صادق:يعني اكلتي من الخبز
رنا:اي اكلت منه...جان كلش طيب
صادق: والله اعلم والله اعلم.. ماينزل الطفل ولايصير علي اي شي
رنا:شلون
صادق:هو انتي جنتي تنتظرين امج حتى تجي..تكولين عبالك راح يصير فد شي حلو...هو نفسه الحمل مالتج اللي تنتظرينه..مدام اكلتي مراح يصير شي علي
فرحت بداخلي من فسره هيج...اني اثق بتفسره للاحلام
رنا: أتمنى هالشي أتمنى
صابرين:يارب إن شاء الله
تأملت بداخلي كلش...صادق بقى وياي ماعافني لحظه
احسه كلش مستذنب من الصار..واضح علي هالشي..بس اني غضبي علي ماينتهي بسهوله 💔
عبر الوكت شوي صارت مغرب
رجعت اختنكت كلش
طبيت جوة للصاله...كعدت وياهم
اجت سراب يمي
سراب: رنا اني حيل فرحت من سمعت بيج حامل وضجت لان كالو احتمال تسقطين..
ابتسمتلها
سراب:اني مالي علاقه بنور
رنا:ليش شبيها نور خانم
سراب:.....مابيها شي بس ردت اكلج اني اخ او اخت صغار اللاعبهم
رنا: أن شاء الله يارب يصير عندج اخ
صادق صاح صابرين كاللها تسويلي قليه حتى اتعشه
راحت سوتلي طاوة...اكلت هم بس شوي
صادق:ترا مايصير هيج اكلج...اكلي زين
رنا:بعدين هس موكلش جوعانه
صادق:عالغده ماكلتي زين
رنا:.......
كمت غلست ورجعت كعدت
صح كلهم مجتمعين وهوسه حواليه..بس اني جنت داخله بموجه تفكير مع نفسي
ابالي هواي قرارات وشروط هم ..بس انتظر اني حالياً انتظر اشوف شراح يصير وياي... سواء بقى الطفل بحيل الله أو لاقدر الله وسقط...اني عندي هواي امور وقرارات اسويها...بس حاليا مووكت اي شي منهن...اريد الله يسهل اللي
بعدين كمت اتخيل انو الطفل يبقى وهاي
كبل تعمقت بتفكيري... مباشره حسيت بشعور حلو وغريب
شعور ماكدر الوصفه الكم يجوز موكلش راح تفهمونه..بس هيج يعني حلو كلش...اني مشكلتي اتعمق بتفكيري.حتى حبي لصادق جان كلش قوي بسبب تعمقي بي... وهذا التعمق ماجان يجي عبثا أو من فراغ ابد...لان وحيده هيج يصير عندي تفكير 💔
واني سارحه بتفكيري ومتخيله حتى شكل الطفل... فجأة تذكرت الدم وانو ممكن يسقط...احس هيج نغزة بگلبي قويه صابتني خنگتني كلش كلش
لاارادي كمت ورحت لغرفه جده وقفلت الباب
سجدت بااكاع وكمت ادعي وابجي بحرگه گلب مفطور من كل كلبي
رنا: يارب عفيه اريده انت تعرف اني يتيمه..اخذت مني كل اهلي بس خليلي هذا عفيه يارب ...تعبانه اني حيل تعبانه وانت تشوف وتعرف كلشي....يارب والله مامره طلبت شي هالكثر منك...بس اني ضعيفه حالياً واريد استقوي بي ..
لا ينزل عفيه....ماريد اواجه اوجاع نفسيه بعد أكثر من هيج...لخاطر خير خلقك (رسولك اللي تحبه اكثر من كل البشر...عفيه لاتنزله 💔
جنت ادعي واحجي ويه ربي وابجي
اندك الباب
صادق:رناا رنااا
رنا:يارب اتوسل بيك تخلي
تعدلت واحس ماضل بيه حتى حيل اكوم افتح الباب
صادق:يرنااا افتحي الباب
كمت فتحت الباب ..شافني عيوني ورامه وابجي
صفن عليه شوي
رنا: صادق ماريده يروح مني عفيه
صادق: بالقران وريتني كافيج ياعمري كافيج...ترا قسماً عضمآ اني ماضل عندي اي صبر بعد..
طب للغرفة وحضني
صادق:كتلج ماعلي شي والله ماعلي شي
رنا:اكيد
صادق:اي اكيد
بقى وياي بالغرفه..
صادق:تريدين شي اجييلج شي
رنا:لا
صادق:اخذتي العلاج
رنا:اي
اجت سرى للغرفه ..اذن عشه وهو طلع
سرى: اخبار صادق شنو وضعه.. اكيد هس يلوم روحه
رنا:يلوم اومايلوم شالفايده بعديش
سرى:بعد مارميتي بلكي يبقى
رنا:حتى لو بقى... الصار وياي موقليل صارلي كم يوم انزف
سرى:صدك اني ماتوقع كل هالدم بس بسبب نومته وياج...انتي لاتنسين هم كتلتي نور وذبيتي حيلج بيها هالشي أثر بالزايد...
صابرين:اي صحيح هم دفعتيها بقوى .
رنا:لاتذكرني بيها...راس الفتنه كله منها.. حقيره
صابرين:ونوب هم تعاركتي وياه وانهاريتي..شي كمل على شي
رنا:هو من وراهم اثننينهم
سرى:من عرفت بيج حامل البارحه شصار بيها
صابرين:صدك شصار بيها ماشفت چهرتها
سرى:وجها كام ينطي اللوان...خنسست ماحجت كلشي صعدت فوك ....ولمن نزفتي بنص الليل ورحتو ..كعدت الصبح من عرفت....جانت مكيفه تفتر بالبيت وفرحانه كلش
عضيت اصبعي
رنا:شگد قرچييييييه..ان شاء الله كون على يبقى على خشمها 
صابرين:تدرين شغله...اني اذكر قديم يعني لمن جانت صغيره..هي الجبيره واول بنت لصادق...هو جان كلش كلش يحبها وهي هم متعقله بي...جان عمرها اذكر ٥ سنوات هيج....مايجي عليه اذا ماهي وياه ...فهي من كبرت وحتى لمن اجت سراب وحسن..بقت تريد تثبت نفسها انو هي اللي يحبها اكثر وهيج..نوب اجيتي انتي تخبلت منج
سرى:لعد ليش جانت ساكته ومكيفه على ولاء هاا
صابرين:يمكن لان ولاء مو من داخل البيت..بس رنا تربت هنا..اعتقد هالشي هو السبب
سرى:مادري
حجينا شوي..
تاخر الوكت ورحت للحمام حتى اشوف اكو نزيف اولا..
باوعت هم اكو بس شي قليل
رحت تمددت...
باوعت صابرين فرشت الها ولجهالها
اجه هو شايل بقلاوة وحلويات انطاهن لصابرين
صادق:خليلها منهن
كعد يمي
صادق:ها شونج هس
رنا:.......ماباوعت علي
صادق:موداحجي وياج يروحي ليش هيج تسوين
رنا:زينه
صابرين خلت يمي صحن
اشتهيت البقلاوه بس اكلت منها
اني جنت بفراشي كاعده مرتچيه عالحايط...وهو هم مرتچي عاالحايط يمي
سحب الغطى وخلاه علي وعليه
خله ايده على بطني
صادق:يول لاتنزل صير عنيد مثل امك
رنا:........
صادق:لخاطر ابوك ...ترا ماترحمني تضل تعيرني طول عمري
رنا:......
صابرين:ههههه اي والله...
صادق:عود شون اذا تعصبت وانفلتت  ..تلاص والله..لايبقى بريك لاشي تدوسس عدل وكبل..لاتخلي خط أحمر لا اشارة مرور تهجمهااا والله
صابرين:هههههههه
صادق:ياوليدي لاتخليني على أعصابي...ترا اذا نزلت تهجم بيتي وين انطي وجهي عود...
رنا:هه
حسن يباوع يسمع ابو يحجي بس مو كلش فاهم السالفه
نور صعدت فوك هيج بالصدفه لمحتها وهي صاعده للدرج..مسحت عيونها بايدها.. مبينه جانت تصنت وتبجي
صابرين طفت الضوه
هو بقى يمي..تاخر الوكت كلش
صادق:اريد انام يمج بس المكان ضيگ واخاف ادفرج شي واني نايم...اصعد فوك احسن
مارديت علي
صادق:
بعد شوي هو كام..واني نمت
كل ليلي كوابيس بالحمل...نفس المعاناة
كعدت الصبح باوعت الساعه ٧ كلهم نايمين
كبل رحت للحمام...باوعت مانازل دم جديد..نفسه بس دم البارحه
تبلهثت كلشش... اكول معقوله راح النزيف وهاي هيه بعده موجود...لو خاف نزل من بارحه
رحت للغرفة ...
دورت لموبايلي
مادري وين صاير..ردت اصعد فوك اكله يوديني للدكتوره..بس ماريد اصعد للدرج..صرت اخاف كلش اسوي حركه مثلا تأثر علي
ماردت هم اكعد صابرين..خطيه بعز نومتها
اخذت موبايلها من الشحن ودكيت علي
دك دكه طويله بعدين رد
صادق:الو
رنا: تعال تاتوديني
صادق:ليش شبيج
رنا:اريد اروح للدكتوره هس
صادق:هيان نازل
جده كعدت من سمعتني احجي
جده:ها رنا شو كاعده
رنا:اي اريد اروح اچيك وضعي..نزيف ماكو خاف نزل لو لا..شتكولين جده
جده:يارب بلكي مونازل مادام راح نزيفج
رنا:اي عفيه جده ادعيلي
جده:خل اكوم اجي وياج
كامت جده تحضرت...اني بعدني مالبست شي..
رجعت خابرت علي
رنا:اكلك نزل وياك ملابس اللي
صادق:شنو انزل
رنا:افتح اول كنتور...
صادق:هس...فتحته
رنا:اكو سترة سوده
صادق: دقيقه خل اشوف......
رنا:هااا
صادق:ماكو
رنا: شلون ماكو شلون...دور زين
صادق:تكدرين تجين
رنا:لاماجي..ماريد اصعد الدرج
صادق: ماشي....ك
ماكاعد الگاهاا ...اجيبلج غيرها
رنا:يلا يلا بسرررعه
صادق: هس هس شبيج....كعدي صابرين خل تجي
رنا: جدة راح تجي
بعد شوي نزل..انطاني اكثر من لبسه
صادق:هااا لازم هم رجع عليج النزيف
ردت اخوفه
رنا:اي
صادق:يلا البسي حتى اخذج
اخذت اللي اريده لبستهم
وطلعنا اني وياه وجده
كل الطريق كلبي يدك..اللي يروح لامتحان نهائي موهيج.. جان يحجي وياي بس مامركزة وياه ابد وصلنا.. نزلت كبل رحت على غرفه الدكتوره بس مافوتت جده وياي.. لگيت نفس اول دكتورة فحصتني..
رنا:دكتورة انگطع النزيف من الصبح لحد هس ماكو..بس اريد أتأكد بعده موجود لولا
كالت تمددي خل افحصج بسونار مهبلي
وهي تفحصني...احس حرارتي صعدت
رنا:ها دكتوره
دكتوره:والله يابا هذا غير مچلب بيج...
واني اسمع الدكتورة هيج تكول..تصب دموعي من الفرح ..
مامصدگه ابد..
حمدت الله وشكرته هواي لان استجاب اللي..تذكرت لمن صادق فسر الحلم وكال ماراح ينزل..تطمنت كلش
رنا: شكرا دكتوره لان فرحتيني
دكتوره: شنو رده فعل زوجج لمن كتيله حامل وطفلج بخطر بسببه
رنا:حاسس بالذنب كلش
دكتوره:باوعي لاتكوليله الجنين زين ومابي شي...كوليله طاح خوفي
رنا:اصلا هيج ناويه اكله والله
دكتوره:ايي خوفي لاتعلمينه......يتتتتببببع